Accessibility setting

Agpili iti lengguahe

Mapan iti segundario a pagpilian

Mapan iti linaonna

Dagiti Saksi ni Jehova

Iloko

Pagannurotan iti Pannakaprotektar Dagiti Impormasion

Pagannurotan iti Pannakaprotektar Dagiti Impormasion

Resrespetuen ti organisasion dagiti Saksi ni Jehova ti kalintegan ti tunggal indibidual iti kinapribado maibatay kadagiti prinsipio ti Biblia. Bigbigen ti organisasion ti kinapateg ti silulukat a komunikasion ken ti panangala kadagiti personal nga impormasion tapno maipaay ti kasapulan dagiti Saksi ni Jehova ken maibanag dagiti aktibidadda mainaig iti relihion ken iti panangtulongda iti sabsabali. Bigbigenda met a napateg ti panangtaginayon iti kinakompidensial ken ti panangsigurado a maprotektaran a naimbag dagiti impormasion. (Proverbio 15:22; 25:9) Para kadagiti Saksi ni Jehova, nagpateg a banag ti kinakompidensial.Proverbio 20:19.

Nangipaulog ti nagduduma a pagilian kadagiti linteg a mangprotektar kadagiti impormasion tapno masigurado a maprotektaran dagiti kalintegan dagiti indibidual mainaig iti kinapribado. Sakbay pay a naipaulog dagiti kasta a linteg, nabayagen a resrespetuen ti organisasion dagiti Saksi ni Jehova ti kalintegan mainaig iti kinapribado ken nabayagen nga ibilbilangda a nagpateg a banag ti kinakompidensial. Itultuloy a protektaran ti organisasion dagiti Saksi ni Jehova dagiti impormasion a naitalek kadakuada maitunos iti pamay-an a nabayagen nga ar-aramidenda, nga ita ket naisuraten iti daytoy a pagannurotan.

Sakup ti Pagannurotan

Agaplikar daytoy a pagannurotan iti intero nga organisasion dagiti Saksi ni Jehova, nga irepresentar dagiti sanga nga opisina iti nadumaduma a pagilian.

Pannakaprotektar Dagiti Impormasion

Sursuroten ti organisasion dagiti Saksi ni Jehova dagitoy a prinsipio iti panangusar ken panangprosesoda kadagiti personal nga impormasion:

  1. Patas ken maitunos iti linteg ti pannakaproseso dagiti personal nga impormasion.

  2. Maala, maproseso, ken mausar laeng dagiti personal nga impormasion para iti pannakaibanag dagiti aktibidad ti organisasion dagiti Saksi ni Jehova mainaig iti relihion ken iti panangtulongda iti sabsabali.

  3. Umiso ken kanayon a ma-update dagiti personal nga impormasion. No maammuan ti organisasion nga adda kamali nga impormasion, dagus nga ilintegda dayta agingga a posible.

  4. Maidulin laeng dagiti personal nga impormasion agingga a kasapulan iti pannakaibanag ti/dagiti panggep ti organisasion.

  5. Mausig a naimbag dagiti bambanag tapno maprotektaran ti kalintegan dagiti makinkukua iti impormasion.

  6. Adda dagiti maaramid nga addang tapno malapdan ti saan nga autorisado wenno saan a legal a pannakaipakaammo dagiti personal nga impormasion. Dagiti computer a nakaikabilan dagiti personal nga impormasion ket adda password-na a dagiti laeng autorisado ti makaammo. Maiserra dagiti opisina kalpasan ti oras ti trabaho ken dagiti laeng autorisado ti mabalin a sumrek.

  7. Mayakar laeng dagiti personal nga impormasion kadagiti sangay no kasapulan iti pannakaibanag dagiti aktibidad ti organisasion dagiti Saksi ni Jehova mainaig iti relihion ken iti panangtulongda iti sabsabali. No inkeddengen ti maysa ti agbalin ken maam-ammo kas maysa a Saksi ni Jehova, immanamongen iti dayta.

Dagiti Kalintegan Dagiti Makinkukua iti Impormasion

  1. Maitunos iti ar-aramiden dagiti Saksi ni Jehova a naikabil iti daytoy a pagannurotan, maipaay iti makinkukua kadagiti impormasion ti kalinteganna a maprotektaran dagiti personal nga impormasionna ken mailinteg wenno maikkatna dagita.

  2. Asinoman nga adda kiddawna mainaig kadagiti personal nga impormasion ket masapul a mangted iti umdas a pammaneknek iti kinasiasinona.

  3. No kiddawen ti makinkukua iti impormasion a makita wenno mausarna ti personal nga impormasionna wenno mailinteg wenno maikkat dayta, usigen ti organisasion no patganda dayta a kiddaw babaen ti panangadalda a naimbag iti kayat a mapasamak ti makinkukua iti impormasion ken iti mabalin nga epektona dayta iti organisasion. Kas pagarigan, adalenda no mabalin nga agpeligro ti kalintegan ti organisasion mainaig iti wayawaya ti relihion gapu iti dayta a kiddaw.

  4. Kayat ti organisasion a permanente a maidulin dagiti impormasion mainaig iti estado ti maysa nga indibidual kas Saksi ni Jehova. Ti panangikkat kadagita nga impormasion ket maikontra kadagiti patpatien ken aktibidad ti organisasion.

Kalintegan nga Agapelar

No patien ti maysa a saan a naikabilangan ti kalinteganna, mabalinna ti agsurat iti Komite ti Sangay tapno agapelar. Masapul a maipatulod ti surat iti uneg ti dua a lawas kalpasan a napasamak ti pakaigapuan ti panagapelar.