Accessibility setting

Agpili iti lengguahe

Mapan iti segundario a pagpilian

Mapan iti linaonna

Dagiti Saksi ni Jehova

Iloko

Ania ti Bautismo?

Ania ti Bautismo?

Ti sungbat ti Biblia

Ti bautismo ket tumukoy iti pannakaitaneb ti maysa a tao iti danum ken irurukuasna. * Isu a nabautisaran ni Jesus iti karayan. (Mateo 3:13, 16) Maysa pay, imbaga ti maysa a lalaki nga Etiope a kayatna ti mabautisaran idi nakakita “iti lugar nga adda danum.”Aramid 8:36-40, Ti Baro a Naimbag a Damag Biblia.

Kaipapanan ti bautismo

Inkompara ti Biblia ti bautismo iti pannakaitabon. (Roma 6:4; Colosas 2:12) Ti bautismo iti danum isimbolona ti ipapatay ti maysa a tao iti dati a panagbiagna ken rugi ti baro a biag kas maysa a Kristiano a dedikado iti Dios. Ti bautismo ken dagiti addang nga agturong iti dayta ket urnos ti Dios tapno maaddaan ti maysa a tao iti nadalus a konsiensia maibatay iti pammatina iti sakripisio ni Jesu-Kristo. (1 Pedro 3:21) Isu nga insuro ni Jesus a masapul a mabautisaran dagiti adalanna.Mateo 28:19, 20.

Maikkat kadi ti basol babaen iti bautismo iti danum?

Saan. Isursuro ti Biblia a mabalin a maikkat laeng ti basoltayo babaen iti naiparukpok a dara ni Jesus. (Roma 5:8, 9; 1 Juan 1:7) Ngem tapno mabenepisiaran ti maysa a tao iti sakripisio ni Jesus, masapul nga ipakitana ti pammatina ken Jesus, balbaliwanna ti panagbiagna maitunos iti pannursuro ni Jesus, ken agpabautisar.Aramid 2:38; 3:19.

Ania ti panagbuniag?

Awan iti Biblia ti sasao a “buniagan” ken “panagbuniag.” Tumukoy dagitoy iti seremonia nga ar-aramiden ti dadduma a relihion a “panangbautisar” iti maysa a maladaga (babaen iti panangiwarsi wenno panangibukbok iti danum iti ulona) sa panagananda.

Isursuro kadi ti Biblia ti panangbautisar kadagiti maladaga?

Saan. Ti Nakristianuan a bautismo ket para kadagidiay nataenganen a makatarus ken mamati “iti naimbag a damag ti pagarian ti Dios.” (Aramid 8:12) Karaman iti dayta ti panagdengngeg iti sao ti Dios, panangakseptar iti dayta, ken panagbabawi. Saan a maaramidan dagita ti maysa a maladaga.Aramid 2:22, 38, 41.

Mainayon pay, ipakita ti Biblia nga ibilang ti Dios dagiti babassit nga annak dagiti Kristiano kas nasantuan, wenno nadalus kadagiti matana, gapu iti kinamatalek dagiti nagannakda. (1 Corinto 7:14) No umiso ti panangbautisar iti maladaga, saan koman a kasapulan nga agdepende dagita nga annak iti kinamatalek ti sabali a tao. *

Di umiso a pannakaawat maipapan iti Nakristianuan a bautismo

Di umiso: Ti panangiwarsi wenno panangibukbok iti danum iti maysa a tao ket maakseptar a kasukat ti pannakaitaneb ti intero a bagi.

Umiso: Dagiti bautismo a nadakamat iti Biblia ramanenna ti pannakaitaneb. Kas pagarigan, idi binautisaran ni Felipe ti lalaki nga Etiope, “bimmabada a dua iti danum.” Kalpasanna, ‘simmang-atda iti danum.’Aramid 8:36-39. *

Di umiso: Ipakita ti Biblia a karaman dagiti maladaga no mabautisaran ti intero a pamilia. Kas pagarigan, ibaga ti Biblia maipapan iti maysa a parabantay iti pagbaludan idiay Filipos: “Isu ken ti sangakabbalayanna nabautisaranda.”Aramid 16:31-34.

Umiso: Ipakita ti salaysay maipapan iti pannakakomberte ti parabantay iti pagbaludan a dagidiay nabautisaran naawatanda ti “sao ni Jehova” ken ‘nagrag-oda unay.’ (Aramid 16:32, 34) Dagita nga impormasion ti mangpaneknek a no adda man maladaga iti sangakabbalayan ti parabantay, saanda a nairaman a nabautisaran ta dida pay maawatan ti sao ni Jehova.

Di umiso: Insuro ni Jesus ti panangbautisar kadagiti maladaga babaen iti panangibagana a ti Pagarian ket kukua dagiti ubbing.Mateo 19:13-15; Marcos 10:13-16.

Umiso: Saan a tuktukoyen ni Jesus ti bautismo idi imbagana dagitoy a sasao. Imbes ketdi, ipakpakitana a dagidiay makualipikar nga agbalin a paset ti Pagarian ti Dios ket masapul nga agbalin a kas iti ubing a napakumbaba ken nalaka a suruan.Mateo 18:4; Lucas 18:16, 17.

^ par. 3 Ti Griego a sao a naipatarus kas “bautismo” ket naggapu iti sao a kayatna a sawen, “itaneb.” Kitaem ti Theological Dictionary of the New Testament, Volume I, panid 529.

^ par. 12 Sigun iti The International Standard Bible Encyclopedia, “awan ti masarakam iti Baro Tulag a panangbautisar kadagiti maladaga.” Mabasa pay dita a naggapu dayta a kaugalian iti “di umiso wenno nalabes a panangipapan iti pateg ti bautismo,” a kaipapananna, maikkat dagiti basol babaen iti bautismo.—Volume 1, panid 416-417.

^ par. 15 Iti paulo a “Bautismo (iti Biblia),” kuna ti New Catholic Encyclopedia: “Nalawag a ti bautismo iti nagkauna a Simbaan ket maaramid babaen iti pannakaitaneb.”—Volume 2, panid 59.

Ammuem ti Ad-adu Pay

Bautismo ken ti Relasionmo iti Dios

Ania ti aramidem tapno makualipikarka iti Nakristianuan a bautismo? Ammuem no ania ti isimsimbolona ken no kasano a maar-aramid dayta.