Mapan iti linaonna

PANNAKAILAWLAWAG DAGITI BERSIKULO ITI BIBLIA

Salmo 23:4—“Uray Pay no Ginget ni Patay ti Paglasatak”

 “Uray nakasipsipnget ti pagnaak, awan ti pagbutngak, ta sika ti kaduak; ti baston ken sarukodmo salaknibandak.”—Salmo 23:4, Baro a Lubong a Patarus.

 “Uray pay no ginget ni patay ti paglasatak saanakto nga agbuteng ta addaka kaniak! Ti sarukod ken bastonmo salaknibandak.”​—Salmo 23:4, Ti Baro a Naimbag a Damag Biblia.

Kaipapanan ti Salmo 23:4 a

 Protprotektaran ken ay-aywanan ti Dios dagiti agdaydayaw kenkuana, uray no maipasangoda kadagiti narigat a situasion. Iti daytoy a bersikulo, nailadawan a ti panangaywan ti Dios kadagiti agdaydayaw kenkuana ket kas iti panangaywan ti pastor kadagiti karnerona. b Saanda a marikna nga agmaymaysada iti nakarigrigat a situasion a nailadawan iti daytoy a bersikulo kas nakasipsipnget a lugar a mabalin a pakatayan. Saanda a mabuteng a kasla adda ti Dios iti abayda.

 Idi tiempo ti Biblia, usaren ti pastor ti sarukod wenno bastonna tapno protektaranna ti karnero manipud kadagiti umatake kadakuada. Usarenna met ti bastonna wenno atiddog a kayo nga adda kawit ti murdongna a mangiturong kadagiti karnero wenno mangyadayo kadakuada iti peligro. Ni Jehova a Dios ket kas met iti naayat a pastor a mangprotektar ken mangiturong kadagiti agdaydayaw kenkuana. Uray iti karirigatan a situasion iti biagda, adu ti pamay-an ni Jehova a mangaywan kadakuada.

  •   Isuro ken liwliwaenna ida babaen ti naisurat a Saona, ti Biblia.—Roma 15:4.

  •   Denggenna dagiti kararagda, ik-ikkanna ida iti talna ti panunot ken kalmado a rikna.—Filipos 4:6, 7.

  •   Usarenna dagiti padada nga agdaydayaw kenkuana a mangpabileg iti dadduma.—Hebreo 10:24, 25.

  •   Ikkanna ida iti nakasaysayaat a namnama iti sigurado a masakbayan, nga awanton dagiti mangparparigat kadakuada ita.—Salmo 37:29; Apocalipsis 21:3-5.

Konteksto ti Salmo 23:4

 Ti Salmo 23 ket insurat ni David idi maysa nga agtutubo, ken nagbalin nga ari ti nagkauna a nasion ti Israel. (1 Samuel 17:34, 35; 2 Samuel 7:8) Iti rugrugi ti Salmo, nailadawan ni Jehova kas Pastor a mangiturturong, mangpakpakan, ken mangbangbang-ar kadagiti agdaydayaw kenkuana, kas iti ar-aramiden ti literal a pastor kadagiti karnerona.—Salmo 23:1-3.

 Iti Salmo 23:4, binaliwan ni David ti panangtukoyna iti Dios iti “sika” tapno maitampokna ti panangprotektar ti Dios kenkuana. Ipakita dayta a nakadekdekket ni David ken ni Jehova. Ammo ni David nga ay-aywanan ti Dios isuna ken ammona dagiti problemana isu a saan a mabuteng ni David.

 Iti dua a sumaruno a bersikulo ti Salmo 23, iti bersikulo 5 ken 6, saanen a pastor ken karnero ti nailadawan, no di ket ti nangsangaili ken ti sangaili. Kas iti naayat a mangsangaili, trinato ni Jehova ni David kas madaydayaw a sangaili. Saan a napasardeng uray dagiti kabusor ni David ti panangaywan ti Dios kenkuana. Iti panagleppas ti salmo, inyebkas ni David ti panagtalekna iti Dios nga itultuloyna nga ipakita ti kinaimbag ken ayatna kenkuana bayat a sibibiag.

 Dagiti mangiladawan a sasao a nausar iti Salmo 23, ipakitana nga itultuloy nga ayaten ken aywanan ti Dios dagiti agdaydayaw kenkuana.—1 Pedro 2:25.

a Iti dadduma a Biblia, daytoy a Salmo ket Salmo 22. Uray no 150 amin a Salmo, iti dadduma a Biblia, sinurotda ti Hebrew Masoretic text, iti panangnumeroda kadagiti Salmo. Sinurot met ti dadduma ti Greek Septuagint, ti patarus ti Hebreo a manuskrito a nakompleto idi maikadua a siglo B.C.E.

b Ti Dios, nga agnagan Jehova, ket masansan a mailadawan iti Biblia kas naayat a Pastor. Dagiti agdaydayaw kenkuana ket nailadawan kas karnero a mangnamnama iti proteksion ken tulongna.—Salmo 100:3; Isaias 40:10, 11; Jeremias 31:10; Ezekiel 34:11-16.