Mapan iti linaonna

PANNAKAILAWLAWAG DAGITI BERSIKULO ITI BIBLIA

Roma 10:13—“Umawag iti Nagan ti Apo”

 “Maisalakanto ti amin nga umawag iti nagan ni Jehova.”—Roma 10:13, Baro a Lubong a Patarus.

 “Ti siasinoman nga umawag iti nagan ti Apo, maisalakanto.”—Roma 10:13, Naimbag a Damag Biblia.

Kaipapanan ti Roma 10:13

 Awan ti idumduma ti Dios, ken ik-ikkanna ti amin a tattao iti gundaway a maisalakan ken maaddaan iti agnanayon a biag, aniaman ti nasionalidad, puli, wenno kasasaadda iti biag. Ngem tapno magunggonaantayo, masapul nga umawagtayo iti nagan ni Jehova, ti personal a nagan ti Mannakabalin-amin a Dios. aSalmo 83:18.

 Iti Biblia, ti sasao nga “umawag iti nagan ni Jehova” ket saan laeng a basta panangammo iti nagan ti Dios ken panangusar iti dayta iti panagdaydayaw. (Salmo 116:12-14) Ramanen dayta ti panagtalek iti Dios ken panagpatulong kenkuana.—Salmo 20:7; 99:6.

 Napateg ken Jesu-Kristo ti nagan ti Dios. Dagiti umuna a sasao iti modelo a kararagna ket: “Amami nga adda iti langit, masantipikar koma ti naganmo,” wenno mapagbalin a nasantuan. (Mateo 6:9) Impakita met ni Jesus a masapul nga am-ammuen, agtulnog, ken ayatentayo ti Persona nga irepresentar dayta a nagan no kayattayo ti maaddaan iti agnanayon a biag.—Juan 17:3, 6, 26.

 Apay a maibagatayo a ni Jehova ti “Apo” a nadakamat iti Roma 10:13 iti Naimbag a Damag Biblia? Gapu ta nakotar dayta a bersikulo iti Joel 2:32. Iti orihinal a Hebreo, b nausar ti nagan ti Dios iti dayta a bersikulo, saan a ti titulo nga “Apo.”

Konteksto ti Roma 10:13

 Iti Roma kapitulo 10, ipakita ti Biblia a ti nasayaat a relasion ti maysa a tao iti Dios ket nakadepende iti pammatina ken Jesu-Kristo. (Roma 10:9) Suportaran daytoy ti sumagmamano a bersikulo manipud iti pagaammo a Daan a Tulag. Maipakita ti maysa a tao ti pammatina babaen ti ‘panangipakaammona iti dayta iti publiko,’ a pakairamanan ti panangikasabana iti naimbag a damag maipapan iti pannakaisalakan kadagiti saan a manamati. Kas resultana, maaddaan ti sabsabali iti gundaway a mangpatanor iti pammati nga agturong iti biag nga agnanayon.—Roma 10:10, 14, 15, 17.

Basaen ti Roma kapitulo 10 ken dagiti footnote ken cross reference.

a Agparang ti nagan ti Dios iti agarup 7,000 a daras kadagiti nagkauna a manuskrito ti Biblia. Iti Hebreo, ti nagan ti Dios ket uppat a letra laeng a naawagan iti Tetragrammaton. Iti Iloko, naipatarus dayta kas “Jehova.” Ngem kaykayat ti dadduma nga eskolar nga usaren ti “Yahweh.”

b Mabalin nga inusar dagiti Kristiano a mannurat iti Biblia ti nagan ti Dios idi nagkotarda kadagiti bersikulo iti “Daan a Tulag” a naglaon iti nagan ti Dios. Kuna ti The Anchor Bible Dictionary: “Adda dagiti ebidensia nga idi damo a naisurat dagiti dokumento ti Baro a Tulag, ti Tetragrammaton, ti Nagan ti Dios a Yahweh, ket nagparang iti dadduma wenno iti amin a teksto iti Baro a Tulag a nakotar iti Daan a Tulag.” (Volume 6, panid 392) Para iti kanayonan nga impormasion, kitaem “Ti Nagan ti Dios iti Kristiano a Griego a Kasuratan” iti Apendise A5 ti Baro a Lubong a Patarus ti Nasantuan a Kasuratan. Makita ti listaan dagiti patarus ti Biblia a nangusar iti nagan ti Dios iti Roma 10:13 iti Appendix C2 ti New World Translation of the Holy Scriptures (study edition).