Accessibility setting

Agpili iti lengguahe

Mapan iti segundario a pagpilian

Mapan iti linaonna

Dagiti Saksi ni Jehova

Iloko

SALUDSOD DAGITI AGTUTUBO

Nakasaganaak Kadin a Pumanaw iti Poder ti Nagannakko?

Nakasaganaak Kadin a Pumanaw iti Poder ti Nagannakko?

Orihinal a panggep ti Dios a dagiti agtutubo ket agmataengan ken inton agangay, panawanda dagiti nagannakda ken maaddaanda iti bukod a pamilia. (Genesis 2:23, 24; Marcos 10:7, 8) Ngem kasanom nga ammo no talaga met laeng a nakasaganakan? Usigem ti tallo a saludsod.

 Apay a kayatko ti sumina?

Kitaem ti sumaganad a listaan. Isaludsodmo iti bagim, ‘Ania dagiti kangrunaan a rason a kayatko ti pumanaw iti poder ti nagannakko?’

  • Itarayak dagiti problema iti pagtaenganmi

  • Nawaywayaak a mangaramid iti kayatko

  • Sumayaat ti panangmatmat kaniak ti gagayyemko

  • Kaduaek ti agkasapulan a gayyemko

  • Agboluntarioak nga agtrabaho iti sabali a lugar

  • Umadu ti kapadasak

  • Maksayan ti paggastuan ti nagannakko

  • Dadduma pay

Saan met ketdi a kanayon a di umiso dagiti nadakamat. Ti saludsod ket, Apay a kayatmo ti sumina? Kas pagarigan, no kayatmo la nga itarayan dagiti problema iti pagtaenganyo, maklaatkanto la ketdi!

Adu ti nasursuro ni Danielle iti sumagmamano a tiempo nga isisinana iti pagtaenganda idi agtawen iti 20. Kunana: “Adda latta dagiti ditay maaramid. No bukbukodmon, dimo maaramid ti amin a kayatmo gapu iti eskediulmo iti trabaho wenno kurang ti kuartam.” Dika ngarud agdarasudos nga agdesision a pumanaw iti poder ti nagannakmo gapu iti panangdurog ti sabsabali.Proverbio 29:20.

 Nakasaganaak kadin?

Ti isisina iti poder ti nagannakmo ket mayarig iti panagpasiar iti kabakiran—adda pay dagiti nasken a sursuruem sakbay nga aramidem dayta

Ti isisina iti poder ti nagannakmo ket mayarig iti panagpasiar iti kabakiran. Mapanka ngata sadiay no dimo pay ammo ti agipatakder iti tolda, agpasged, agluto, wenno agbasa iti mapa? Siempre saan! Ngem adu nga agtutubo ti sumina uray no bassit pay ti ammoda kadagiti trabaho iti balay.

Kinuna ti masirib a ni Ari Solomon a ti masirib wenno “nasaldet utobenna dagiti addangna.” (Proverbio 14:15) Tapno matulonganka a mangammo no nakasaganakan a sumina, usigem dagiti sumaganad:

Panagbadyet: “Diak pay pulos napadasan ti nagbayad kadagiti paggastosan,” kuna ti 19 anyos a ni Serena. “Mabutengak a sumina iti pagtaengan ken mangibadyet iti kuartak.” Kasano a masursurom ti agbadyet?

Kuna ti maysa a proverbio iti Biblia: “Ti masirib a tao umimdengto ken gumun-od iti ad-adu pay a pammilin.” (Proverbio 1:5) Mabalinmo a damagen iti nagannakmo no mano ti binulan a magasto ti maysa a tao para iti taraon, lugan, plete, ken pagtinnag wenno abang ti balay. Kalpasanna, agpaisuroka kadakuada no kasano ti agbadyet ken no kasano ti agbayad kadagiti paggastuam.

