Accessibility setting

Agpili iti lengguahe

Mapan iti segundario a pagpilian

Mapan iti linaonna

Dagiti Saksi ni Jehova

Iloko

Adda Kadi Asawa ni Jesus? Adda Kadi Kakabsatna?

Adda Kadi Asawa ni Jesus? Adda Kadi Kakabsatna?

Sungbat ti Biblia

Paneknekan ti Biblia nga awan asawa ni Jesus, nupay awan ti espesipiko a dakdakamatenna no isu ket nangasawa. * Usigem ti sumaganad:

  1. Masansan a dakamaten ti Biblia ti maipapan iti pamilia ni Jesus, dagiti babbai a kimmuyog kenkuana bayat ti ministeriona, ken dagiti babbai a nakatakder iti abayna idi napapatay. Ngem awan ti dinakamat ti Biblia nga asawana. (Mateo 12:46, 47; Marcos 3:31, 32; 15:40; Lucas 8:2, 3, 19, 20; Juan 19:25) Nainkalintegan laeng nga awan ti mabasatayo iti Biblia maipapan iti daytoy gapu ta di pulos nagasawa ni Jesus.

  2. Maipapan kadagiti nagtalinaed a di naasawaan tapno ad-adu ti panawenda nga agserbi iti Dios, kinuna ni Jesus kadagiti adalanna: “Ti makaiwaya iti dayta [kinaawan asawa] iwayaanna koma dayta.” (Mateo 19:10-12.) Nangipakita iti ulidan kadagiti nangpili a di agasawa tapno maipamaysada ti agserbi iti Dios.Juan 13:15; 1 Corinto 7:32-38.

  3. Sakbay ti ipapatayna, insagana ni Jesus ti pannakaaywan ti inana. (Juan 19:25-27) No koma adda asawa ni Jesus wenno adda anakna, sigurado la ketdi nga impaayna ti kasapulan dagiti kapamiliana.

  4. Nupay dinakamat ti Biblia ni Jesus kas ulidan ti assawa a lallaki, saanna a tuktukoyen ditoy ti panangtrato ni Jesus iti asawana a babai. Imbes ketdi kinunana: “Assawa a lallaki, itultuloyyo nga ayaten dagiti assawayo, no kasano a ti Kristo inayatna met ti kongregasion ken inyawatna ti bagina a maipaay iti dayta.” (Efeso 5:25) No talaga koma nga adda idi asawa ni Jesus, saan kadi a ti perpekto nga ulidanna koma kas asawa a lalaki ti inusarna iti dayta a bersikulo?

Adda kadi kakabsatna?

Wen, adda innem a kakabsat ni Jesus, da Santiago, Jose, Simon, ken Judas ken ti dua a babbai. (Mateo 13:54-56; Marcos 6:3) Dagitoy a kakabsat ni Jesus iti ina ket annak da Maria ken Jose. (Mateo 1:25) Tukoyen ti Biblia ni Jesus kas “ti inauna” nga anak ni Maria a mangipakita nga adda pay ti kakabsatna.Lucas 2:7.

Di umiso a kapanunotan maipapan iti kakabsat ni Jesus

Tapno masuportaran ti kapanunotan a nagtalinaed a birhen ni Maria iti intero a panagbiagna, nagduduma ti nangyaplikaranda iti kaipapanan ti sao a “kakabsat.” Kas pagarigan, ibaga ti dadduma a ti kakabsat ni Jesus ket annak ni Jose iti immuna nga asawana. Ngem ipakita ti Biblia a tinawid ni Jesus ti legal a kalintegan nga agari a naikari ken David. (2 Samuel 7:12, 13; Lucas 1:32) No naaddaan ni Jose kadagiti annak nga in-inauna ngem ni Jesus, ti inauna koma kadakuada ti legal a nagtawid ken Jose.

Ti kadi sao a “kakabsat” ket tumukoy kadagiti adalanna, wenno naespirituan a kakabsatna? Daytoy nga ideya ket maikontra iti Kasuratan, ngamin ibaga ti Biblia nga adda idi gundaway a dagiti “kakabsatna, iti kinapudnona, saanda a winatwat ti pammati kenkuana.” (Juan 7:5) Nalawag nga ipakita ti Biblia a nagduma dagiti kakabsat ni Jesus kadagiti adalanna.Juan 2:12.

Adda met dagiti mangibaga a kasinsin kano ni Jesus dagiti kakabsatna. Ngem nagduduma a sasao ti inusar ti Griego a Kasuratan para iti “kabsat,” “kabagian,” ken “kasinsin.” (Lucas 21:16; Colosas 4:10) Patien ti adu nga iskolar ti Biblia a ti nadakamat nga innem a kakabsat ni Jesus ket talaga a kabsatna. Kas pagarigan, kuna ti The Expositor’s Bible Commentary: “Ti simple a kaipapanan ti sao a ‘kakabsat’ . . . ket tumukoy iti annak da Maria ken Jose, iti kasta, iti kakabsat ni Jesus iti ina.” *

^ par. 3 Iti Biblia, natukoy ni Kristo kas nobio, ngem ipakita dagiti konteksto a tumukoy dayta iti simboliko a pamay-an.Juan 3:28, 29; 2 Corinto 11:2.

^ par. 13 Kitaem met ti The Gospel According to St. Mark, Second Edition, ni Vincent Taylor, panid 249, ken ti A Marginal Jew—Rethinking the Historical Jesus, ni John P. Meier, Volume 1, panid 331-332.

Ammuem ti Ad-adu Pay

Siasino ni Jesu-Kristo?

Ammuem no apay a natay ni Jesus, no ania ti subbot, ken no ania ti ar-aramiden ni Jesus itan.

No Apay a Mapagtalkam Dagiti Ebanghelio ti Biblia

Usigem ti pammaneknek dagiti nagkauna a manuskrito.