Mapan iti linaonna

Mapan iti segundario a pagpilian

Dagiti Saksi ni Jehova

Iloko

SALUDSOD DAGITI AGTUTUBO

Kasano a Masursurok nga Akseptaren Dagiti Pagannurotan ti Nagannakko?

Kasano a Masursurok nga Akseptaren Dagiti Pagannurotan ti Nagannakko?

Mabalin nga adda dagiti am-ammom a padam nga agtutubo a sada la agawid no kaykayatda uray nakarabrabiin, maisuotda ti aniaman a kayatda, ken makapanda iti sadinoman ken kaanoman a kayatda a kadua ti gagayyemda. Nalabit okupado unay ti nagannakda isu a didan madmadlaw ti ar-aramiden ti annakda.

Ipakita ti Biblia a saan nga agballigi ti kasta a panangpadakkel iti annak. (Proverbio 29:15) Ti kinaawan ayat a makitkitam iti lubong ket kangrunaanna a maigapu kadagiti managimbubukodan a tattao, nga adu kadakuada ti napadakkel iti pamilia nga awanan iti pagannurotan.​—2 Timoteo 3:1-5.

Imbes nga apalam dagiti agtutubo a mapalubosan a mangaramid iti aniaman a kayatda, ibilangmo dagiti pagannurotan ti nagannakmo kas pammaneknek nga ay-ayatendaka ken maseknanda kenka. Babaen ti panangipaannurotda kadagiti rasonable a limitasion, tultuladenda ni Jehova a Dios a nangibaga iti ilina:

“Pagbalinenkanto nga addaan iti pannakatarus ket isuroka iti dalan a rebbeng a papanam. Mangipaayakto iti balakad a ti matak situturong kenka.”​—Salmo 32:8.