Mapan iti linaonna

TULONG PARA ITI PAMILIA

No Kasanom a Kontrolen ti Pungtotmo

No Kasanom a Kontrolen ti Pungtotmo

Adda imbaga wenno inaramid ti asawam a kinaguram, ket ining-ingpenmo dayta. Ngem nadlawna nga adda problema isu a nagdamag kenka. Ad-adda manen a nasuronka. Kasanom a makontrol ti pungtotmo iti kasta a nabara a situasion?

 Ti masapul a maammuam

  • Makaperdi iti salun-at ti panagpungtot. Ipakita dagiti research a no saanmo a makontrol ti pungtotmo, dakdakkel ti posibilidadna a ngumato ti presion ti daram, maaddaanka iti sakit ti puso, depression, ken problema iti sistema ti panagtunaw. Mabalin met a pakaigapuan dayta iti insomnia, nakaro a panagdandanag, sakit iti kudil, ken istrok. Dayta ti makagapu a kuna ti Biblia: “Baybay-am ti unget ket panawam ti pungtot.”​—Salmo 37:8.

  • Makaperdi met iti salun-at ti panagipempen iti gura. Ti gura a maipempen ket kasla sakit iti unegmo a makadangran kenka. Kas pagarigan, posible nga agbalinka a managsuspetsa wenno manangkritikar. No kasta ti kababalinmo, posible nga agbalinka a narigat a pakibagayan ken mabalin a maperdi ti relasionyo nga agassawa.

 Ti mabalinmo nga aramiden

  • Kitaem dagiti nasayaat a kababalin ti asawam. Mangisuratka iti tallo a banag a magusgustuam iti asawam. Ket inton makapungtotka iti inaramidna, panunotem dagiti kababalinna nga insuratmo. Makatulong dayta tapno makontrolmo ti pungtotmo.

    Prinsipio ti Biblia: “Ipakitayo a managyamankayo.”​—Colosas 3:15.

  •  Sursuruem ti agbalin a manangpakawan. Umuna, padasem nga ikabil ti bagim iti kasasaad ti asawam. Makatulong daytoy tapno maaddaanka iti empatia, a dinakamat ti Biblia a “pannakipagmaymaysa ti rikna.” (1 Pedro 3:8) Sa isaludsodmo iti bagim, ‘Nakaro kadi a banag ti pakasursuronak a diakon mapakawan ti asawak?’

    Prinsipio ti Biblia: “Kinapintas . . . ti panangpalabas iti salungasing.”​—Proverbio 19:11.

  • Naasi ken nataktika koma ti panangyebkasmo iti riknam. No agsaoka, tukoyem ti bagim. Kas pagarigan, imbes nga ibagam, “Dimo man lang ikabkabilangan ti riknak. Dimo pay itawag kaniak no sadino ti ayanmo,” ibagam ketdi, “Madanaganak no rabii unayen sa diak ammo no natalgedka met laeng.” No naalumamay ti panagyebkasmo iti riknam, makatulong dayta tapno makontrolmo ti pungtotmo.

    Prinsipio ti Biblia: “Ti panagsaoyo kankanayon koma a mabuyogan iti kinaparabur, natemplaan iti asin.”​—Colosas 4:6.

  •  Dumngegka a naimbag. No naibagamon ti kaririknam, palubosam nga agsao ti asawam ket dika bumalballaet. No nalpasen a nagsao ti asawam, ulitem ti imbagana tapno masiguradom no umiso ti nagawatam. Nagdakkel ti maitulong ti uray panagdengngeg laeng tapno makontrolmo ti pungtotmo.

    Prinsipio ti Biblia: “Masapul a nasiglat no iti panagdengngeg, nainayad no iti panagsao.”​—Santiago 1:19.