Accessibility setting

Agpili iti lengguahe

Mapan iti segundario a pagpilian

Mapan iti linaonna

Dagiti Saksi ni Jehova

Iloko

SALUDSOD DAGITI AGTUTUBO

Ania ti Rumbeng a Maammuak Maipapan iti Panagteks?

Ania ti Rumbeng a Maammuak Maipapan iti Panagteks?
  • :-) No siaannad a mausar, nagsayaat ti panagteks a pangkomusta iti gagayyem.

  • :-( No di naannad ti pannakausarna, madadaelna ti pannakigayyemmo—ken ti reputasionmo.

Isuro daytoy nga artikulo ti masapul a maammuam maipapan iti

Maammuam pay iti daytoy nga artikulo:

 No siasino ti iteksmo

Ibilang ti adu nga agtutubo a nagpateg ti panagteks iti pannakikomunikar. Makatulong dayta tapno makomustam ti amin nga adda iti contact list-mo—no di iparit ti nagannakmo.

“Saan a kayat ni Tatang no makisaritakami ken ni adingko kadagiti lallaki malaksid no iti landline a telepono, iti sala, ken no adda kakaduami.”—Lenore.

Ti rumbeng a maammuam: No kumporme lattan ti pangtedam iti numero ti selponmo, agproblemakanto.

“No dika naannad no siasino ti pangtedam iti number-mo, posible a makaawatka kadagiti mensahe wenno ladawan a dimo kayat.”—Scott.

“No kanayon a kateksmo ti dimo kasekso, naglaka a matnag ti riknam kenkuana.”—Steven.

Ti kuna ti Biblia: Makita ti manakem ti dumteng a riribuk ket liklikanna.” (Proverbio 22:3, Ti Baro a Naimbag a Damag Biblia) No agannadka, maliklikam ti adu a problema.

Kapadasan: Adda lalaki a gayyemko a kanayon a kateksko. Nasingedkami ngamin nga aggayyem. Diak impagarup a problema dayta agingga nga imbagana a natnagen ti riknana kaniak. No lagipek ti napalabas, naamirisko a diak koma nakikadua—ken nakitinneks kenkuana—a kas iti kasansan ti inaramidko.—Melinda.

Panunotem: Panagkunam, ania ti epekto ti panagpudno dayta a lalaki iti pannakigayyem ni Melinda kenkuana?

No sika ti masurot: Ania koma ti rumbeng nga inaramid ni Melinda tapno nagtalinaedda laeng nga aggayyem?

 No ania ti iteksmo

Naglaka ti agi-send kadagiti mensahe—ken makaparagsak ti makaawat iti kasta—ngem naglaka a malipatan a mabalin a sabali ti pangipapananda iti inteksmo.

Ti rumbeng a maammuam: Dagiti iteksmo ket mabalin a sabali ti pangipapananda.

“Iti teks, dimo mailasin dagiti emosion ken tono ti boses—uray no napakuyogan iti emoticons wenno text symbols. Mabalin nga agduduma ti panangipapanda iti dayta.”—Briana.

“Addada am-ammok a babbai a nadadael ti reputasionda ken agdinamag nga alembong gapu iti inteksda kadagiti lallaki.”—Laura.

Ti kuna ti Biblia: Agpanunot nga umuna ti nalinteg a tao sakbay a sumungbat.” (Proverbio 15:28, Ti Baro a Naimbag a Damag Biblia) Ania ti maadaltayo? Ulitem a basaen ti mensahem sakbay nga i-send-mo!

 No kaano nga agtekska

Usarem ti sentido komonmo tapno makaaramidka kadagiti bukodmo a pagannurotan wenno umiso a kababalin iti panagteks.

Ti rumbeng a maammuam: No dika naannad iti panagteks, agparang nga awan modom ken adaywandaka dagiti gagayyemmo imbes a sumingedda kenka.

“Nalaka a malipatan dagiti umiso a kababalin iti panagteks. No dadduma, agteteksak uray adda kasarsaritak wenno uray madama ti pannanganmi.”—Allison.

“Napeggad ti agteks no agmanmanehoka ta posible a maaksidenteka.”—Anne.

Ti kuna ti Biblia: Iti tunggal banag adda naituding a tiempo, . . . tiempo ti panagulimek ken tiempo ti panagsao.” (Eclesiastes 3:1, 7) Agaplikar met dayta iti panagteks, saan la nga iti panagsao!

 Dagiti singasing iti panagteks

No siasino ti iteksmo

  • ;-) Agtulnogka kadagiti pagannurotan dagiti nagannakmo.Colosas 3:20.

  • ;-) Piliem no asino ti pangtedam iti number-mo. No nadayaw ti panagkedkedmo a mangted iti personal nga impormasion—agraman ti numero ti selponmo—mapatanormo ti abilidad a kasapulam inton adultokan.

  • ;-) Dika agbalin a nasinged unay babaen ti panangi-send kadagiti naalembong a mensahe. No tumanor dagiti romantiko a rikna, agresulta laeng dayta iti pannakapaay ken pannakaupay.

“Gapu ta kanayon a nasayaat ti panangusarko iti selponko, agtalek kaniak ti dadakkelko nga ammok no siasino dagiti rumbeng nga ikabilko iti contact list-ko.”—Briana.

No ania ti iteksmo

  • ;-) Sakbay nga i-type-mo ti mensahem, isaludsodmo iti bagim, ‘Ti kadi panagteks ti umiso a pakikomunikarko iti daytoy a situasion?’ Nalabit nasaysayaat ti tumawag wenno aguray tapno personal a makasaritam dayta a tao.

  • ;-) Dimo iteks ti dimo maibaga iti personal. “No dimo maisao, rumbeng a dimo met iteks,” kuna ti 23 anyos a ni Sarah.

“Ibagam iti nagannakmo no adda mangi-send kenka kadagiti makagargari a ladawan. Proteksion dayta kenka ken umuneg ti panagtalekda kenka.”—Sirvan.

No kaano nga agtekska

  • ;-) Ikeddengmon a nasaksakbay no kaano a dimo usaren ti selponmo. “Diak tugot ti selponko no addaak iti panganan wenno agad-adalak,” kuna ti balasang a ni Olivia. “Iddepek dayta no madama dagiti Nakristianuan a gimong tapno diak masulisog a mangkita.

  • ;-) Agbalinka a nakonsiderar. (Filipos 2:4) Dika agteks no adda sangonsango a kasarsaritam.

“Adda prinsipiok a diak agteks no kakaduak ti gagayyemko malaksid no kasapulan. Diak met ited ti number-ko kadagiti di nasinged kaniak.”—Janelly.

 

Ammuem ti Ad-adu Pay

Saludsod nga Iyimtuod ti Agtutubo, Tomo 1

Ti dadduma kadagiti topiko a nailawlawag ket maipapan iti arak ken droga, seksual a moralidad, pannakideyt ken panaginnarem.