Accessibility setting

Agpili iti lengguahe

Mapan iti segundario a pagpilian

Mapan iti linaonna

Dagiti Saksi ni Jehova

Iloko

SALUDSOD DAGITI AGTUTUBO

Kasanoak Karesponsable?

Kasanoak Karesponsable?

 Graduam ti bagim!

  • Kanayonak, sagpaminsanak, pulos a saanak a

    • napudno

    • mapangnamnamaan

    • managsapsapa

    • nagaget

    • naurnos

    • manangtulong

    • patas

    • managraem

    • nadungngo

  • Ania kadagita ti kangrunaan a galadmo?

    Itultuloymo dayta.Filipos 3:16.

  • Ania kadagita ti masapul a pasayaatem pay?

Ti sumaganad nga impormasion ti makatulong kenka a mangpasayaat iti dayta a galad.

 Ania ti kaipapanan ti panagbalin a responsable?

Ar-aramiden dagiti responsable a tattao dagiti obligasionda iti balay, eskuelaan, ken komunidad. Ammoda a manungsungbatda gapu kadagiti ar-aramidenda. Isu a no agkamalida, aminenda dayta, agpadispensarda, ken ikagumaanda nga ilinteg dayta.

Kuna ti Biblia: “Tunggal maysa awitennanto ti bukodna nga awit.”Galacia 6:5.

 Apay a rumbeng nga agbalinak a responsable?

Nainsiriban nga us-usaren ti maysa a responsable a tao dagiti talentona isu nga ad-adda a mapadayawan, matrato kas adulto, ken maipaayan iti ad-adu a wayawaya ken pribilehio.

Kuna ti Biblia: “Nakakitaka kadi iti tao a nasigo iti trabahona? Iti sanguanan ti ar-ari ti pagsaadannanto.”Proverbio 22:29.

Gagangay a naparabur ti responsable a tao isu nga ad-adda a matagiragsakna dagiti makapnek a pannakigayyem.

Kuna ti Biblia: “Iyugaliyo ti mangted, ket mangtedto kadakayo dagiti tattao.”Lucas 6:38.

Naragsak ti responsable a tao iti maar-aramidanna ken makarikna iti umiso a panangipannakkel a mangpapigsa iti kompiansana iti bagina.

Kuna ti Biblia: “Paneknekan koma ti tunggal maysa no ania ti bukodna nga aramid, ket kalpasanna maaddaanto iti pakaigapuan ti panagrag-o maipapan iti bagina met laeng.”Galacia 6:4.

 Kasano nga agbalinak a mas responsable?

Tapno masungbatam dayta, kitaem dagiti sumaganad. Ania ti kangrunaan a mangdeskribir iti riknam?

“Makapasuron ti matrato a kas ubing a masapul nga inoras nga agpakada kadagiti nagannakna!”—Kerri.

“Diak pulos marigatan nga agpakada kadagiti nagannakko no kayatko ti agpasiar a kadua dagiti gagayyemko.”—Richard.

“No makitkitak ti ar-aramiden dagiti katawenak, pampanunotek: ‘Apay ngata a didak palubosan dagiti nagannakko a mangaramid iti kasta?’”—Anne.

“Gagangay a palpalubosandak dagiti nagannakko a mangaramid iti kayatko. Agyamyamanak kadakuada gapu iti ipapaayda kaniak a wayawaya.”—Marina.

Laglagipem: Adda dagiti agtutubo a maipapaayan iti ad-adu a wayawaya ngem iti sabsabali. Apay ngata?

Realidad: Ti wayawaya a maipapaay kenka ket masansan nga agdepende iti nateggedmo a kadakkel ti talek kenka dagiti nagannakmo.

Kas pagarigan, usigem ti kinuna ti dua nga agtutubo a nadakamaten.

Richard: “Adda idi tiempo nga agpangadua dagiti nagannakko iti abilidadko a mangusar iti wayawaya. Ngem ita, addan panagtalekda kaniak gapu ta responsableak iti panangusarko iti intedda a wayawaya. Kanayon nga ibagak no papanak ken no siasino ti kakaduak. Kinapudnona, gagangay nga ibagbagak kadakuada dagiti planok nga aramiden uray no dida salsaludsoden.”

Marina: “Naminduaak laeng a nagulbod kadagiti nagannakko iti unos ti biagko ket natiliwandak kadagita a gundaway. Sipud idin, kanayonakon a napudno kadakuada. Kas pagarigan, kanayon nga ibagak ti amin nga ar-aramidek, ket awagak ida no awanak idiay balay. Ita, dakdakkelen ti panagtalekda kaniak.”

Ania ti yun-unam—dagiti trabaho iti balay wenno paglinglingayan?

Kayatmo kadi ti matrato a kas kada Richard ken Marina? No wen, sukimatem ti bagim kadagiti sumaganad a kasasaad:

PAGTAENGAN

  • Kanayon kadi nga iringringpasmo dagiti maipatrabaho kenka?

  • Sursurotem kadi ti naited kenka a curfew?

  • Raraemem kadi dagiti nagannak ken kakabsatmo?

No adda man, ania kadagita ti nasken a parang-ayem?

Kuna ti Biblia: “Agtulnogkayo kadagiti nagannak kadakayo.”Efeso 6:1.

EDUKASION

  • Iringringpasmo kadi dagiti homework-mo iti naikeddeng a tiempo?

  • Ikagkagumaam kadi a pangatuen dagiti gradom?

  • Nasayaat kadi dagiti ugalim iti panagadal?

No adda man, ania kadagita ti nasken a parang-ayem?

Kuna ti Biblia: “Ti sirib agpaay a salaknib.” (Eclesiastes 7:12) Ti nasayaat nga edukasion ket makatulong kenka a maaddaan iti sirib.

REPUTASIONMO

  • Napudnoka kadi kadagiti nagannakmo ken iti sabsabali?

  • Responsableka kadi iti panagiggem iti kuarta?

  • Pagaammodaka kadi a mapangnamnamaan?

No adda man, ania kadagita ti nasken a parang-ayem?

Kuna ti Biblia: “Ikawesyo koma ti baro a personalidad.” (Efeso 4:24) Kabaelam a pasayaaten ti kababalin ken reputasionmo.

Singasing: Mangpilika iti kasasaad a masapul a pasayaatem. Makisaritaka kadagidiay mapagwadan iti dayta ken agpabalakadka. Isuratmo dagiti espesipiko a pamay-an no kasanom a mapasayaat dayta a galad ken paliiwem ti irarang-aymo iti makabulan. Isuratmo iti notebook dagiti rimmang-ayam ken dimo naaramidan. Kitaem ti rimmang-ayam iti agtapus ti bulan.

 

Ammuem ti Ad-adu Pay

Saludsod nga Iyimtuod ti Agtutubo, Tomo 1

Ti dadduma kadagiti topiko a nailawlawag ket maipapan iti arak ken droga, seksual a moralidad, pannakideyt ken panaginnarem.