Mapan iti linaonna

PANNAKAILAWLAWAG DAGITI BERSIKULO ITI BIBLIA

Roma 15:13—“Sapay Koma ta ti Dios a Paggapuan ti Namnama Punnoennakayo iti Amin a Rag-o ken Talna”

 “Sapay koma ta ti Dios a mangted iti namnama punnuennakayo iti kasta unay a ragsak ken talna gapu ta nagtalekkayo kenkuana, tapno dumakkel ti namnamayo babaen ti pannakabalin ti nasantuan nga espiritu.”—Roma 15:13, Baro a Lubong a Patarus.

 “Sapay koma ta ti Dios a paggapuan ti namnama punnoennakayo iti amin a rag-o ken talna iti pammatiyo kenkuana tapno dumakkel a dumakkel ti namnamayo iti pannakabalin ti Espiritu Santo.”—Roma 15:13, Ti Baro a Naimbag a Damag Biblia.

Kaipapanan ti Roma 15:13

 Ipakita dagitoy a sasao ni apostol Pablo ti tarigagayna a mapno koma dagiti kapammatianna iti “rag-o ken talna.” Konektado dagitoy a nasayaat a kualidad iti namnama nga ited ti Dios ken ti pannakabalin ti nasantuan nga espiritu.

 Maammuantayo ti namnama nga ited ti Dios iti naisurat a Saona, ti Biblia. Sigun iti Roma 15:4, “amin a naisurat [iti Biblia] ket nasaksakbay a naisurat a pakasursuruantayo, tapno maaddaantayo koma iti namnama babaen ti panagibturtayo ken babaen ti liwliwa manipud iti Kasuratan.” Ibaga ti Biblia ti kari ti Dios a solbarenna dagiti problema a mangpukpukaw iti namnama ita, kas iti kinarigat ti biag, kinaawan hustisia, sakit, ken ipapatay. (Apocalipsis 21:4) Usaren ti Dios ni Jesu-Kristo a mangtungpal kadagitoy a kari, isu a manamnamatayo ti nasaysayaat a masakbayan.—Roma 15:12.

 “Dumakkel” wenno “aglippias” ti inted-Dios a namnamatayo no agtalektayo kenkuana. No ad-adu ti ammotayo maipapan iti Dios, ad-adda met nga agbalin a naan-anay ti panagtalektayo kenkuana. (Isaias 46:10; Tito 1:2) Gapu iti mapagtalkan a namnama nga ited ti Dios, ti maysa a tao ket mabalin a makarikna iti ragsak ken talna uray no agpaspasar iti rigat.—Roma 12:12.

 Ti talna, rag-o, ken namnama ket konektado met iti “nasantuan nga espiritu,” ti aktibo a puersa ti Dios. * Us-usaren ti Dios ti nasantuan nga espiritu a mangtungpal kadagiti karina ken mangted iti namnama. Makatulong met daytoy nga espiritu tapno maaddaan dagiti tattao kadagiti nasayaat a kualidad, a kas iti rag-o ken talna.—Galacia 5:22.

Konteksto ti Roma 15:13

 Ti libro a Roma ket surat a para kadagiti Kristiano nga agnanaed iti siudad ti Roma. Dadduma a Kristiano sadiay ket nagtaud iti Judio a pamilia, dadduma met ket saan. Pinaregta ni Pablo ti amin nga ikagumaanda ti agkaykaysa iti panunot ken aramid uray no agdudumada iti kapadasan, kasasaad, ken kultura.—Roma 15:6.

 Impalagip ni Pablo kadagiti Kristiano idiay Roma a nabayagen nga imbaga ti Dios a dagiti tattao iti amin a nasion ket agkaykaysanto nga agdaydayaw Kenkuana. Kas pammaneknek iti dayta, namimpat a nagkotar ni Pablo manipud iti Hebreo a Kasuratan. * (Roma 15:9-12) Daytoy ti puntona: Saan laeng a dagiti Judio ti magunggonaan iti ministerio ni Kristo, uray met dagiti tattao iti amin a nasion. Agpada a namnama ti inted ti Dios kadagita a dua a grupo. Isu nga amin a paset iti kongregasion idiay Roma, aniaman ti kapadasan wenno kasasaadda iti biag, ket masapul nga ‘awatenda ti maysa ken maysa,’ kayatna a sawen, ipakitada ti kinaimbag ken kinamanagpadagus iti maysa ken maysa.—Roma 15:7.

^ Para iti ad-adu pay nga impormasion, basaen ti artikulo nga “Ania ti Nasantuan nga Espiritu?

^ Ti Hebreo a Kasuratan ket maawagan met a Daan a Tulag.