Mapan iti linaonna

Mapan iti segundario a pagpilian

Dagiti Saksi ni Jehova

Iloko

Kasanok a Masarakan ti Pudno a Relihion?

Kasanok a Masarakan ti Pudno a Relihion?

Sungbat ti Biblia

Iladawan ti Biblia no kasano a mapagduma dagidiay mangan-annurot iti pudno a relihion ken dagidiay saan. Kunana: “Babaen kadagiti bungada mailasinyonto ida. Saan aya a di pulos agburas dagiti tattao kadagiti ubas manipud kadagiti sisiitan wenno kadagiti higos manipud kadagiti kalunay?” (Mateo 7:16) No kasano a mapagdumam ti puon ti ubas ken ti sisiitan a kayo babaen iti bungada, mapagdumam met ti pudno a relihion ken ti palso babaen ti bungada wenno pakabigbiganda.

  1. Isursuro ti pudno a relihion ti kinapudno a naibatay iti Biblia, saan a kadagiti sirib ti tao. (Juan 4:24; 17:17) Ramanen daytoy dagiti kinapudno nga ibagbaga ti Biblia maipapan iti kararua ken ti namnama a biag nga agnanayon iti paraiso a daga. (Salmo 37:29; Isaias 35:5, 6; Ezequiel 18:4) Saan met nga agamak a mangibutaktak kadagiti palso a sursuro dagiti relihion.—Mateo 15:9; 23:27, 28.

  2. Tultulongan ti pudno a relihion dagiti tattao a mangam-ammo iti Dios, a pakairamanan ti panangisuro kadakuada iti naganna a Jehova. (Salmo 83:18; Isaias 42:8; Juan 17:3, 6) Saanna nga isursuro a ti Dios ket narigat a matarusan ken saan a maasitgan. Imbes ketdi, isurona a kayat ti Dios a maaddaantayo iti relasion kenkuana.—Santiago 4:8.

  3. Isursuro ti pudno a relihion a ni Jesu-Kristo ti impaay ti Dios a pakaisalakanan. (Aramid 4:10, 12) Tungtungpalen dagiti miembro ti pudno a relihion dagiti bilin ni Jesus ken ikagkagumaanda a suroten ti ulidanna.—Juan 13:15; 15:14.

  4. Naipamaysa ti pudno a relihion iti Pagarian ti Dios kas ti kakaisuna a namnama ti sangatauan. Sireregta nga ipakpakaammo dagiti miembrona iti sabsabali ti maipapan iti dayta a Pagarian.—Mateo 10:7; 24:14.

  5. Iparparegta ti pudno a relihion nga ayaten ti sabsabali a saan a mangnamnama iti kasukat. (Juan 13:35) Isursurona ti panagraem iti amin a tribu ken awatenna dagiti tattao a naggapu iti nagduduma a puli, kultura, lengguahe, ken nalikudan. (Aramid 10:34, 35) Gapu ta agiinnayat dagiti miembrona, saanda a makigubgubat.—Mikias 4:3; 1 Juan 3:11, 12.

  6. Ti pudno a relihion ket awanan iti masuelsuelduan a panguluen ken awan ti maipapaayan iti natan-ok a titulo iti siasinoman kadagiti miembrona.—Mateo 23:8-12; 1 Pedro 5:2, 3.

  7. Ti pudno a relihion ket saan a pulos a makinamnamin iti politika. (Juan 17:16; 18:36) Nupay kasta, raraemen ken agtultulnog dagiti miembrona kadagiti agtuturay iti lugarda. Maitunos daytoy iti bilin ti Biblia: “Ibayadyo ken Cesar ti bambanag ni Cesar, ngem iti Dios ti bambanag ti Dios.”—Marcos 12:17; Roma 13:1, 2.

  8. Ti pudno a relihion apektaranna ti biag ti maysa, saan a basta ritual wenno pormalidad laeng. Sursuroten dagiti miembrona ti nangato a moral a pagalagadan ti Biblia iti amin a paset ti panagbiagda. (Efeso 5:3-5; 1 Juan 3:18) Imbes a seriosoda unay, maragsakanda nga agdaydayaw iti “naragsak a Dios.”—1 Timoteo 1:11.

  9. Manmano laeng ti bilang dagidiay mangan-annurot iti pudno a relihion. (Mateo 7:13, 14) Dagiti miembro ti pudno a relihion masansan a nababa ti panangmatmat dagiti tattao kadakuada, mauy-uyawda, ken mabusbusorda gapu iti panangaramidda iti pagayatan ti Dios.—Mateo 5:10-12.

Saan nga umdas ti panangibaga nga ‘umiso ti relihionko’

Napeggad ti panangpili iti relihion a naibasar laeng sigun iti panagriknatayo. Impakpakauna ti Biblia ti tiempo a dagiti tattao “mangurnongdanto kadagiti mannursuro [iti relihion] a maipaay iti bagbagida tapno gagatelenda dagiti lapayagda.” (2 Timoteo 4:3) Iti kasumbangirna, iparparegta ti Biblia kadatayo a surotentayo “ti porma ti panagdaydayaw [relihion] a nadalus ken di natulawan iti panangmatmat ti Dios ken Amatayo,” uray no dayta a relihion ket saan a nalatak.—Santiago 1:27; Juan 15:18, 19.