Mapan iti linaonna

PANNAKAILAWLAWAG DAGITI BERSIKULO ITI BIBLIA

Josue 1:9—“Pumigsaka ken Tumuredka”

 “Imbilinko kenka a papigsaem ti pakinakemmo ken bumilegka. Dika agdanag wenno agbuteng ta ni Jehova a Diosmo ket adda kenka iti sadinoman a papanam.”—Josue 1:9, Baro a Lubong a Patarus.

 “Laglagipem ti bilinko: ‘Pumigsaka ken tumuredka. Dika agbuteng wenno maupay, ta siak ti APO a Diosmo, addaak latta kenka iti sadinoman a papanam.’”—Josue 1:9, Naimbag a Damag Biblia.

Kaipapanan ti Josue 1:9

 Babaen kadagitoy a sasao, impasigurado ni Jehova a a Dios iti matalek nga agdaydayaw kenkuana a ni Josue, nga uray maipasango kadagiti narigat a situasion ken dadakkel a problema ‘pumigsa ti pakinakemna ken bumileg.’ Awan ti rason ni Josue nga agbuteng kadagiti maipasango kenkuana no agtulnog kadagiti bilin ti Dios gapu ta kasla adda ni Jehova iti abayna a tumultulong kenkuana nga agballigi. Impakita ti Dios nga adda ken ni Josue babaen ti panangtedna kadagiti instruksion kenkuana ken tinulonganna a mangabak kadagiti kabusorna.

 Kasano a ‘pumigsa ti pakinakem ken bumileg’ ni Josue? Pumigsa ti pakinakemna ken bumileg no basaenna dagiti impaisurat ni Jehova a Dios nga addan iti daydi a tiempo. Karaman iti dayta ti ‘intero a Linteg nga imbilin kenka [Josue] ni Moises nga adipen [ni Jehova].’ b (Josue 1:7) Imbaga ni Jehova ken Josue, “basaem dayta iti nakapsut a timek [‘pampanunotemto,’ Ti Biblia] iti aldaw ken rabii.” (Josue 1:8) Makatulong ti panangbasa ken panangpanunot ni Josue iti Sao ti Dios tapno pumigsa ti determinasionna a mangaramid iti pagayatan ti Dios. Masapul nga aramiden ni Josue dagiti nasursurona iti Sao ti Dios, tapno ‘masurotna a naimbag ti amin a naisurat iti dayta.’ No aramidenna dayta, makapagtignay a nainsiriban ken agballigi. Ket kasta ti eksakto a napasamak. Uray naipasango kadagiti pakarigatan, naragsak ken kontento ni Josue iti biagna kas matalek nga agdaydayaw ken Jehova.—Josue 23:14; 24:15.

 Makapabileg pay laeng ita dagiti imbaga ni Jehova ken Josue. Ipakitana a talaga a kayat ni Jehova a tulongan ti amin nga agdaydayaw kenkuana lalo no maipasangoda kadagiti pakarigatan. Kayatna nga agballigida a kas ken Josue! ‘Pumigsa ti pakinakem ken bumilegda,’ a kas ken Josue no kanayon a basaen ken panunotenda a naimbag ti Sao ti Dios, ti Biblia, sa aramidenda ti ibilbilinna.

Konteksto ti Josue 1:9

 Idi natayen ni Moises, imbilin ni Jehova nga idauluan ni Josue ti nasion ti Israel. (Josue 1:1, 2) Iti dayta a tiempo, agsagsaganan dagiti Israelita a sumrek iti Naikari a Daga, ti Canaan. Ngem masapul a makilabanda kadagiti nabileg a kabusor. Kas pagarigan, masapul a makigubat ni Josue kadagiti Canaanita, a napalalo unay ti kinadakesda. c (Deuteronomio 9:5; 20:17, 18) Adayo nga ad-adu dagiti Canaanita ngem kadagiti Israelita ken nasanayda a makigubat ken kompleto dagiti armasda. (Josue 9:1, 2; 17:18) Ngem natured ni Josue a nangsurot kadagiti instruksion ni Jehova. Tinulongan ti Dios ni Josue ta iti innem laeng a tawen, inabak dagiti Israelita ti kaaduan kadagiti kalabanda.—Josue 21:43, 44.

a Ti nagan a Jehovah ket Ingles a patarus ti Hebreo a nagan ti Dios—ti uppat a letra a יהוה (YHWH), a maawagan iti Tetragrammaton. Iti Baro a Lubong a Patarus, inusarna met daytoy a porma ti nagan a Jehova. Naipatarus daytoy a nagan nga “APO,” iti daytoy a bersikulo iti Naimbag a Damag Biblia. Ad-adu pay ti maammuam maipapan iti nagan a Jehova ken no apay a saan nga inusar ti dadduma a patarus ti Biblia dayta a nagan iti artikulo nga “Asino ni Jehova?

b Dagiti impaisurat ti Dios nga adda idin ken Josue ken mabasatayo met amin itan iti Biblia ket mabalin a karaman ti lima a libro nga insurat ni Moises (Genesis, Exodo, Levitico, Numeros, ken Deuteronomio), ti libro a Job, ken ti maysa wenno dua a salmo.

c Nailawlawag no apay a kasapulan ti kasta a gubat iti artikulo nga, “Apay nga Imbilin ti Dios ti Pannakigubat Kadagiti Canaanita?” iti Enero 1, 2010, a ruar Ti Pagwanawanan.