Panagtrabaho iti balay: Kinuna ti 17 anyos a ni Brian a ti kabusbusorna a trabaho no suminan ket ti panaglaba. Kasano a maammuam no kabaelamon nga aywanan ti bagim? Kastoy ti singasing ti 20 anyos a ni Aron: “Iti makalawas, padasem ti agbiag a kasla agbukbukodka. Usarem ti kuartam a makitienda ken sika ti agluto iti kanem. Sika metten ti aglaba ken agplantsa iti badom. Sika payen ti agdalus iti balayyo. Padasem ti mapan kadagiti papanam a dikan agpaitulod wenno agpasukon.” No aramidem dagita, adda dua a masursurom: (1) Masanayka kadagiti napateg a trabaho, ken (2) ad-adda a maapresiarmo ti ar-aramiden dagiti nagannakmo.

Makipulapol: Makatunosam kadi ti nagannak ken kakabsatmo? No saan, nalabit pagarupem a maymayat nga agnaedkan iti sabali a kaduam ti maysa a gayyem. Mabalin a kasta ngem usigem ti kuna ti 18 anyos a ni Eve: “Dua kadagiti gagayyemko ti nagtulag nga agkaserada iti maymaysa nga apartment. Sakbay dayta, nakasingsingedda nga aggayyem, ngem idi maymaysan ti pagnaedanda, dida metten agkatunosan. Naurnos ti maysa idinto ta nakawarwara met ti kaduana. Ti maysa ket aktibo nga agserserbi iti Dios idinto ta saan unay ti kaduana. Talaga a dida nagkatunosan!”

Ania ti solusion? Kuna ti 18 anyos a ni Erin: “Adu ti masursurom maipapan iti pannakipulapol no addaka pay la iti poder ti nagannakmo. Masursurom ti mangrisut kadagiti problema ken makibagay. Napaliiwko a dagidiay simmina tapno laeng maliklikanda dagiti dida pagkikinnaawatan iti nagannakda nasursuroda nga itarayan dagiti problema imbes a risuten dagita.”

Regular nga agadal iti Biblia ken agdaydayaw iti Dios: Sumina ti dadduma gapu ta kayatda a liklikan dagiti aktibidad a nainaig iti relihion ti nagannakda. Panggep met ti dadduma a manteneren ti regular a panagadalda iti Biblia ken panagdaydayawda iti Dios ngem idi agangay, nabaybay-anda dagita. Kasano a maliklikam ti pannakadadael wenno ‘pannakarba ti pammatim’?—1 Timoteo 1:19.

Mangaramidka iti nasayaat nga eskediul ti panagadalmo iti Biblia ken panagdaydayawmo iti Dios ket surotem dayta. Kitaem no masurotmo dayta iti makabulan uray no didaka palagipan dagiti nagannakmo.

 Ania ti kayatko a maragpat?

Kayatmo kadi ti sumina tapno maitarayam dagiti problema wenno makalapsutka iti autoridad ti nagannakmo? No wen, naipamaysa ti panunotmo iti panawam, saan nga iti papanam. Kayarigam ti agmanmaneho a kumitkita iti likudanna. No ti kitkitaen ti agmanmaneho ket ti pampanawanna, dina makita ti sanguananna. Ania ti punto? Tapno agballigika, saan laeng a ti ipapanawmo ti panunotem. Masapul met nga adda makagunggona a kalat a ragpatem.

Aniaman ti kalatmo, agpanunotka a naimbag. “Dagiti gakat daydiay nasaet sigurado a mangipaay iti pagsayaatan,” kuna ti maysa a proverbio iti Biblia, “ngem tunggal maysa a nadarasudos sigurado nga agturong iti panagkasapulan.” (Proverbio 21:5) Ipangagmo ti balakad ti nagannakmo. (Proverbio 23:22) Ikararagmo dayta ken ikabilangam dagiti nadakamaten a prinsipio ti Biblia.

Ti talaga a saludsod ket saan a, Nakasaganaak kadin a pumanaw iti poder ti nagannakko? no di ket Kabaelak kadin nga asikasuen ti bukodko a sangakabbalayan? No wen ti sungbatmo iti naud-udi a saludsod, nalabit nakasaganakan a sumina.