Accessibility setting

Agpili iti lengguahe

Mapan iti segundario a pagpilian

Mapan iti linaonna

Dagiti Saksi ni Jehova

Iloko

Apay a Paritandak Dagiti Dadakkelko nga Agragragsak?

Apay a Paritandak Dagiti Dadakkelko nga Agragragsak?

Panunotem ti sumaganad nga eksena:

Kayatmo ti mapan iti maysa a party ngem saanmo a masigurado no palubosandaka dagiti dadakkelmo. Ania kadagiti sumaganad ti aramidem?

  1.  SAANKA NGA AGPAKPAKADAN—MAPANKA LATTAN

  2.  SAANKA NGA AGPAKADA—SAANKA A MAPAN

  3.  AGPAKADAKA TAPNO MAAMMUAM NO PALUBOSANDAKA

 1. SAANKA NGA AGPAKPAKADAN—MAPANKA LATTAN

No apay a mapanunotmo daytoy: Kayatmo nga ipakita kadagiti gagayyemmo a maaramidmon ti kaykayatmo. Iti panagriknam ket nalalaingka ngem kadagiti dadakkelmo, wenno bassit ti panagraemmo iti kapanunotanda.—Proverbio 14:18.

Dagiti resultana: Mabalin nga agbilib dagiti gagayyemmo, ngem adda maammuanda maipapan kenka—kabaelam ti mangallilaw. No kabaelam nga allilawen dagiti dadakkelmo, kabaelam met nga allilawen dagiti gagayyemmo. No maduktalan dayta dagiti dadakkelmo, agsakitto ti nakemda, mapukaw ti talekda kenka, ken posible nga ad-adda nga estriktuandaka!—Proverbio 12:15.

 2. SAANKA NGA AGPAKADA—SAANKA A MAPAN

No apay a mapanunotmo daytoy: Pinagpanunotam ti awis ket naamirismo a maikontra dayta kadagiti prinsipiom wenno saan a nasayaat a kakadua dagiti dadduma a naawis. (1 Corinto 15:33; Filipos 4:8) Iti sabali a bangir, mabalin a kayatmo ti mapan ngem dimo maitured ti agpakada kadagiti dadakkelmo.

Dagiti resultana: No dika mapan gapu ta ammom a saan a nainsiriban dayta, nalaklakakanto nga agilawlawag kadagiti gagayyemmo. No dika mapan gapu laeng ta dimo maitured ti agpakada kadagiti dadakkelmo, agsaksakitto laeng ti nakemmo gapu ta iti panagriknam ket sika laengen ti saan a makapagragragsak.

 3. AGPAKADAKA TAPNO MAAMMUAM NO PALUBOSANDAKA

No apay a mapanunotmo daytoy: Agpaspasakupka kadagiti dadakkelmo ken raraemem ida. (Colosas 3:20) Ay-ayatem ida ken dimo kayat a masaktanda no aglibaska. (Proverbio 10:1) Adda pay gundawaymo nga agilawlawag.

Dagiti resultana: Marikna dagiti dadakkelmo nga ay-ayaten ken raraemem ida. Ket no makitada a nainkalintegan dagiti kiddawmo, nalabit palubosandaka.

No Apay a Saandaka a Palubosan

Kas iti lifeguard iti maysa a resort, ad-adda a makita dagiti dadakkelmo ti peggad

Ti maysa a rason ket mayilustrar iti kastoy: No adda pagpiliam, nalabit kaykayatmo ti aglangoy iti resort nga addaan kadagiti lifeguard. Apay? Ngamin, bayat a maragragsakanka nga aglanglangoy, saanmo a madmadlaw ti peggad. Ngem makita dayta dagiti lifeguard gapu ta addada iti nangatngato a lugar nga agsipsiput iti peggad. Umasping iti dayta, gapu ta ad-adu ti ammo ken kapadasan dagiti nagannak, mabalin a makitada dagiti dimo makita a peggad. Kas kadagiti lifeguard, saan a panggep dagiti dadakkelmo a lapdan ti panagragragsakmo. Tultulongandaka laeng a mangliklik kadagiti peggad a mabalin a mangdadael iti panangtagiragsakmo iti biag.

Daytoy ti sabali pay a rason: Kayatdaka la unay a salakniban dagiti dadakkelmo. Ayat ti mangtigtignay kadakuada a mangpalubos ken saan a mangpalubos kenka no isu ti kasapulan. No adda ipakadam nga aramidem, panunotenda a naimbag no mabalindaka a palubosan ken no maakseptarda dagiti resulta ti panangpalubosda kenka. Palubosandaka laeng no kombinsidoda nga awan ti dakes a mapasamak kenka.

No Kasanom a Magun-od ti Pammalubosda

Ania ti mabalinmo nga aramiden

Agbalinka a napudno: Isaludsodmo iti bagim: ‘Ania a talaga ti rason a kayatko ti mapan? Gapu kadi ta magustuak unay ti maaramid sadiay, wenno kayatko laeng nga awan ti makuna kaniak dagiti gagayyemko? Gapu kadi ta addanto sadiay ti kursonadak?’ No kasta, ibagam ti agpayso kadagiti dadakkelmo. Naglabasanda met daytan ken am-ammodaka unay. Isu a mabalin a matarusanda no ania a talaga ti motibom. Apresiarendanto ti panangibagam iti pudno ket magunggonaankanto iti kinasiribda. (Proverbio 7:1, 2) Ngem no saanka a napudno kadakuada, bumassit ti talekda kenka ken mabalin a saandakan a palubosan.

Umiso a tiempo: Dimo igiddan ti agkiddaw wenno agpakada no kasangsangpet dagiti dadakkelmo manipud iti trabaho wenno no adda madama a pakakumikomanda. Asitgam ida no nalamiis ti uloda ngem saan koma a naladaw unay ti panagpakadam sa dagdagem ida nga agdesision. Saan a kayat dagiti dadakkelmo ti kasta. Agpakadaka a nasaksakbay tapno makapagpanunotda a naimbag.

Detalye: No agpakadaka, saanka nga agilimed. Ibagam amin a detalye a kasapulan a maammuan dagiti dadakkelmo. Saan a kayat dagiti nagannak ti sungbat a “Diak ammo,” nangruna no ti saludsodenda ket: “Siasino ti kakaduam?” “Addanto kadi kaduayo a responsable nga adulto?” wenno “Anianto nga oras a makaawidka?”

Kababalin: Dimo ibilang dagiti dadakkelmo kas kabusor. Panunotem nga isaksakitdaka—ket dayta ti agpayso. No kasta ti panunotem, saanmo nga ipapilit ti kaykayatmo ken nalabit nalaklakam a maala ti riknada.

Ipakitam kadagiti dadakkelmo a manakemkan a mangawat ken mangraem iti desisionda. Apresiarenda no kasta ti aramidem. Ket inton sumaruno nga agpakadaka, dakdakkel ti posibilidadna a palubosandaka.

 

Ammuem ti Ad-adu Pay

Ania ti Rumbeng a Panangmatmatko iti Naikeddeng nga Oras ti Panagawidko?

Saankayo kadi nga agkatunosan iti nagannakmo maipapan iti oras ti panagawidmo? Ammuem no kasano a magun-odam ti ad-adu a wayawaya.

Kasano nga Agbalin a Talaga a Naragsak ti Maysa nga Okasion?

Ania ti maaramidam tapno naballigi ti sumaganad nga okasionyo?