Accessibility setting

Agpili iti lengguahe

Mapan iti segundario a pagpilian

Mapan iti linaonna

Dagiti Saksi ni Jehova

Iloko

SALUDSOD DAGITI AGTUTUBO

Ania ti Aramidek no Adda Problemak iti Salun-at? (Paset 3)

Ania ti Aramidek no Adda Problemak iti Salun-at? (Paset 3)

Dagiti tawen ti kinaagtutubo masansan a kakuykuyogna ti kinasaranta ken kasla di maibus a kinapigsa. Nupay kasta, adda dagiti agtutubo a saan a kasta gapu iti serioso a sakit. Maysaka kadi kadakuada? No kasta, mabalin a maparegtaka iti kapadasan dagiti Saksi ni Jehova a da V’loria, Justin, ken Nisa. Usigem no kasanoda a nadaeran dagiti nakaro a sakit.

 V’loria

Naaddaanak iti fibromyalgia sipud pay idi agtawenak iti 14. Idi agtawenakon iti 20, naaddaanak pay iti arthritis, lupus, ken Lyme disease. Nagrigat nga aramiden ti amin a kayatko nga aramiden ta kanayonak nga agkakapsut. No dadduma, paralisadoak manipud siket nga agpababa isu a kasapulak ti wheelchair.

Nakarkaro pay ngem iti marikriknak a sakit iti bagik ti pannakariribuk ti panunotko gapu ta saanko a maaramid dagiti simple a banag kas iti panagsurat wenno pananglukat iti garapon. No makitkitak dagiti ubbing a magmagna, malidayanak ta marigatanak a mangaramid iti kasta. Panagriknak, awan serserbik.

Imbag laengen ta adda ti pamiliak a tumultulong kaniak, kasta met dagiti kakabsat iti kongregasion dagiti Saksi ni Jehova a nakaitimpuyogak. Masansan a bisitaendak dagiti kakabsat ket mariknak a saanak nga agmaymaysa. Adda met dagiti mangawis kaniak kadagiti panaglalangen uray no marigatanda a mangibaba ken mangisakay kaniak iti wheelchair-ko ken iti lugan.

Nangnangruna a makatulong kaniak dagiti natataengan iti kongregasion gapu ta maawatanda ti kasasaad ti adda sakitna. Tultulongandak a mangakseptar iti limitasionko ken saanak a makonsiensia no bassit laeng ti maaramidak no ikompara iti sabali. Nakaragragsakak no mapanak makigimong ken mangasaba. (Hebreo 10:25) Kadagita a gundaway a mariknak nga uray no adu ti sakitko, awan ti nakaidumaak iti sabsabali.

Kanayonko a laglagipen nga ipaay ni Jehova ti kasapulantayo tapno makapagibtur. Kas pagarigan, kuna ti Biblia nga uray no kumapkapuy ti makinruar a kinataotayo, “mapabpabaro iti inaldaw-aldaw” ti makin-uneg a kinataotayo. (2 Corinto 4:16) Kasta ti marikriknak!

Panunotem: No adda nakaro a sakitmo, apay a napateg nga umasidegka iti sabsabali? No nasalun-atka, kasanom a matulongan ti maysa a masakit?Proverbio 17:17.

 Justin

Natuangak ket diakon nakabangon. Nagkipet ti barukongko ket diakon makagaraw. Intaraydak iti emergency room. Idi damo, saan a matakuatan dagiti doktor no ania ti sakitko. Ngem kalpasan ti adu pay a kasta a pasamak, natakuatanda nga addaanak iti Lyme disease.

Nakaro ti epekto ti Lyme disease iti nervous system-ko. Kinapudnona, nupay adun a tawen sipud natakuatan ti sakitko, agkuykuyegyegak pay laeng, a diak makontrol no dadduma. Adda panawen a nakasaksakit ti bagik wenno dagiti ramayko nga uray la diak maigaraw dagita. Kasla agrunrunoten amin a nagsusuopak.

