Mapan iti linaonna

Mapan iti segundario a pagpilian

Dagiti Saksi ni Jehova

Iloko

SALUDSOD DAGITI AGTUTUBO

Ania ti Aramidek Tapno Ikkandak iti Privacy?

Ania ti Aramidek Tapno Ikkandak iti Privacy?
  • Apay a makibibiang dagiti nagannak?

  • Ti mabalinmo nga aramiden

  • Ti kuna dagiti padam nga agtutubo

Apay a makibibiang dagiti nagannak?

Kuna dagiti nagannakmo a pampanunotenda laeng ti pagimbagam. Ngem para kenka, bibianganda ti personal a biagmo. Kas pagarigan:

  • “Alaen no kua ni Daddy ti selponko, sa pilitennak a mangibaga iti password-ko, ken basaenna amin a teksko,” kuna ti tin-edyer a ni Erin. “No agreklamoak, ipapanna nga adda ilimlimedko.”

  • Nasurok bassit a 20 ti edad ni Denise. Kitkitaen no kua ni mamangna ti resibo ti binayadanda iti telepono. “Saggaysaenna a kitaen ti amin a numero, sa damagenna no makinnumero iti dayta, ken no ania ti nagsaritaanmi.”

  • Imbaga ti agtutubo a ni Kayla a binasa ni mamangna ti maysa kadagiti diary-na. “Adu ti insuratko iti dayta maipapan kadagiti marikriknak—uray ti dadduma a maipapan ken Mamang! Insardengkon ti agsurat iti diary kalpasan dayta.”

Konklusion: Responsabilidad dagiti nagannakmo a kitaen ti pagsayaatam, ken saanmo a makontrol ti kinaistrikto ti panangaramidda iti dayta. Kasla agsobsobrada kadin no dadduma? Mabalin. Ngem adda dagiti mabalinmo nga aramiden tapno makissayan dayta.

Ti mabalinmo nga aramiden

Dika agilimed. Iparegta ti Biblia nga ‘agbiagtayo a mapagtalkan iti amin a bambanag.’ (Hebreo 13:18) Agporsegika a mangipakita iti dayta kadagiti nagannakmo. No mas mapagtalkan ken napudnoka kadakuada, mabalin nga ad-adda met nga ikkandaka iti privacy.

Panunotem: Adda kadin dagiti inaramidmo a mangipakita a mapagtalkanka? Tungtungpalem kadi ti naibaga nga oras ti panagawidmo? Adda kadi iseksekretom maipapan kadagiti gagayyemmo? Dimo kadi ibagbaga dagiti ar-aramidem?

“Makisinnabatak iti kayat dagiti nagannakko. Awan ti ilimlimedko maipapan iti mapaspasamak iti biagko. Ibagak kadakuada ti amin a kayatda a maammuan, isu nga agtaltalekda kaniak ken ik-ikkandak iti privacy.”—Delia.

Agan-anuska. Ibaga ti Biblia: “Itultuloyyo a paneknekan no aniakayo.” (2 Corinto 13:5) Kasapulan ti panawen tapno mapaneknekam a mapagtalkanka, ngem saan a sayang dayta.

Panunotem: Napadasan met dagiti nagannakmo ti agbalin a tin-edyer. Panagkunam, ania ti mabalin a koneksion dayta no apay a bibiangandaka?

“Ammok a di malipatan dagiti nagannak dagiti kamalida ket saanda a kayat a mapasamak met dayta kadagiti annakda.”—Daniel.

Agbalinka a mannakaawat. Ikabilmo ti bagim iti saad dagiti nagannakmo. Kuna ti Biblia a ti nasayaat nga asawa a babai “ay-aywananna ti ar-aramid ti sangakabbalayanna” ken ti nasayaat nga ama disiplinaenna dagiti annakna ken isurona ida iti maipapan ken Jehova. (Proverbio 31:27; Efeso 6:4) Awan ti nalaka a pamay-an iti panangaramid iti dayta. Masapul a karaman dagiti nagannakmo iti biagmo.

Panunotem: No maysaka koma a nagannak ket ammom ti situasion dagiti tin-edyer, palubosam kadi ti barom wenno ti balasangmo nga aramidenna lattan ti kaykayatna a dikan agsaludsod?

“No maysaka a tin-edyer, kasla ‘kanayon a biangan’ dagiti nagannakmo ti biagmo. Ngem ita ta nalabsakon dayta a tawen, maawatakon no apay a masapul nga aramiden dayta dagiti nagannak. Ebidensia dayta ti ayatda.”—James.