Accessibility setting

Agpili iti lengguahe

Mapan iti segundario a pagpilian

Mapan iti linaonna

Dagiti Saksi ni Jehova

Iloko

SALUDSOD DAGITI AGTUTUBO

Panaggayyem Laeng Wenno Ayat?—Paset 1: Adda Ngata Riknana Kaniak?

Panaggayyem Laeng Wenno Ayat?—Paset 1: Adda Ngata Riknana Kaniak?

Magustuam ti maysa a gayyemmo a dimo kasekso, ket siguradoka a kasta met laeng ti marikriknana kenka. Kanayonkayo ngamin nga agtintinneks, kanayonkayo nga agkadua kadagiti gathering . . . , ken nalawag nga ipakita ti dadduma a teksna a kasla kayatnaka.

Isu a dinamagmo no ania a talaga ti relasionyo tapno maammuam no agpada met laeng ti riknayo. Ti sungbatna? “Gayyemka laeng.”

 Ti epektona

“Kagurak isuna ken kagurak ti bagik! Inaldaw idi nga agtintinnekskami, ken impakitana a talaga a kayatnak. Siempre, natnag ti riknak kenkuana.”—Jasmine.

“Kaduak idi ti maysa a babai nga agtsaperon no agdeyt ti dua a gayyemmi. No dadduma, kaslakam met lang agdedeyt a dua. Kanayonkami nga agsarsarita, sa idi kuan, kanayonkamin nga agtintinneks. Kasla diak maawat idi imbagana nga ibilbilangnak laeng a gayyem ken idi naammuak nga adda met gayam boyfriend-nan.”—Richard.

“Inaldaw a teteksannak ti maysa a baro, ken no dadduma, agin-innangawkami a kayatmi ti maysa ken maysa. Ngem idi imbagak nga adda riknak kenkuana, nagkatawa sa imbagana, ‘Diak pay kayat ti maaddaan iti girlfriend!’ Nabayag a nagsangsangitak.”—Tamara.

Konklusion: No ipapanmo nga espesial ti panaggayyemyo iti maysa a tao sa maammuam nga awan gayam riknana kenka, normal laeng a makaguraka, mabainan, wenno masaktanka pay ketdi. “Nasaktanak unay idi napasamak dayta kaniak,” kuna ti agtutubo a ni Steven. “Nabayag pay sakbay a nasursurok manen ti agtalek iti sabali a tao.”

 No apay a mapasamak

Gapu iti social media ken iti panagteks, nalaka laeng a matnag ti riknam iti maysa nga awan met a talaga ti riknana kenka. Basaem ti kuna ti dadduma nga agtutubo.

“Mabalin a teksannaka ti maysa gapu laeng ta awan ti maaramidna, ngem mabalin a panunotem nga adda riknana kenka. Ket no inaldawen dayta, ipapanmon a talaga nga espesialka kenkuana.”—Jennifer.

“Mabalin a kayat ti maysa ti sumrek iti serioso a relasion, ngem kayat laeng ’tay maysa nga adda kasaritana tapno dumakkel ti kompiansana iti bagina.”—James.

“No makaawat ti maysa iti simple a teks a ‘good night,’ mabalin nga ipapanna nga adda rikna kenkuana ti nangiteks. Ngem posible nga iteks dayta ti maysa uray awan pulos riknana kenka.”—Hailey.

“No mangi-send ti maysa iti smiley, mabalin a nasingpet laeng wenno mabalin nga ang-angaw a mangipakpakita iti romantiko nga interes. No dadduma, ipapan ti makaawat iti smiley a flirting dayta.”—Alicia.

Konklusion: Dimo panunoten nga adda rikna ti maysa kenka gapu laeng ta nasingpet kenka.

Nalaka a sawen ngem narigat nga aramiden? Wen! Kuna ti Biblia: “Ti puso nagulgulib [wenno, mas manangallilaw] ngem iti aniaman a banag ket desperado.” (Jeremias 17:9) Mabalin nga allilawennaka ti pusom a sumrek iti maysa a relasion a kas iti kastilio a naaramid iti darat. Madadael dayta inton mabigbigmo nga imahinasionmo laeng.

 Ti mabalinmo nga aramiden

  • Agbalinka a rasonable. Panunotem a naimbag ti panaggayyemyo. Isaludsodmo iti bagim, ‘Adda kadi nabileg a rason tapno panunotek nga espesial ti panangtrato kaniak ti gayyemko?’ Dimo ipalubos a kontrolennaka ti riknam. Usarem ketdi ti ‘pannakabalinmo nga agrason.’Roma 12:1.

  • Agpanunotka a naimbag. Mabalin nga adda dagiti pagilasinan no apay nga ipapanmo nga adda riknana kenka, ngem agpokuska kadagiti pagilasinan no apay a mabalin a kamalika. Dimo panunoten a gapu laeng ta adda riknam iti maysa a tao, adda metten riknana kenka.

  • Agurayka. Tapno saanka a masaktan, dimo ipalubos a matnag ti riknam iti maysa agingga a saanna nga ibaga a kayatnaka a maam-ammo saan laeng a kas maysa a gayyem.

  • Agbalinka a napudno. Kuna ti Biblia nga adda “tiempo ti panagsao.” (Eclesiastes 3:7) No kayatmo a maammuan no saan laeng a gayyem ti pangibilangan ti maysa kenka, kasaritam. “No saankayo nga agpada iti marikrikna,” kuna ti agtutubo a ni Valerie, “nasaysayaat a masaktanka bassit itan ngem iti ipalubosmo nga agtultuloy ti riknam ket maammuamto nga awan met gayam riknana kenka.”

Konklusion: “Saluadam [wenno, annadam] ta pusom,” kuna ti Proverbio 4:23. No kasla matmatnagen ti riknam iti maysa, ammuem no kasta met laeng ti riknana. Ta no ipalubosmo nga agtubo ti romantiko a rikna iti pusom sakbay nga aramidem dayta, kaslaka la agmulmula iti maysa a bato.

No maammuam nga adda riknana kenka—ket addakan iti husto nga edad tapno maki-boyfriend wenno maki-girlfriend—mabalinmon ti agdesision no kayatmon nga agbalin a mas nadekdekket ti relasionyo. Laglagipem a nalagda ti relasion ti agassawa no agpada nga ipatpategda ti relasionda iti Dios ken no nawayada a mangibaga iti riknada ken napudnoda iti maysa ken maysa. (1 Corinto 7:39) Kinapudnona, sakbay a nagasawada, nasayaat ti panaggayyemda—ket agtultuloy a kasta.Proverbio 5:18.

Ammuem ti Ad-adu Pay

Panaggayyem Laeng Wenno Ayat?—Paset 2: Ipakpakitak Kadi a Kasla Adda Riknak Kenkuana?

Mabalin ngata nga ipapan ti gayyemmo nga adda riknam kenkuana? Basaem dagitoy a tip.