IPAPANTA a nagbiagtayo agarup 3,500 a tawen ti napalabasen. Addatayo iti siudad ti Jerico, iti daga ti Canaan. Agnanaed iti dayta a siudad ti babai nga agnagan iti Rahab. Isu ket nayanak kalpasan ti panangwayawaya ni Moises kadagiti Israelita manipud pannakaadipenda idiay Egipto ken kalpasanna, iti ilalasatda iti namaga a tukok ti Nalabaga a Baybay! Awan ti radio, telebision, wenno Internet, ngem naammuan ni Rahab daytoy a milagro nupay adayo dayta iti pagnanaedanna. Ammom kadi no nakadamaganna iti dayta?— *

Awan duadua a dagiti agdaldaliasat ti nangipadamag kadagita a milagro. Bayat nga agmatmataengan ni Rahab, malaglagipna ti inaramid ni Jehova agpaay kadagiti adipenna. Nadamagna pay ti dadduma a nakaskasdaaw a bambanag maipapan kadagiti Israelita. Kalpasan ti 40 a tawen idiay let-ang, simrekda iti Canaan, ken tinulongan ida ti Dios a mangparmek iti asinoman a bumusor kadakuada. Ita, naammuan ni Rahab a nagkampo dagiti Israelita iti mismo a ballasiw ti Karayan Jordan manipud Jerico!

Maysa a rabii, dua nga estranghero ti napan ken Rahab gapu ta ammoda nga isu ket agtartrabaho iti lugar a mabalin a pagdagusan dagiti bisita. Gapuna, pinasangbayna ida. Iti dayta a rabii, naammuan ti ari ti Jerico nga adda dagiti Israelita nga espia a napan iti pagtartrabahuan ni Rahab. Nangibaon ti ari kadagiti mensahero tapno pairuarda ken Rahab dagiti lallaki a pinasangbayna. Ammom kadi no ania ti naammuanen ni Rahab ken ania ti inaramidna?—

Bueno, sakbay pay a dimteng dagiti mensahero ti ari, naammuanen ni Rahab nga Israelita nga espia dagiti bisitana. Gapuna, inlemmengna ida iti atep, sa kinunana kadagiti mensahero ti ari: “Wen, immay kaniak dagiti lallaki . . . Ket naaramid iti pannakaiserra ti ruangan idi sumipngeten a rimmuar dagiti lallaki.” Indagadag kadakuada ni Rahab: ‘Kamatenyo ida.’

Apay ngata a sinalakniban ni Rahab dagiti espia?— Imbagana kadakuada no apay: “Ammok a ni Jehova sigurado nga itednanto kadakayo ti daga . . . Ta nangngegmi no kasano a pinagmaga ni Jehova ti dandanum ti Nalabaga a Baybay manipud sanguananyo idi rimmuarkayo manipud Egipto.” Nadamagna  pay ti maipapan kadagiti dadduma a panagballigi nga inted ti Dios iti Israel maibusor kadagiti kabusorda.

Sigurado a naay-ayo ni Jehova iti panangsalaknib ni Rahab kadagiti espia, kas kinuna ti Biblia iti Hebreo 11:31. Naay-ayo pay iti impakaasina kadagiti espia: ‘Nagbalinak a naasi kadakayo, isu nga ikariyo koma kaniak nga inton dadaelenyo ti Jerico, ispalenyo da amak ken inak ken dagiti kakabsatko.’ Inkari dagiti espia nga aramidenda dayta no tungpalen ni Rahab dagiti bilinda. Ammom kadi no ania dagita?—

‘Alaem daytoy nalabaga a tali ket igalutmo iti tawayo,’ kuna dagiti espia, ‘ket ummongem amin a kakabagiam iti balayyo. Iti kasta, natalgedto ti amin.’ Inaramid ni Rahab ti amin nga imbilin dagiti espia. Ammom kadi no ania ti simmaruno a napasamak?—

Dimteng dagiti Israelita iti ruar dagiti pader ti Jerico. Maminsan iti kada aldaw a siuulimek a likmutenda ti intero a siudad. Inaramidda dayta iti innem nga aldaw. Iti maikapito nga aldaw, namimpito a linikmutda ti siudad sada nagpukkaw. Narba ti pader—malaksid iti patakder nga ayan ti nalabaga a tali a naibitin iti tawa! Naispal ni Rahab ken ti pamiliada.—Josue 2:1-24; 6:1-5, 14, 15, 20-25.

Ania ti maadaltayo iti inaramid ni Rahab?—Bueno, saanna laeng nga impangag ti damag maipapan kadagiti panangsalaknib ti Dios iti ilina no di ket tinulonganna pay ida idi naikkan iti gundaway. Wen, pinili ni Rahab ti agserbi ken Jehova a kadua ti ili ti Dios! Aramidem met kadi dayta?—Ikarkararagmi nga aramidem koma dayta.