Mapan iti linaonna

PANNAKAILAWLAWAG DAGITI BERSIKULO ITI BIBLIA

Genesis 1:26—“Aramidentayo Coma ti Tao iti Ladawantayo”

 “Kalpasanna, kinuna ti Dios: ‘Aramidenta ti tao a kaladladawanta, sigun iti langata, ket iturayanna koma dagiti ikan iti baybay, dagiti agtaytayab a parsua iti tangatang, dagiti naamo nga animal, ti intero a daga, ken ti tunggal agkarkarayam nga animal iti daga.’”—Genesis 1:26, Baro a Lubong a Patarus.

 “Ket ti Dios kinunana, Aramidentayo coma ti tao iti ladawantayo, cas caaspingtayo: ket iturayanda coma dagiti ic-ican ti taaw, ken dagiti tumatayab cadagiti langit ken dagiti an-animal, ken ti amin a daga, ken dagiti amin nga agcarcarayam nga aguy-uyas iti rabaw ti daga.”—Genesis 1:26, Ti Biblia.

Kaipapanan ti Genesis 1:26

 Naparsua dagiti tattao a kaladladawan ti Dios, isu a kayada a sursuruen ken ipakita dagiti kualidad ti Dios, a kas iti ayat, empatia, ken hustisia. Dayta ti makagapu a maikuna a kabaelan dagiti tattao a tuladen ti personalidad ti Dios.

 “Kinuna ti Dios: ‘Aramidenta ti tao a kaladladawanta.’” Sakbay nga inaramid ni Jehova a Dios * ti asinoman wenno aniaman, pinarsuana ti maysa a mannakabalin nga espiritu a naam-ammotayo idi agangay kas ni Jesus. Babaen ken Jesus, “naparsua ti amin a dadduma pay a bambanag idiay langit ken ditoy daga.” (Colosas 1:16) Ti personalidad ni Jesus ket kapada ti personalidad ni Jehova—“isu ti ladawan ti di makita a Dios.” (Colosas 1:15) Umiso ngarud nga imbaga ti Dios ken ni Jesus: “Aramidenta ti tao a kaladladawanta.”

 “Iturayanna koma . . . dagiti naamo nga animal, ti intero a daga.” Dagiti animal ket saan a naparsua a kaladladawan ti Dios. Saanda a nadisenio a kas iti tao a makaipakita kadagiti kualidad a kas iti ayat. Awananda met iti konsiensia. Uray no kasta, sipapanunot ti Dios iti pagimbagan dagiti pinarsuana nga animal. Isu nga imbagana a ti tao “iturayanna” dagiti animal. Mabalin met a maipatarus ti “iturayanna” kas “iwanwanna” (New International Version) wenno “aywananna” (Common English Bible). Intalek ngarud ni Jehova iti tao ti responsabilidad a mangaywan kadagiti animal. (Salmo 8:6-8; Proverbio 12:10) Ekspektaren ni Jehova a dagiti tattao ket agbalin a nasayaat a paraaywan ti daga ken ti amin nga agbibiag iti dayta.

Konteksto ti Genesis 1:26

 Ipakita ti umuna a dua a kapitulo ti Genesis ti panamarsua ti Dios iti uniberso, iti planetatayo, ken iti amin a sibibiag a parsua ditoy daga. Obra maestra ti amin a pinarsua ni Jehova, ngem dagiti tattao ti kasayaatan a pinarsuana ditoy daga. Idi nalpas ti Dios a nagparsua, “nakita ti Dios a nakasaysayaat ti amin nga inaramidna.”—Genesis 1:31.

 Buyaem daytoy ababa a video tapno maammuam ti salaysay ti Genesis maipapan iti panamarsua.

Kamali a Kapanunotan Maipapan iti Genesis 1:26

 Kamali: Dagiti laeng lallaki—saan a karaman dagiti babbai—ti addaan iti abilidad a mangtulad wenno mangipakita kadagiti kualidad ti Dios.

 Husto: Ti katupag ti sao a “tao” iti sabali a lengguahe a kas iti Ingles ket mabalin a tumukoy laeng kadagiti lallaki. Ngem iti daytoy a konteksto, tumukoy ti orihinal a Hebreo a sao iti amin a tao, lalaki man wenno babai. Agpada a kabaelan dagiti lallaki ken babbai nga ipakita dagiti kualidad ti Dios. Agpadada nga addaan iti oportunidad nga umawat iti pabor ti Dios ken iti regalo a biag nga agnanayon.—Juan 3:16.

 Kamali: Adda pisikal a bagi ti Dios a kas kadatayo.

 Husto: “Ti Dios ket maysa nga Espiritu”—kayatna a sawen, saan nga agnanaed iti pisikal nga uniberso. (Juan 4:24) Tukoyen no dadduma ti Biblia nga addaan ti Dios iti rupa, ima, puso ken dadduma pay, ngem dagitoy a sasao ket mangiladawan laeng tapno maawatantayo ti maipapan iti Dios iti pamay-an a matarusan ti tao.—Exodo 15:6; 1 Pedro 3:12.

 Kamali: Paneknekan ti Genesis 1:26 a ni Jesus ti Dios.

 Husto: Kas agama, nakadekdekket ti relasion ti Dios ken ni Jesus, ngem saanda a maymaysa a persona. Insuro ni Jesus a nangatngato ti Dios ngem isuna. (Juan 14:28) Para iti ad-adu pay nga impormasion, buyaem ti video a Ni Jesu-Kristo Kadi ti Dios? wenno basaem ti artikulo nga “Apay a ni Jesus ket Maawagan iti Anak ti Dios?

 Buyaem daytoy ababa a video tapno maammuam ti maipapan iti libro a Genesis.

^ Jehova ti personal a nagan ti Dios. (Salmo 83:18) Kitaem ti artikulo nga “Asino ni Jehova?