Nageskuela iti Gilead ti agassawa a Kassholm idi 1979. Sipud idin, “naimulada” wenno naibaonda nga agserbi idiay Iran, Mauritius, Myanmar, Tanzania, Uganda, ken Zaire. Idiay Gilead a nangngegda dayta a pammagbaga ti instruktorda a ni Jack Redford. Nakatulong dayta kadakuada kada adda baro nga asaynment a maawatda. Arigna namin-adu a “naimulada,” “naparut,” ken “naimulada manen.” Ipayestoriatayo kadakuada ti kapadasanda.

Mats ken Ann-Catrin, pangngaasiyo man ta ibagayo no kasanoyo a naammuan ti kinapudno.

Mats: Taga-Poland ni tatangko. Bayat ti Gubat Sangalubongan II, nakitana ti nakaro a panaginsisingpet dagiti Katoliko. Ngem saan a naawanan iti namnama. Masansan nga imbagana, “Adda la ketdi pudno a relihion!” Idi agangay, napaneknekak a husto ni Tatang. Pagay-ayatko idi ti gumatang kadagiti segundamano a libro. Ti maysa kadagita ket ti asul a libro a Ti Kinapudno a Mangiturong iti Biag nga Awan Inggana. Nagustuak ti paulona. Iti dayta met la nga aldaw, binasak dayta iti agpatnag. Kabigatanna, ammok a nasarakakon ti kinapudno!

Sipud idi Abril 1972, adu pay ti binasak a publikasion dagiti Saksi ni Jehova. Gapu iti dayta, nasungbatan dagiti saludsodko maipapan iti Biblia. Panagriknak ket kaslaak iti komersiante iti ilustrasion ni Jesus. Kalpasan a nabirokanna ti maysa a perlas a nangato ti kalidadna, inlakona ti amin nga adda kenkuana tapno magatangna dayta. Arigna “inlakok” met dagiti planok nga ageskuela iti unibersidad ken agbalin a doktor. Inaramidko amin dagita tapno magatangko ti nabirokak a kinapudno a mayarig iti “perlas.” (Mat. 13:​45, 46) Nabautisaranak idi Disiembre 10, 1972.

Iti uneg ti makatawen, inawat met dagiti nagannakko ken ni adingko ti kinapudno ket nagpabautisarda. Idi Hulio 1973, nangrugiakon nga agserbi kas regular pioneer. Adu ti payunir iti kongregasionmi. Maysa kadakuada ti napintas a ni Ann-Catrin. Ay-ayatenna la unay ni Jehova. Natnag ti riknami iti maysa ken maysa ket nagkasarkami idi 1975. Iti simmaruno nga uppat a tawen, nagyankami iti nagpintas ken nabunga a teritoria iti ili ti Strömsund, Sweden.

Ann-Catrin: Naammuan ni tatangko ti kinapudno idi asidegen nga aggraduar iti unibersidad iti Stockholm. Tallo a bulanko pay la idi. Ngem itugtugotnakon  kadagiti gimong ken iti panangasaba. Saan a kayat dayta ni Nanang ket pinadasna a paneknekan a saan a husto dagiti Saksi. Ngem saan a nagballigi. Idi agangay, nagpabautisar met laeng. Idi 13 ti tawenkon, nagpabautisarak, sa nangrugiak nga agpayunir idi agtawenak iti 16. Nagserbiak idiay Umeå ta dakkel ti panagkasapulan sadiay kadagiti agibumbunannag. Kalpasanna, nagbalinak nga special pioneer.

Manipud idi nagkasarkami ken Mats, adda dagiti natulonganmi nga interesado nga immawat iti kinapudno isu a nakaragragsakkami. Maysa kadakuada ti balasitang a ni Maivor. Adda koma gundawayna idi nga agbalin a sikat ken bumaknang gapu iti karerana iti isports. Ngem tinallikudanna dayta. Nagpayunir ketdi. Idi agangay, nagbalin a partnerna ti adingko a babai iti panagpayunir. Nageskuelada iti Gilead idi 1984, ket agingga ita, agserserbida kas misionero idiay Ecuador.

Adu a lugar ti nagserbianyo kas misionero. Ania dagiti inaramidyo tapno masurotyo ti balakad a “dumakkelkayo iti nakaimulaanyo”?

Mats: Masansan a maparutkami iti agdama nga asaynmentmi sa “maimulakami manen” iti sabali nga asaynment. Ngem ikagkagumaanmi ti agtalinaed a “nairamut” ken Jesus. Ar-aramidenmi ti amin a kabaelanmi a mangtulad kenkuana, nangnangruna ti kinapakumbabana. (Col. 2:​6, 7) Kas pagarigan, imbes nga ekspektarenmi a dagiti kakabsat ti makibagay kadakami, talaga nga ikagkagumaanmi a tarusan ti panagpampanunot ken kulturada. Gapu iti dayta, mas maawatanmi ida. Ket gapu ta ad-adda pay a tultuladenmi ni Jesus, mas mariknami a kas man la ‘naimulakami iti igid ti agay-ayus a danum’ isu a rumangpayakami iti sadinoman a pakaibaonanmi.—Sal. 1:​2, 3.

