Mapan iti linaonna

TULONG PARA ITI PAMILIA

Pannakisarita iti Annak Maipapan iti Arak

Pannakisarita iti Annak Maipapan iti Arak

“Innem ti tawen ti balasitangmi idi damo a kinasaritami maipapan iti arak. Nasdaawkami ta nagadu gayam ti ammona maipapan iti dayta.”​—Alexander.

 Ti masapul a maammuam

Napateg ti makisarita kadagiti annak maipapan iti arak. Diyo urayen nga agtin-edyer ti anakyo sakbay a kasaritayo. Imbaga ni Khamit, a taga-Russia: “Idi pay koma ubing ti baromi a kinasaritami maipapan iti umiso a panaginum iti arak. Nasursurok ti kinapateg daytoy idi natakuatak a kanayon nga umin-inum iti arak idi agtawen iti 13.”

Apay a pakaseknam dayta?

  • Mabalin a maimpluensiaan dagiti kaklase, adbertismen, ken TV ti panangmatmat ti anakyo iti arak.

  • Sigun iti U.S. Centers for Disease Control and Prevention, ti 11 a porsiento ti amin nga arak iti United States ket in-inumen dagiti menor de edad.

Di ngarud pakasdaawan nga inrekomenda dagiti ahensia a mangas-asikaso iti salun-at nga isuro dagiti nagannak ti maipapan iti arak kadagiti annakda bayat nga ubbingda pay. Kasanoyo nga aramiden dayta?

 Ti mabalinmo nga aramiden

Panunotenyo dagiti mabalin a damagen ti anakyo. Adu ti kayat a maammuan dagiti ubbing, ad-adda manen dagiti in-inauna. Nasayaat ngarud nga isaganayo ti isungbatyo. Kas pagarigan:

  • No kayat ti anakyo a maammuan ti raman ti arak, mabalinyo nga ibaga a ti wine ket kasla naalsem a fruit juice ken ti beer ket medio napait.

  • No kayat ti anakyo a ramanan ti arak, mabalinyo nga ibaga a saan a kabaelan ti bagi ti ubing ti arak. Ibagayo dagiti epektona: Makaparelaks ti arak, ngem no sobra ti inumen ti maysa, mabalin a maulaw, dina ammo ti ar-aramidenna, ken makaibaga kadagiti banag a pagbabawyannanto.—Proverbio 23:29-35.

Agsukimatkayo. Kuna ti Biblia: “Ti masirib agtignay nga addaan pannakaammo.” (Proverbio 13:16) Ammuenyo ti maipapan iti panaginum iti arak ken dagiti linteg ken legal a limitasion mainaig iti arak iti pagilianyo. Iti kasta, nakasaganakayo a mangtulong iti anakyo.

Dakayo ti makisarita maipapan iti dayta. “Mabalin a saan a maawatan dagiti agtutubo ti usar ti arak,” kuna ni Mark, a maysa nga ama iti Britain. “Dinamagko iti walo ti tawenna nga anakko a lalaki no umiso wenno saan ti uminum iti arak. Relaks ken saan a pormal ti panagsaritami isu a nayebkasna ti kapanunotanna.”

No masansan a pagsaritaanyo ti maipapan iti arak, saan a malipatan dayta ti anakyo. Depende iti edad ti anakyo, mabalinyo nga iraman iti saritaanyo maipapan iti arak ti dadduma pay a masursuroda iti biag, kas iti natalged a panagmaneho ken maipapan iti seks.

Agbalinkayo nga ulidan. Dagiti annak ket kasla espongha—masagepsepda ti mapaspasamak iti aglawlawda—ken ipakita dagiti panagsukimat (research) a dagiti nagannak ti nangnangruna a makaimpluensia kadagiti annakda. Kayatna a sawen a no ti kangrunaan a pangpakalmayo wenno pangikkat iti stress-yo ket arak, kasla isursuroyo iti anakyo a ti arak ti sungbat kadagiti problema iti biag. Isu nga agbalinkayo a nasayaat nga ulidan. Siguraduenyo nga usarenyo ti arak iti umiso a pamay-an.

Makasursuro dagiti annakyo iti ulidanyo iti panaginum iti arak