Mapan iti linaonna

PANNAKAILAWLAWAG DAGITI BERSIKULO ITI BIBLIA

Jeremias 29:11—“Siak Laeng ti Makaammo Kadagiti Planok a Maipaay Kadakayo”

 “‘Ammok ti pampanunotek para kadakayo,’ kuna ni Jehova, * ‘ikkankayo iti talna, saan a didigra, tapno maaddaankayo iti nasayaat a masakbayan ken namnama.’”—Jeremias 29:11, Baro a Lubong a Patarus.

 “Siak laeng ti makaammo kadagiti planok a maipaay kadakayo, planok a mangparang-ay a saan ketdi a mangdidigra, plano a mangibanag kadagiti namnamayo iti masakbayan.”—Jeremias 29:11, Naimbag a Damag Biblia.

Kaipapanan ti Jeremias 29:11

 Inkari ni Jehova a Dios kadagiti agdaydayaw kenkuana nga ipaayanna ida iti natalna a masakbayan. Nupay naisurat dagitoy a sasao para kadagiti tattao idi un-unana, ipakaammo dagita ti pampanunoten ti Dios para kadatayo ita. Isu “ti Dios a mangted iti namnama.” (Roma 15:13) Kinaagpaysuanna, impaisuratna dagita a kari iti Biblia tapno “maaddaantayo koma iti namnama” nga addanto nasaysayaat a masakbayantayo.—Roma 15:4.

Konteksto ti Jeremias 29:11

 Dagitoy a sasao ket paset ti surat a naipatulod kadagiti Israelita a taga-Jerusalem a naipan idiay Babilonia kas adipen. * (Jeremias 29:1) Imbaga kadakuada ti Dios a mabayagdanto a maadipen isu a masapul nga agaramidda kadagiti balay, agmulada, ken agpamiliada. (Jeremias 29:4-9) Ngem imbaga pay ti Dios: “Inton natungpalen ti 70 a tawen a kaaddayo idiay Babilonia, asikasuenkayto ken tungpalekto ti inkarik ket isublikayo iti [Jerusalem].” (Jeremias 29:10) Impasigurado ngarud ti Dios a saanna ida a lipaten ken pumudno ti namnamada a makasubli idiay Jerusalem.—Jeremias 31:16, 17.

 Tinungpal ti Dios ti karina kadagiti Israelita. Kas impadtona, ti Babilonia ket pinarmek ni Ari Ciro ti Persia. (Isaias 45:1, 2; Jeremias 51:30-32) Kalpasanna, pinalubosan ni Ciro dagiti Judio nga agsubli iti dagada. Kalpasan ti 70 a tawen a pannakaadipen, nakaawidda met laengen idiay Jerusalem.—2 Cronicas 36:20-23; Esdras 3:1.

 Ti natungpal a kari iti Jeremias 29:11 ket maysa a garantia kadagidiay mangin-inanama kadagiti kari ti Dios ita. Karaman kadagita a kari ti kaaddanto ti sangalubongan a talna babaen ti Pagarian ti Dios nga iturayan ni Kristo Jesus.—Salmo 37:10, 11, 29; Isaias 55:11; Mateo 6:10.

Di Umiso a Kapanunotan Maipapan iti Jeremias 29:11

 Di Umiso: Adda “plano” ti Dios para iti tunggal tao.

 Umiso: Ipalpalubos ti Dios nga agdesision dagiti tattao no ania ti aramidenda iti biagda. Ti imbagana iti Jeremias 29:11 ket para kadagiti Israelita idiay Babilonia kas maysa a grupo, ket pampanunotenna nga ipaayanna ida iti natalna a masakbayan. (Jeremias 29:4) Ngem impalubos ti Dios nga agpili ti tunggal maysa kadakuada no kayatda ti magunggonaan iti karina wenno saan. (Deuteronomio 30:19, 20; Jeremias 29:32) Dagidiay nagdesision a mangbirok iti Dios naimpusuan a nagkararagda kenkuana.—Jeremias 29:12, 13.

 Di Umiso: Parang-ayen ti Dios ti biag dagidiay agdaydayaw kenkuana.

 Umiso: Ti sao a ‘parang-ayen’ iti Jeremias 29:11 a nausar iti dadduma a Biblia ket naggapu iti Hebreo a sao a kaipapananna ti “talna, salun-at, ken nasayaat a kasasaad.” Sigun iti konteksto, inkari ti Dios a saan a kinabaknang no di ket talna ken nasayaat a kasasaad ti itedna kadagiti Israelita a naipanaw ken naadipen. Agtultuloy ti kaaddada kas maysa a nasion ket addanto aldaw nga agsublida idiay Jerusalem.—Jeremias 29:4-10.

Basaen ti Jeremias kapitulo 29 ken dagiti mangilawlawag a footnote ken cross-reference.

^ Jehova ti personal a nagan ti Dios.—Salmo 83:18.

^ Kuna ti The Expositor’s Bible Commentary maipapan iti Jeremias 29:11: “Maysa daytoy kadagiti kasayaatan a kari a masarakantayo iti Biblia a mangipakita iti nadungngo a pannakipagrikna ni Yahweh [Jehova] kadagita a naipanaw ken naadipen ken kamaudiananna, inikkanna ida iti pudpudno a rason a mangnamnama ken agbalin a positibo.”—Volume 7, panid 360.