Mapan iti linaonna

PANNAKAILAWLAWAG DAGITI BERSIKULO ITI BIBLIA

2 Timoteo 1:7—“Saan nga Espiritu ti Kinatakrot ti Inted Kadatayo ti Dios”

 “Ta ti espiritu nga inted ti Dios kadatayo saannatayo a pagbalinen a takrot, no di ket ikkannatayo iti pannakabalin, ayat, ken nasimbeng a panunot.”—2 Timoteo 1:7, Baro a Lubong a Patarus.

 “Ta saan nga espiritu ti kinatakrot ti inted kadatayo ti Dios, no di ti espiritu a mangted kadatayo iti pannakabalin, ayat, ken kinamanagteppel.”—2 Timoteo 1:7, Ti Baro a Naimbag a Damag Biblia.

Kaipapanan ti 2 Timoteo 1:7

 Matulongan ti Dios ti maysa a tao a situtured a mangaramid iti umiso. Saan a kayat ti Dios nga agpaabak ti asinoman iti “kinatakrot”—ti di nasayaat a panagbuteng a manglapped iti maysa a mangaramid iti bambanag a mangparagsak iti Dios.

 Pagsasaritaantayo ti tallo a kualidad nga inted ti Dios a mabasa iti daytoy a bersikulo a makatulong kadatayo a manglaban iti buteng wenno kinatakrot.

 “Pannakabalin.” Situtured a nakapagserbi dagiti Kristiano iti Dios uray adu dagiti delikado a kalaban ken situasion a nakaipasanguanda. Saanda a nagsanud gapu iti buteng. (2 Corinto 11:23-27) Kasano a naaramidanda dayta? Kastoy ti imbaga ni apostol Pablo: “Ta adda pigsak a mangsango iti amin a banag gapu iti daydiay mangpabpabileg kaniak.” (Filipos 4:13) Maikkan ti Dios dagiti agdaydayaw kenkuana iti “bileg a nalablabes ngem iti gagangay” tapno mapagballigianda ti aniaman a pakarigatan.—2 Corinto 4:7.

 “Ayat.” Ti nauneg a panagayat iti Dios ti tumulong iti maysa a Kristiano a situtured a mangidepensa iti umiso. Kasta met, ti ayat iti pada a tao ti mangtignay iti maysa a Kristiano a mangyun-una kadagiti kasapulan ti dadduma, uray no maipaspasango iti ibubusor wenno peggad.—Juan 13:34; 15:13.

 “Nasimbeng a panunot.” Iti Biblia, ti nasimbeng a panunot gagangay a tumukoy iti abilidad ti maysa a Kristiano a mangaramid kadagiti nainsiriban a desision a naibatay iti Biblia. Ti maysa nga addaan iti nasimbeng a panunot ket makapagpanunot a naimbag ken rasonable latta uray maipaspasango kadagiti narigat a situasion. Makaaramid kadagiti desision a mangipakita iti panagpampanunot ti Dios ta ammona a ti relasionna iti Dios ket napatpateg ngem iti opinion ti dadduma.

Konteksto ti 2 Timoteo 1:7

 Ti libro ti Biblia a Maikadua a Timoteo ket insurat ni apostol Pablo para iti patpatgenna a gayyem ken katrabahuan a ni Timoteo. Iti daytoy a surat, pinaregta ni Pablo ti ub-ubing a ni Timoteo nga itultuloyna ti kinagagetna iti ministerio. (2 Timoteo 1:1, 2) Mabalin a managbabain idi ni Timoteo, ken mabalin a dayta ti nanglapped kenkuana a mangaramid kadagiti masapul nga aramidenna para iti kongregasion Kristiano. (1 Timoteo 4:12) Impalagip ni Pablo ken Timoteo nga immawat iti maysa a sagut—ti espesial nga asaynment a panagserbi iti kongregasion. Pinabilegna ni Timoteo nga agbalin a natured no usarenna ti autoridadna kas manangaywan iti kongregasion, no ikasabana ti naimbag a damag, ken no agib-ibtur iti pakarigatan gapu iti pammatina.—2 Timoteo 1:6-8.

 Nupay dagitoy a sasao ket orihinal a naisurat para ken Timoteo, ipasiguradoda met iti amin a mayat nga agserbi iti Dios ita nga ipaay ti Dios ti kasapulanda a tulong tapno agballigida, aniaman a pakarigatan ti pakaipaspasanguanda.