Ann-Catrin: Tapno dumakkel ti kayo kalpasan a maimula manen, kasapulanna met ti bara ti init. Napaneknekanmi a ni Jehova ti nagserbi nga “init“ kadakami. (Sal. 84:11) Impaayannakami kadagiti nadungngo a kakabsat a timmulong kadakami. Kas pagarigan, uray no bassitkami laeng iti kongregasionmi idiay Tehran, Iran, managpadagus ken naparabur dagiti kakabsat sadiay. Dayta ti nangipalagip kadakami iti kinamanagpadagus dagiti karakter iti Biblia. Saanmi koma kayat ti pumanaw idiay Iran. Ngem idi Hulio 1980, imparit ti gobierno ti trabahotayo isu a masapul a pumanawkamin iti dayta a pagilian iti laeng uneg ti 48 nga oras. Gapu iti dayta, nayakarkami iti maysa a pagilian ti Africa, iti Zaire (Congo itan).

Idi damo a naammuak a mayakarkami iti Africa, nagsangitak. Mabutengak. Ngamin, nangnangngegko nga adu kano ti uleg ken sakit sadiay. Ngem pinabilegnakami ti maysa nga agassawa a nadekket kadakami a nabayagen a nagserbi sadiay. Imbagada: “Awankayo pay met idiay! Padasenyo pay la ngata. Sigurado a magustuanyonto ti Africa.” Agpayso ti imbagada! Nakaay-ayat ken nakasingsingpet dagiti kakabsat. Kinaagpaysuanna, idi masapul a pumanawkami idiay Zaire kalpasan ti innem a tawen gapu iti pannakaiparit ti trabahotayo, napaisemak. Ngamin, ikarkararagkon ken Jehova a saankami koman a pumanaw iti Africa.

Ania dagiti bendision a natagiragsakyo bayat nga agserserbikayo ken Jehova?

Mats: Nakaad-adu a misionero a naggapu iti nagduduma a pagilian ti nagbalin a nasinged kadakami. Iti met dadduma nga asaynmentmi,  nariknami ti nagpaiduma a ragsak gapu ta naaddaankami iti adu nga iyad-adalan iti Biblia. No dadduma pay ngarud ket sagduduapulokami ken baket! Saanmi met a malipatan ti ayat ken kinamanagpadagus dagiti kakabsat idiay Africa. No bumisbisitakami kadagiti kakabsat idiay Tanzania, iparparkingmi iti paraangan ti balbalayda ti “kuartomi,” kayatko a sawen, ti luganmi a Volkswagen Kombi. Marigrigat laeng dagiti kakabsat sadiay. Ngem managpadagusda ken sigsiguraduenda a kompleto dagiti kasapulanmi. Kinapudnona, “nalablabes pay ngem iti kabaelanda” ti ipapaayda. (2 Cor. 8:3) Adda ti kaykayatmi unay ken Ann-Catrin nga aramiden nga aw-awaganmi iti “story time.” Sakbaykami a maturog, pagin-innestoriaanmi a dua dagiti napasamak kadakami iti agmalmalem sa agyamankami ken Jehova ta saannakami a binaybay-an.

Ann-Catrin: Maragsakanak unay ta nagadu ti naam-ammok a kakabsat manipud iti nadumaduma a pagilian. Adu met a lengguahe ti nasursuromi kas iti Farsi, French, Luganda, ken Swahili. Nakasursurokami met iti adu ken nadumaduma a kultura. Timmulongkami pay a nangsanay kadagiti kabbaro a kakabsat, naaddaankami kadagiti pudno a gagayyem, ken nagkakaduakami a nagserbi ken Jehova “iti abagan-abaga.”—Sof. 3:9.

Adu met ti nakitami a nadumaduma ken nagpipintas a parsua ni Jehova. Kada adda baro nga asaynmentmi, kas man la ni Jehova a mismo ti mangipaspasiar kadakami. Saanmi koma a napadasan dagita no saankami nga agserserbi kenkuana.

Ania dagiti problema a naipasango kadakayo, ken kasanoyo a napagballigian dagita?

Mats: Adda dagiti panawen a nagsakitkami, kas iti malaria. Namin-adu met a naoperaan ni Ann-Catrin. Nagdandanagkami met ta lumaklakay ken bumakbaketen dagiti nagannakmi. Imbag laengen ta adda dagiti kakabsatmi a nangay-aywan kadakuada. Gapu ta ay-ayatenda dagiti nagannakmi, inan-anusan ken nagragsakanda nga inaramid dayta. (1 Tim. 5:4) Ngem no dadduma, uray no ar-aramidenmi ken Ann-Catrin ti amin a kabaelanmi a mangtulong kadakuada, maladingitankami latta. Panagriknami ngamin ket ad-adu koma pay ti maaramidanmi no addakami idiay.