Pasaray ibagak iti bagik, ‘Apay nga agsakitak idinto ta nakaub-ubingak pay.’ Dayta ti mamagpungtot kaniak. Inaldaw nga agsangsangitak a mangisalsaludsod iti Dios, “Apay nga agsagsagabaak iti kastoy?” Mariknak pay a binaybay-annakon ti Dios. Ngem nalagipko met laeng ni Job iti Biblia. Saan idi a naan-anay a maawatan ni Job no apay a masapul a sanguenna ti nakaad-adu a problema, ngem nagtalinaed a matalek iti Dios. No nabaelan ni Job, kabaelak met.

Dakkel a tulong ti impaay kaniak dagiti panglakayen iti kongregasion. Kanayondak a komustaen. Imbaga kaniak ti maysa a panglakayen a no kasapulak ti kasarita, umawagak laeng kenkuana, aniaman nga oras dayta. Inaldaw nga agyamyamanak ken Jehova ta addaanak kadagiti kasta a gagayyem!Isaias 32:1, 2.

No addaantayo iti nakaro a sakit, malipatantayo no dadduma nga ammo ni Jehova ti mapaspasarantayo. Kuna ti Biblia: “Ipalladawmo ti dadagsenmo ken Jehova a mismo, ket isu saranayennakanto.” (Salmo 55:22) Kasta ti inaldaw nga ar-aramidek.

Panunotem: Kasano a makatulong dagiti mangipatpateg kenka tapno maibturam ti maysa a sakit?Proverbio 24:10; 1 Tesalonica 5:11.

 Nisa

Idi tin-edyerak, nadayagnos nga addaanak iti Marfan syndrome—maysa a kita ti sakit a mangapektar ken mangpakapsut kadagiti nagsusuopan (joints). Mabalin met nga apektaran ti Marfan syndrome dagiti mata, puso, ken dadduma pay a napateg nga organo. Saan met ketdi nga inaldaw nga agut-ot, ngem no sumro, napalalo ti ut-otna.

Idi damo a naammuak dayta, kasta unay ti sangitko. Madanaganak idi ta baka saankon a maaramid dagiti pagaayatko nga aramiden. Kas pagarigan, pagaayatko ti agsala, ket pampanunotek nga addanto aldaw a diakton makasala ken makapagna gapu iti nakaro nga ut-ot. Dayta ti pagbutbutngak a mapasamak.

Nakadungdungngo ni manangko. Tultulongannak a saanko nga ay-ayen ti bagik. Ibagbagana kaniak a saanak koma a mabutbuteng ta dakkel ti epekto dayta iti biagko. Kanayonnak met a parparegtaen nga agkararag ta ni laeng Jehova ti talaga a makaammo ken makatarus iti kasasaadko.—1 Pedro 5:7.

Maparparegtaak unay iti Salmo 18:6, a kunana: “Iti pannakaparigatko immaw-awagak ken Jehova, ket iti Diosko nagpatpatulongak. Manipud templona nangngegna ti timekko, ket ti mismo a panagpatulongko iti sanguananna dimteng ita kadagiti lapayagna.” Tinulongannak dayta a teksto a mangbigbig a no agkararagak ken Ama Jehova ket dawatek a tulongannak nga agibtur, denggennak ken tulongannak. Mariknak a dinak baybay-an.

Naadalko a saan a dakes ti malidayan ken agladingit no maipasangotayo iti trahedia gapu ta normal laeng a mariknatayo ti kasta no la ketdi ta saantayo nga ipalubos a dagita ti mangapektar iti biagtayo ken pannakigayyemtayo iti Dios. Saan nga isu ti makingapuanan kadagiti problematayo, ken dinatayo baybay-an no la ket ta isu ti iyun-unatayo iti biagtayo.Santiago 4:8.

Panunotem: Ti kadi Dios ti mapabasol no agsagabatayo?—Santiago 1:13.

Ammuem ti Ad-adu Pay

Agpatingganto Pay Ngata ti Panagrigrigat?

Kuna ti Biblia a kagura ti Dios ti kinaawan hustisia ken talaga a maseknan kadagiti tattao. Ania ti maipaayna a gunggona?

Ti Dios Kadi ti Makimbasol iti Panagsagabatayo?

Mabalin nga agsagaba ti uray siasino—uray dagidiay patpatgen ti Dios. Apay?

Adda Nakaro a Sakitko—Matulongannak Kadi ti Biblia?

Wen! Ammuem ti tallo nga addang a makatulong kenka a mangibtur iti nakaro a sakit.