Mapan iti linaonna

PANNAKAILAWLAWAG DAGITI BERSIKULO ITI BIBLIA

Filipos 4:13—“Kabaelak a Sarangten ti Aniaman a Banag Babaen [ken] Cristo”

 “Ta adda pigsak a mangsango iti amin a banag gapu iti daydiay mangpabpabileg kaniak.”—Filipos 4:13, Baro a Lubong a Patarus.

 “Kabaelak a sarangten ti aniaman a banag babaen iti pannakabalin nga ited kaniak ni Cristo.”—Filipos 4:13, Ti Baro a Naimbag a Damag Biblia.

Kaipapanan ti Filipos 4:13

 Dagitoy a sasao, nga insurat ni apostol Pablo, ipasiguradona kadagidiay agdaydayaw iti Dios nga umawatda iti pannakabalin wenno pigsa tapno maaramidda ti pagayatanna.

 Sigun iti dadduma a patarus ti Biblia, ni Kristo ti nangted ken Pablo iti pannakabalin. Ngem kadagiti nagkauna a Griego a manuskrito, saan a nausar ti sao a “Kristo” iti daytoy a teksto. Isu nga adu a moderno a patarus ti nangusar iti sasao a “daydiay mangpabpabileg kaniak” (Baro a Lubong a Patarus), “daydiay mamapigsa caniac” (Ti Biblia), ken “daydiay pagtataudan ti pigsak” (New American Bible). Asino ngarud ti tuktukoyen ni Pablo?

 Ipakita ti konteksto a ti Dios ti tuktukoyen ni Pablo. (Filipos 4:6, 7, 10) Iti dayta met la a surat ni Pablo, kinunana kadagiti taga-Filipos: “Ti Dios ti mangpabpabileg kadakayo, nga ipapaayna kadakayo . . . ti pannakabalin a mangaramid iti amin a banag.” (Filipos 2:13) Ken iti 2 Corinto 4:7, insuratna a ti Dios ti nangted kenkuana iti bileg a mangitungpal iti ministeriona. (Ikomparam ti 2 Timoteo 1:8.) Maibagatayo ngarud a ti tuktukoyen ni Pablo a “daydiay mangpabpabileg kaniak” ket ti Dios.

 Ania ti kayat a sawen ni Pablo idi insuratna nga umawat iti pigsa “iti amin a banag”? Ti tuktukoyen ni Pablo ket nalawag a ti nadumaduma a situasion a nakaipasanguanna bayat nga ar-aramidenna ti pagayatan ti Dios. Adu man wenno bassit ti material nga adda kenkuana, nagtalek nga ipaay ti Dios dagiti kasapulanna. Nasursuro ngarud ni Pablo ti makontento iti aniaman a situasion.—2 Corinto 11:23-27; Filipos 4:11.

 Makaparegta ti imbaga ni Pablo kadagiti agdaydayaw iti Dios ita. Ipaay ti Dios ti bileg a kasapulanda tapno makayada dagiti pakasuotan ken maaramidda ti pagayatanna. Mapabileg ida ti Dios babaen ti nasantuan nga espirituna, wenno aktibo a puersana, kasta met dagiti kapammatianda ken ti Saona, ti Biblia.—Lucas 11:13; Aramid 14:21, 22; Hebreo 4:12.

Konteksto ti Filipos 4:13

 Dagita a sasao ket karaman iti konklusion ti surat ni Pablo kadagiti Kristiano idiay Filipos. Insuratna dayta idi agarup 60-61 C.E., bayat ti umuna a pannakaibaludna idiay Roma. Adda idi tiempo a saan a nasuportaran dagiti Kristiano idiay Filipos ti material a kasapulan ni apostol Pablo. Ngem ita, agipatpatuloddan tapno masuportaranda dagiti kasapulan ni Pablo.—Filipos 4:10, 14.

 Naimpusuan a kinomendaran ni Pablo dagiti Kristiano idiay Filipos gapu iti kinaparaburda ken impasiguradona kadakuada nga addan dagiti kasapulanna. (Filipos 4:18) Inusarna met dayta a gundaway tapno ibagana kadakuada ti sekreto ti panagbiag ti maysa a Kristiano: Agbalin a pudpudno a kontento ti amin a Kristiano, nabaknang man wenno pobre, no agdependeda iti tulong ti Dios.—Filipos 4:12.