Kanayon nga agtultulnog ni Jesus ken Jehova. (Juan 8:29) Ngem apay ngarud nga ibaga ti Biblia: “Nasursurona ti agtulnog gapu kadagiti sinagabana”?—Heb. 5:8.

Idi adda ni Jesus ditoy daga, napadasanna dagiti situasion a saanna a pulos napadasan idiay langit. Kas pagarigan, pinadakkel dagiti nagannakna a mangay-ayat ken Jehova, ngem imperpektoda. (Luc. 2:51) Nagsagaba iti ima dagiti korap a lider ti relihion ken agtuturay a saan a mangipakpakat iti pudno a hustisia. (Mat. 26:59; Mar. 15:15) Napadasanna met ti nakaut-ut-ot nga ipapatay. Ibaga ti Biblia: “Nagpakumbaba ken nagtulnog agingga iti ipapatayna.”—Fil. 2:8.

Nasursuro ngarud ni Jesus ti agtulnog iti pamay-an a dina pulos nasursuro idiay langit. Gapu iti dayta, nagbalin kas perpekto nga Ari ken Nangato a Padi a naan-anay a makaawat iti kasasaadtayo. (Heb. 4:15; 5:9) Lallalo pay ngarud nga impateg ni Jehova ni Jesus kalpasan a nasursurona ti agtulnog gapu kadagiti sinagabana. Ania ti masursurotayo? Lallalo met nga ipateg ken usarennatayo ni Jehova iti aniaman a kayatna a pangusaran kadatayo no la ket ta agtalinaedtayo a natulnog, uray kadagiti narigat a situasion.—Sant. 1:4.