Accessibility setting

Agpili iti lengguahe

Mapan iti segundario a pagpilian

Mapan iti linaonna

Dagiti Saksi ni Jehova

Iloko

SALUDSOD DAGITI AGTUTUBO

Talaga Kadi a Pannakiseks ti Oral Sex?

Talaga Kadi a Pannakiseks ti Oral Sex?

Sigun iti maysa a report ti U.S. Centers for Disease Control and Prevention, agarup kagudua kadagiti amin a nainterbiu nga agtawen iti 15 agingga iti 19 ti nakapadasen iti oral sex (pannakiseks babaen ti ngiwat). “No makisaritaka kadagiti agtutubo [maipapan iti oral sex], ibagada a saan a dakes dayta,” kuna ni Sharlene Azam, ti autor ti libro nga Oral Sex Is the New Goodnight Kiss. “Kinapudnona, saanda nga ibilang dayta kas pannakiseks.”

 Ania ti panagkunam?

Sungbatam dagiti sumaganad a saludsod iti wen wenno saan.

  1. Agsikog kadi ti maysa a babai no maki-oral sex?

    1. Wen

    2. Saan

  2. Adda kadi dakes nga epekto iti salun-at ti pannaki-oral sex?

    1. Wen

    2. Saan

  3. Talaga kadi a pannakiseks ti oral sex?

    1. Wen

    2. Saan

 Ania ti agpayso maipapan iti dayta?

Ikomparam dagiti sungbatmo kadagiti adda iti baba.

  1. Agsikog kadi ti maysa a babai no maki-oral sex?

    Sungbat: Saan. Dayta ti maysa a makagapu nga ibagbaga ti adu nga awan pagdaksanna ti oral sex. Ngem saan nga umiso dayta.

  2. Adda kadi dakes nga epekto iti salun-at ti pannaki-oral sex?

    Sungbat: Wen. Ti maysa a tao a maki-oral sex ket mabalin a maakaran iti hepatitis (A wenno B), genital warts, gonorrhea, herpes, HIV, ken syphilis.

  3. Talaga kadi a pannakiseks ti oral sex?

    Sungbat: Wen. Aniaman nga aramid a pakairamanan ti mabagbagi ti sabali a tao—aktual a pannakiseks (intercourse), oral sex, anal sex (pannakiseks babaen ti kerret), ken panangay-ayam iti mabagbagi (masturbasion) ti sabali a tao—ket maibilang a pannakiseks.

 Apay a pakaseknam?

Usigem ti sumagmamano a teksto iti Biblia nga adda pakainaiganna iti topiko maipapan iti oral sex.

Kuna ti Biblia: “Daytoy ti pagayatan ti Dios, . . . nga adaywanyo ti pannakiabig.”—1 Tesalonica 4:3.

Ti sao iti orihinal a lengguahe a naipatarus kas “pannakiabig” tukoyenna ti amin a kita ti seksual nga aramid iti nagbaetan ti saan nga agassawa, a pakairamanan ti aktual a pannakiseks, oral sex, anal sex, ken panangay-ayam iti mabagbagi ti sabali a tao. Ti tao a makiab-abig wenno makiramraman iti seksual nga immoralidad ket agapit kadagiti nasaem a pagbanagan. Ngem ti kasaeman ket madadael ti pannakigayyemna iti Dios.—1 Pedro 3:12.

Kuna ti Biblia: “Ti mangyugali iti pannakiabig agbasbasol a maikaniwas iti bukodna a bagi.”—1 Corinto 6:18.

Adda dagiti makadadael nga epekto ti oral sex iti pisikal ken naespirituan. Mangriribuk pay daytoy iti emosion. Kuna ti libro a Talking Sex With Your Kids: “Ti pannakarikna nga inusardaka laeng, a dakkel ti babawim, ken nalakaka a nabiktima ket awan pakaidumaanna iti pannakiseks. Ti di umiso a pannakiseks—kas iti pannakiseks iti dimo asawa—ket mabalin a dakes ti epektona iti emosion ti maysa a tao. Kasta met laeng ti epekto ti aniaman a kita ti di umiso a pannakiseks kas iti oral sex. Aniaman a kita ti seks ket seks.”

Kuna ti Biblia: “Siak, ni Jehova, ti Diosmo, Daydiay mangisursuro kenka tapno magunggonaam ti bagim.”—Isaias 48:17.

Mamatika kadi a talaga a mabenepisiaranka kadagiti linteg ti Dios mainaig iti seks? Wenno panagkunam ket malimitaran ti tignaymo gapu kadagita? Tapno masungbatan dagita a saludsod, panunotem ti haywey nga adu ti aglabas a lugan. Adu ti makitam a nakapaskil a karatula kas iti no kasano kapartak ti taray ti lugan, signal ti trapiko, ken karatula a pagsardengan. Ibilangmo kadi dagita a karatula kas restriksion wenno proteksion? Ania ti mapasamak no saanmo nga ikankano dagita ken uray ti dadduma a drayber?

Dagiti paglintegan iti trapiko limitaranda ti wayawayam, ngem agserbi dagita a proteksionmo. Kasta met, dagiti linteg ti Dios ket mangipaay kadagiti restriksion kenka ngem agpaay a salaknibmo

Kasta met laeng dagiti pagalagadan ti Dios. No saanmo nga ikankano, sigurado nga apitem no ania ti immulam. (Galacia 6:7) Kuna ti libro a Sex Smart: “No ad-adda a paglikudam dagiti patpatiem ken prinsipiom iti biag sa agaramidka kadagiti aktibidad a panagriknam ket saan nga umiso, bumaba ti panagraemmo iti bagim.” Iti kasumbangirna, no agbiagka maitunos kadagiti pagalagadan ti Dios, ipakpakitam ti napudno a nadalus a panagbiag. Malaksid iti dayta, mataginayonmo pay ti nadalus a konsiensia.—1 Pedro 3:16.

Ammuem ti Ad-adu Pay

Ania ti Kuna ti Biblia Maipapan iti Homoseksualidad?

Ania ti panangmatmat ti Dios maipapan iti homoseksual nga ar-aramid? Ti kadi maysa nga agduyos iti kapadana a sekso maay-ayona ti Dios?

Dakes Kadi ti Panagdenna Sakbay ti Kasar?

Basaem ti kuna ti Biblia maipapan iti panagdenna sakbay ti kasar ken iti dadduma pay a kita ti seksual a kinalailo.