Adu nga ag-boyfriend ken ag-girlfriend ti agli-live-in sakbay nga agkasarda. Kayatda ngamin a kitaen no mayatto met laeng ti panagkaduada no agassawadan. Ken namnamaenda a makatulong dayta tapno agballigi ti panagassawada. Ngem talaga kadi a makatulong ti panag-live-in?

Iti daytoy nga artikulo

•  Ania ti ibaga ti Biblia?

•  Makatulong kadi ti panag-live-in iti panagsaganayo iti panagasawayo?

•  Makatipidkayo kadi no ag-live-in-kayo?

•  Makatulong kadi ti panag-live-in tapno makapilika iti umiso a tao a pakasaram?

•  Adda kadi nasaysayaat nga aramidem?

 Ania ti ibaga ti Biblia?

•   Ibaga ti Biblia a dakes ti panagseks dagiti saan nga agassawa. Kas pagarigan, kunana: “Adaywanyo ti seksual nga immoralidad.” (1 Tesalonica 4:3; 1 Corinto 6:18) Karaman iti dayta ti panagseks dagiti agli-live-in, uray pay no planodan ti agkasar. a No surotenda ti balakad ti Biblia, maliklikanda ti panagsikog sakbay ti kasar ken ti dadduma pay a saan a nasayaat a resulta ti panag-live-in-da.

•   Ti panagasawa ket urnos ti Dios. Idi inrugina dayta, kunana: “Panawanto ti lalaki ti ama ken inana ket makitiponto iti asawana ket agbalindanto a maymaysa a lasag.” (Genesis 2:24) No nagkari ti nobio ken ti nobia iti kasarda, dakdakkel ti tsansana nga agbalin a naragsak ken natibker ti pamiliada.

 Makatulong kadi ti panag-live-in iti panagsaganayo iti panagasawayo?

 Wen kuna ti dadduma. Panagriknada a no agkaduada a mangaramid iti trabaho iti balay ken no mapaliiwda ti ugali ti maysa ken maysa makatulongto dayta iti panagasawada. Ngem ti maysa a kapatgan a tulbek iti naballigi a panagasawa ket ti panagtalinaed a matalek iti maysa ken maysa.

 Kasano a maammuan dagiti agnobio no agtalinaedda a matalek iti maysa ken maysa iti rigat ken nam-ay? Saan a babaen ti panag-live-in a kasla addada iti “trial period” nga ibilangda ti relasionda a kasla disposable cup a mabalinda nga ibelleng. Imbes ketdi, agbalin a natibker ti relasionda no determinadoda nga agtalinaed a matalek iti maysa ken maysa ken agtinnulongda a mangsango kadagiti problemada.

 Laglagipem: Ti panag-live-in ket saan a panagsagana iti panagasawa. Ti agpayso, panagsagana dayta iti panagsina.

 Prinsipio ti Biblia: “Aniaman nga imulmula ti maysa a tao, daytanto met ti apitenna.”—Galacia 6:7.

 Makatipidkayo kadi no ag-live-in-kayo?

 Wen kuna ti dadduma. Sigun iti survey ti Pew Research Center iti United States, uppat iti kada sangapulo nga adulto nga adda ka-live-in-na ti nangibaga nga inaramidda dayta tapno makatipidda. Ngem kalpasan ti sumagmamano a tiempo a panag-live-in-da, adu kadakuada ti nangibaga a saanda pay latta a nakasagana nga agpakasar gapu ta awan ti urnongda.

 Adda pay sabali a saan a nasayaat a resulta ti panag-live-in lalo kadagiti babbai. Kas pagarigan, no agsinada masansan a mapan kadagiti babbai ti responsabilidad a mangpadakkel kadagiti annakda.

 Laglagipem: Aniaman ti maibilang a pagsayaatan ti panag-live-in, adayo nga ad-adu ti saan a nasayaat a resultana.

 Prinsipio ti Biblia: “Siak, ni Jehova a Diosyo, Daydiay mangisursuro kadakayo tapno magunggonaankayo.”—Isaias 48:17.

 Makatulong kadi ti panag-live-in tapno makapilika iti umiso a tao a pakasaram?

 Wen kuna ti dadduma. Ngem “saan a mapanunot dagiti adda ka-live-in-na a narigrigatton para kadakuada ti makisina,” kuna ti libro a Fighting for Your Marriage. Apay? Gapu kadagiti obligasionda a dua, kas iti panangaywan iti pet wenno taraken, renta, wenno baka adda ti anakda. Isu nga uray pay makita ti dadduma nga adda dagiti serioso a banag a dida pagtunosan, marigatandan nga agsina. Ibaga dagiti researcher a pilienda ti saan a makisina gapu ta nasanaydan nga agkadua ken marigatandan a mangaramid iti panagbalbaliw uray no ammoda a pagsayaatanda dayta. b Kuna pay ti libro a Fighting for Your Marriage, “imbes a makisina ti dadduma pilienda lattan ti agpakasar gapu laeng ta mas kombiniente dayta kadakuada.”

 Laglagipem: Imbes a makatulong ti panag-live-in tapno makaaramidka iti nasayaat a desision, narigrigatto para kenka ti mangputed iti saan a nasayaat a relasion.

 Prinsipio ti Biblia: “Makita ti masirib a tao ti peggad ket aglemmeng, ngem agdiretso latta ti awanan kapadasan ket agsagaba.”—Proverbio 22:3.

 Adda kadi nasaysayaat nga aramidem?

 Mabalinmo a maliklikan dagiti saan a nasayaat a resulta ti pannaki-live-in ken dakdakkel ti tsansa nga agballigi ti panagasawayo. Kasano? Surotem dagiti balakad ti Biblia maipapan iti panagasawa. Saanka nga agap-apura ken am-ammuem a naimbag ti planom a pakiasawaan. Aramidem dayta sakbay nga agkaduakayo iti maymaysa a balay kas agassawa. No agpilika iti pakiasawaan, saan laeng koma a ti itsura ti kangrunaan a kitaem. Nasaysayaat no agpadakayo iti prinsipio ken patpatien.

 Naglaon ti Biblia kadagiti balakad a makatulong kenka tapno agbalin a naragsak ken natibtibker ti panagasawayo. c Kas pagarigan, masursurom dagiti prinsipio a makatulong kenka . . .

•   nga agbalin a matalek

•   nga agbalin a nasayaat nga asawa

•   a mangkita kadagiti seniales a saankayto nga agkabagayan kas agassawa bayat nga agin-innammokayo

 Tapo maammuam ti ad-adu pay maipapan kadagitoy a topiko, kitaem ti seksion a “Panagasawa ken Pamilia” iti jw.org.

 Prinsipio ti Biblia: “Inwanwan ti Dios ti pannakaisurat ti intero a Kasuratan ken makagunggona dayta iti panangisuro.”—2 Timoteo 3:16.