Mapan iti linaonna

Mapan iti segundario a pagpilian

Dagiti Saksi ni Jehova

Iloko

SALUDSOD DAGITI AGTUTUBO

Apay a Napateg ti Panagbalin a Mapagtalkan?

Apay a Napateg ti Panagbalin a Mapagtalkan?

 No apay a saan a mapagtalkan ti dadduma

Iti lubong ita, kasla agparang a lugika no mapagtalkanka. Kastoy ti rason ti dadduma:

  • ‘No diak agulbod kadagiti nagannakko, didakton palubosan.’

  • ‘No diak agkusit iti test, amangan no diak makapasa.’

  • ‘No diak takawen daytoy, masapul nga iyurnongak pay.’

‘Ken ania koma ti pagdaksanna?’ mabalin a kuna ti dadduma. Saan kadi nga agul-ulbod met ti amin?’

Ti sungbat dayta a saludsod ket saan. Patien ti adu a tattao—a pakairamanan ti adu nga agtutubo—a dakkel ti pagsayaatanna ti panagbalin a mapagtalkan, ken adda naimbag a rason. Kuna ti Biblia: “Aniaman nga imulmula ti maysa a tao, daytoyto met ti apitenna.” (Galacia 6:7) Iti sabali a pannao, kanayon nga adda ibunga dagiti ar-aramidentayo—mabalin a pagimbagan wenno pagdaksan.

Kas pagarigan, usigem ti sumagmamano a dakes a resulta ti panagulbod.

“Nagulbodak ken Mommy maipapan iti pannakisaritak iti maysa a lalaki. Adda nalawag nga ebidensiana a saanak nga agsasao iti pudno. Iti maikatlo a panagulbodko maipapan iti daytoy, napunnuanen ni Mommy. Dua a lawas nga inistriktuandak ken makabulan a pinaritandak a mangusar iti selponko wenno agbuya iti TV. Diakon inulit pay ti nagulbod kadagiti nagannakko!”—Anita.

Panunotem: Apay a mabalin a saan a kaskarina a mapasubli ni Anita ti panagtalek ni Mommy-na?

Kuna ti Biblia: “Ita ta inwaksiyon ti kinaulbod, sawenyo ti kinapudno tunggal maysa kadakayo iti padana a tao.”—Efeso 4:25.

“Nagulbodak kadagiti nagannakko ket impagarupko no malusotak dayta. Idi agangay, kayatda manen nga ibagak no ania a talaga ti napasamak. Nakaad-adayo dayta iti agpayso ta diak payen malagip dagiti detalye ti inyestoriak. No ibagamon a dagus ti kinapudno, saanka nga agproblema iti kasta!”—Anthony.

Panunotem: Kasano koma a naliklikan ni Anthony dayta a nakababain a situasion?

Kuna ti Biblia: “Dagiti ulbod a bibig nakarimrimonda ken Jehova, ngem dagidiay agtignay iti kinamatalek makaparagsakda kenkuana.”—Proverbio 12:22.

“Adda gayyemko a nalaing nga agaramid iti estoria. Sobraan wenno kissayanna dagiti detalye. Magustuak isuna ken ikagkagumaak a saanko nga ikkan iti kaipapanan dagiti ibagbagana. Ngem nagrigat ti mamati wenno agtalek kenkuana.”—Yvonne.

Panunotem: Kasano a mabalin a maapektaran ti reputasion ti gayyem ni Yvonne gapu iti aglablabes ken saan a madmadlaw a panagulbodna?

Kuna ti Biblia: “Kayatmi ti agbiag a mapagtalkan iti amin a bambanag.”—Hebreo 13:18.

Ti nagbirri a pundasion pakapuyenna ti intero a patakder; kasta met, ti panagulbod pakapsutenna ti nasayaat a reputasion

 No apay a pagsayaatan ti panagbalin a mapagtalkan

Ita, usigem ti sumagmamano a nasayaat nga ibunga ti panagbalin a mapagtalkan.

“Naregreg ti kuarta ti magmagna a babai nga adda iti sanguanak. Inayabak ket insublik ti kuarta. Agyamyaman la unay kaniak. Kinunana: ‘Nagsingpetka la ketdin. Manmano ti mangaramid iti kasta.’ Nagmayat ti riknam no adda mangapresiar iti umiso nga ar-aramidem!”—Vivian.

Panunotem: Apay a mabalin a nasdaaw ti babai gapu iti kasta a kinamapagtalkan? Kasano a nabenepisiaran ni Vivian iti kinamapagtalkanna?

Kuna ti Biblia: “Naragsak dagidiay . . . mangar-aramid iti kinalinteg iti isuamin a tiempo.”—Salmo 106:3.

“Ti negosio ti pamiliami ket agdalus kadagiti opisina. No dadduma, bayat nga agdaldaluskami iti maysa nga opisina, makakitakami iti nakawara a sinsilio iti suelo. Ti aramidenmi, ikabilmi ti sinsilio iti kaasitgan a lamisaan. Masuron ti maysa nga empleado gapu iti kinamapagtalkanmi. Kunana: ‘Baria laeng dayta!’ Ngem gapu iti dayta, kanayonen nga agtalek kadakami.”—Julia.

Panunotem: Kasano a ti reputasion ni Julia mainaig iti kinamapagtalkan ket makatulong no agkasapulan iti character reference para iti sabali a trabaho?

Kuna ti Biblia: “Aramidem ti amin a kabaelam a mangiparang iti bagim a naanamongan iti Dios, maysa a mangmangged nga awan ti aniaman nga ibainna.”—2 Timoteo 2:15.

“Ti naawatko a sueldo ket para iti 80 nga oras imbes nga 64 nga oras laeng. Nupay mayat koma nga idulin dayta, diak maaramid. Imbagak dayta iti accounting manager, ket agyamyaman unay. Narang-ay ti kompania, ngem diak kayat nga idulin ti kuarta a kasla tinakawko.”—Bethany.

Panunotem: Basbassit kadi a panagkusit ti panagtakaw iti kompania ngem iti panangtakaw iti maysa a tao?

Kuna ti Biblia: “Ti nasikap a tao nakarimrimon a banag ken Jehova, ngem ti kinasingedna adda kadagidiay napalungdo.”—Proverbio 3:32.

Ammuem ti Ad-adu Pay

SALUDSOD DAGITI AGTUTUBO

Ania ti Aramidem no Adda Sinukirmo a Pagannurotan ti Nagannakmo?

Ammuem dagiti aramidem tapno saan unay nga agunget dagiti nagannakmo.

SALUDSOD DAGITI AGTUTUBO

Kasanoak Karesponsable?

Adda dagiti agtutubo a maipapaayan iti ad-adu a wayawaya ngem iti sabsabali. Apay ngata?

SALUDSOD DAGITI AGTUTUBO

Kasano ti Panangsangok Kadagiti Kamalik?

Agkamalitay amin, ngem saan nga amin ket makasursuro kadagita.