Accessibility setting

Agpili iti lengguahe

Mapan iti segundario a pagpilian

Mapan iti linaonna

Dagiti Saksi ni Jehova

Iloko

Isardengko Kadin ti Ageskuela?

Isardengko Kadin ti Ageskuela?

Panunotem daytoy

Ania ti ikalikagum ti linteg maipapan iti kapaut ti panageskuela? Nalpasmo kadin dayta? No saanmo a suroten ti balakad ti Biblia nga ‘agpaiturayka kadagiti nangatngato nga autoridad’ ken saanmo a turposen dayta a tukad, maikuna a nagsardengka.—Roma 13:1.

Naragpatmo kadin dagiti kalatmo iti panageskuela? Ania dagiti panggepmo nga ageskuela? Saanmo nga ammo? Masapul nga ammom ta no saan, kaska la naglugan iti tren a dimo ammo no sadino ti papanam. Gapuna, makisaritaka kadagiti dadakkelmo ket sungbatanyo dagiti saludsod iti benneg iti baba a napauluan iti “ Dagiti Panggepko nga Ageskuela.” No saankan nga ageskuela idinto ta saanmo pay a naragpat dagiti kalat a napagnunumuanyo kadagiti dadakkelmo, maikuna a nagsardengka.

Ti panagsardeng nga ageskuela ket mayarig iti itatapuak iti tren sakbay a makadanonka iti papanam

Apay a kayatmon ti agsardeng? Mabalin a ti dua a makagapu ket tapno matulongam ti pamiliam iti pinansial wenno tapno matulongam dagiti sabsabali a mangam-ammo iti Dios. Dagiti managimbubukodan a rason ket mabalin met a tapno maliklikam dagiti eksamen wenno homework. Panunotem ngarud a naimbag ti kangrunaan a rasonmo nga agsardeng—no nainkalintegan wenno managimbubukodan. No agsardengka gapu laeng ta kayatmo a liklikan dagiti problema, maklaatkanto iti mabalin a mapasamak.

Ti panagsardeng nga ageskuela ket mayarig iti itatapuak iti tren sakbay a makadanonka iti papanam. Mabalin a saan a komportable ti tren ken suplado dagiti pasahero. Ngem no tumapuakka iti tren, saanka a makadanon iti papanam ken mabalin a madangranka. Umasping iti dayta, no agsardengka nga ageskuela, mabalin a marigatankanto a makastrek iti trabaho. Ket no makastrekka man, mabalin a nababbaba ti sueldom no idilig iti sueldom koma no nakaturposka.

Isu nga imbes nga agsardengka, siaanus a sanguem dagiti problemam iti eskuelaan. No aramidem dayta, mapatanormo ti panagibtur nga ad-adda a mangisagana kenka a mangsango kadagiti umasping a karit inton adda trabahomon.

 Dagiti Panggepko nga Ageskuela

Ti kangrunaan a panggep ti panageskuela ket tapno nalaklakaka a makastrek iti trabaho a pangsuportam iti bagim ken iti bukodmonto a pamilia. (2 Tesalonica 3:10, 12) Napanunotmo kadin no ania ti kayatmo a trabaho ken no kasano a makatulong ti panageskuelam tapno makapagsaganaka iti dayta a trabaho? Tapno makitam no ti panageskuelam ket iturturongnaka iti umiso a direksion, sungbatam dagiti sumaganad:

  • Ania dagiti paglaingak? (Kas pagarigan, nalaingka kadi a makilangen kadagiti tattao? Nalaingka kadi kadagiti manomano a trabaho wenno iti panagaramid wenno panagtarimaan kadagiti bambanag? Nalaingka kadi a manganalisar ken mangsolbar kadagiti bambanag?)

  • Ania dagiti trabaho a mabalinko a pangipakatan kadagiti paglaingak?

  • Ania dagiti trabaho a mabalinko a serkan iti lugarmi?

  • Ania dagiti ad-adalek ita a makatulong kaniak nga agbirok iti trabaho?

  • Ania dagiti mabalinko a sursuruen nga ad-adda a makatulong kaniak a mangragpat kadagiti kalatko?

Laglagipem a ti kalatmo ket mangiturpos iti kurso a mausarmo. Saan a mabalin nga ageskuelaka lattan iti agnanayon—a kas man la saanmon a kayat ti “dumsaag iti tren” tapno maliklikam dagiti responsabilidad ti maysa nga adulto.

 

Ammuem ti Ad-adu Pay

Saludsod nga Iyimtuod ti Agtutubo, Tomo 1

Ti dadduma kadagiti topiko a nailawlawag ket maipapan iti arak ken droga, seksual a moralidad, pannakideyt ken panaginnarem.