Accessibility setting

Agpili iti lengguahe

Mapan iti segundario a pagpilian

Mapan iti linaonna

Dagiti Saksi ni Jehova

Iloko

SALUDSOD DAGITI AGTUTUBO

Apay a Makikappiaak Kadagiti Kakabsatko?

Apay a Makikappiaak Kadagiti Kakabsatko?
  • “Kadekketan ngem makapasuron a gagayyem”

  • Dua a rason a makikappiaka

  • Ti kuna dagiti padam nga agtutubo

“Kadekketan ngem makapasuron a gagayyem”

Dagiti kakabsatmo ket maawagan kas “kadekketan ngem makapasuron a gagayyem.” Ay-ayatem ida ken ay-ayatendaka ngem no maminsan, saankayo la a talaga nga agkakasurotan. “Makapasuron ti adingko a lalaki,” imbaga ti 18 ti tawenna a ni Helena. “Talaga nga ammona no ania dagiti mangpasuron kaniak!”

Dadduma a riri dagiti agkakabsat ti mabalin a masolbar babaen iti simple a panagtungtong ken panagsinnabat. Kas pagarigan:

  • Mabalin a pagririan ti agkakuarto nga agkabsat a lallaki ti maipapan iti privacy. Ti solusion? Sursuruen ti makisinnabat ken ikkan ti tunggal maysa iti tiempo para iti personal a bambanag. Iyaplikar ti prinsipio a mabasa iti Lucas 6:31.

  • Mabalin nga “agbinnulod” iti bado ti agkabsat a babbai a dida ipakada. Ti solusion? Pagsaritaan ti problema ken maaddaan iti rasonable a limitasion. Iyaplikar ti prinsipio a mabasa iti 2 Timoteo 2:24.

No dadduma, naserserioso dagiti problema ti agkabsat ken mabalin a nakaro ti resultana. Kitaem ti dua a pagarigan iti Biblia:

  • Immapal da Miriam ken Aaron iti kabsatda a ni Moises, ket makapaladingit ti resultana. Basaem ti salaysay iti Numeros 12:1-15, sa isaludsodmo iti bagim: ‘Kasanok a maliklikan ti umapal iti kabsatko?’

  • Nagpungtot ni Cain nga uray la napatayna ti kabsatna a ni Abel. Basaem ti salaysay iti Genesis 4:1-12, sa isaludsodmo iti bagim: ‘Kasanok a makontrol ti pungtotko no kakaduak ti kakabsatko?’

Dua a rason a makikappiaka

Uray no nagrigatmo a makasurotan ti kakabsatmo, sulit no agporsegika gapu iti di kumurang a dua a rason.

  1. Pakakitaan a manakemka. “Nagababa idi ti pasensiak iti dua nga adingko a babbai,” imbaga ti agtutubo a lalaki a ni Alex. “Ngem ita, adayo a nakalkalmado ken at-atiddogen ti pasensiak. Mabalin a maibagam a nagnakemakon.”

    Kuna ti Biblia: “Daydiay nabannayat nga agunget naruay iti panangilasin, ngem ti maysa a di makaanus itantan-okna ti kinamaag.”Proverbio 14:29.

  2. Pakasansanayam para iti masanguanan. No saanmo a maanusan ti kamali ken pagkapuyan dagiti kakabsatmo, kasanonto ngata ti pannakilangenmo iti asawam, iti katrabahuam, iti boss-mo, wenno iti asinoman a makaduam?

    Realidad: Tapno agbalinto a naballigi ti relasionmo iti dadduma, napateg ti abilidadmo a makisarita ken makisinnabat ket awanen ti kasayaatan a pakasursuruam kadagita no di iti uneg ti pamiliam.

    Kuna ti Biblia: “Agingga a makapagpannuray kadakayo, makikappiakayo.”Roma 12:18.

Kayatmo kadi ti tulong tapno masolbar ti problemayo nga agkabsat? Basaem ti adda iti baba a “Ti kuna dagiti padam nga agtutubo,” sa kitaem ti worksheet a “Pannakibagay Kadagiti Kakabsatmo.”