Mapan iti linaonna

PANNAKAILAWLAWAG DAGITI BERSIKULO ITI BIBLIA

Salmo 46:10—“Agtalnacayo, ket Ammoenyo a Siac ti Dios”

 “Sumukokayo ket bigbigenyo a siak ti Dios. Maitan-okakto iti tengnga dagiti nasion; maitan-okakto iti intero a daga.”—Salmo 46:10, Baro a Lubong a Patarus.

 “Agtalnacayo, ket ammoenyo a siac ti Dios: maitan-ocacto cadagiti nasnacion, maitan-ocacto ditoy daga.”—Salmo 46:10, Ti Biblia.

Kaipapanan ti Salmo 46:10

 Aw-awisen ti Dios ti amin a tattao nga agdaydayawda kenkuana ken bigbigenda ti kalinteganna a mangituray iti intero a daga. Saan a mailibak ti pannakabalin ken autoridadna, ket masapul a bigbigen dayta ti amin a mayat nga agbiag nga agnanayon.—Apocalipsis 4:11.

 “Sumukokayo ket bigbigenyo a siak ti Dios.” Impatarus ti dadduma a bersion ti Biblia ti umuna a paset daytoy a bersikulo kas “agtalnacayo.” Daytoy ti rason nga ipapan ti adu a dayta ket maysa a bilin nga agbalin a nadayaw wenno agulimek ti maysa iti simbaan. Ngem ti Hebreo a sasao a naipatarus kas “sumukokayo ket bigbigenyo a siak ti Dios” ket bilin a mismo ni Jehova a a Dios kadagiti tattao iti amin a nasion, nga isardengda ti mangkontra kenkuana ken bigbigenda nga isu laeng ti maikari a pagdaydayawan.

 Adda met laeng kasta a sasao a mabasa iti Salmo 2. Ikarkari ti Dios sadiay a dusaennanto dagiti bumusbusor kenkuana. Ngem dagidiay mangbigbig iti autoridad ti Dios agtalekda iti panangidalan, bileg, ken siribna. Naragsak ken natalged ti riknada uray kadagiti narigat a tiempo ta ‘nagkamangda Kenkuana.’—Salmo 2:9-12.

 “Maitan-okakto iti tengnga dagiti nasion; maitan-okakto iti intero a daga.” Iti napalabas, naitan-ok ni Jehova a Dios idi inusarna ti nagpaiduma a bilegna a mangprotektar iti ilina. (Exodo 15:1-3) Iti masanguanan, naan-anay a maitan-okto inton amin a tattao ditoy daga ket agpasakup iti autoridadna ken agdaydayaw kenkuana.—Salmo 86:9, 10; Isaias 2:11.

Konteksto ti Salmo 46:10

 Ibaga ti maysa a reperensia a ti Salmo 46 ket “maysa a kanta a mangidaydayaw iti pannakabalin ti Dios, ti mannakabalin a manangisalakan iti ilina.” No kankantaen idi ti ili ti Dios ti Salmo 46, iyeb-ebkasda a kabaelan ni Jehova a protektaran ken tulongan ida. (Salmo 46:1, 2) Ipalagip ti sasao ti kanta a kanayon nga adda kadakuada ni Jehova.—Salmo 46:7, 11.

 Tapno bumileg ti panagtalekda a kabaelan ni Jehova a Dios a protektaran ida, aw-awisen ida ti salmo a panunotenda dagiti nakaskasdaaw nga inaramidna. (Salmo 46:8) Espesipiko nga imbagana a kayana a pagsardengen ti gubat. (Salmo 46:9) Idi tiempo ti Biblia, pinagpatingga ni Jehova ti gubat babaen ti panangprotektarna iti ilina kadagiti kalabanda a nasion. Ngem ikarkari ti Biblia nga asidegen a nasaksaknap nga aramiden dayta ti Dios inton pagpatinggaenna ti gubat iti intero a lubong.—Isaias 2:4.

 Tultulongan pay laeng kadi ni Jehova dagiti agdaydayaw kenkuana ita? Wen. Kinapudnona, imparegta ni apostol Pablo kadagiti Kristiano nga agpatulongda Kenkuana. (Hebreo 13:6) Ti sasao a mabasa iti Salmo 46 pabilgenna ti panagtalektayo iti pannakabalin ti Dios a mangprotektar. Matulongandatayo a mangibilang iti Dios kas “kamang ken pigsatayo.”—Salmo 46:1.

 Buyaem daytoy ababa a video tapno makitam ti pakabuklan ti libro dagiti Salmo.

a Jehova ti personal a nagan ti Dios. (Salmo 83:18) Kitaem ti artikulo nga “Asino ni Jehova?