Ann-Catrin: Idi 1983, bayat nga agserserbikami idiay Zaire, nagsakitak iti nakaro a kolera. Imbaga ti doktor ken Mats, “Ipaagasmo isunan iti sabali a pagilian!” Kabigatanna, naglugankami iti pangkargamento nga eroplano. Dayta la ngamin idi ti available nga agpa-Sweden.

 Mats: Ti ammomi idi ket saankamin a makapagtultuloy nga agserbi kas misionero isu a permi ti sangitmi. Imbaga ngamin ti doktor a saanen nga umimbag ni Ann-Catrin. Ngem imbag laengen ta immimbag! Kalpasan ti makatawen, nagsublikami idiay Zaire. Naibaonkami nga agserbi iti bassit a Swahili a kongregasion idiay Lubumbashi.

Ann-Catrin: Idi addakami iti Lubumbashi, nagsikogak. Ngem makapaladingit ta naalisanak. Nupay saanmi nga implano ti maaddaan iti anak, talaga a nagrigat nga iliwliwag ti matayan iti anak. Ngem uray no permi idi ti ladingitmi, inikkannakami ni Jehova iti dimi ninamnama a regalo. Lallalo nga immadu ti iyad-adalanmi iti Biblia. Awan pay ti makatawen, dimmoble ti bilang dagiti agibumbunannag iti kongregasionmi. Idi, 35 laeng. Ngem ita ket nagbalinen a 70. Ti la attendance idi kadagiti gimongmi ket 40. Ngem ita ket nagbalinen a 220. Nagbalinkami a busy iti ministerio. Ket gapu iti bendision ni Jehova, uray kaskasano, nailiwliwagko ti riknak. Malaglagipmi latta no kua ti patpatgenmi nga anak. Magagarankami la unayen a makakita no kasano nga interamente nga ikkatento ni Jehova idiay Paraiso ti saem a marikriknami ita.

Mats: Adda met idi panawen a sobra a kimmapsut ti bagi ni Ann-Catrin. Ti rigatna, simmabay met a nadayagnos nga adda stage-four a kanserko iti colon isu a masapul a maoperaanak. Ngem ita, okeyakon. Ar-aramiden met ni Ann-Catrin ti amin a kabaelanna nga agserbi ken Jehova.

Nakitami a saan laeng gayam a dakami ti makapadpadas kadagiti problema. Kalpasan ti napasamak a panangikisap iti puli idiay Rwanda idi 1994, binisitami dagiti nagbakuit a kakabsat kadagiti refugee camp. Permi a naparparegtakami iti pammati, panagibtur, ken kinamanagpadagusda uray no nakarigrigat ti biagda idiay. Gapu kadagita a nakitami, talaga a napaneknekanmi a saranayen ni Jehova dagiti adipenna iti tiempo ti rigat.—Sal. 55:22.

Ann-Catrin: Adda pay napasamak kadakami idi 2007. Immatenderkami iti pannakaidedikar ti sangay ti Uganda. Kalpasan ti programa, kaduami ti agarup 25 a misionero ken Bethelite nga agaw-awid nga agsubli iti Nairobi, Kenya. Idi asidegkamin iti border ti Kenya, adda kasinnabatmi a trak a dimmungpar iti luganmi. Dagus a natay ti drayber ken ti lima a kakabsat. Maysa a sister ti natay iti ospital. Mail-iliwkamin kadakuada ket magagarankami a mangsabat kadakuada inton panagungar!—Job 14:​13-15.

Idi agangay, immimbag met la dagiti sugatko. Isuna laeng ta naaddaankami ken Mats iti post-traumatic stress disorder. Kasta met la ti napasamak iti dadduma a kakaduami a nakalasat iti aksidente. Bigla latta no kuan a mariingak iti rabii a  panagriknak, maat-atakeak. Nakabutbuteng! Ngem agkalma no kua ti riknami no agkararagkami ken Jehova ken no basaenmi ti dadduma kadagiti paboritomi a teksto. Dakkel met ti naitulong ti panagpadoktormi. Nasaysayaat itan ti kasasaadmi. Ket kanayon a kidkiddawenmi ken Jehova a tulongannakami a mangliwliwa kadagiti addaan iti kasta met la a sakit.

Naibagayo a naibturanyo dagiti rigat a nakaipasanguanyo gapu ta ig-iggamannakayo ni Jehova a “kas kadagiti saan pay a naluto nga itlog.” Ania ti kayatyo a sawen?

Mats: Adda pagsasaoda iti Swahili a,“Tumebebwa kama mayai mabichi,” wenno “Ig-iggamannakami a kas kadagiti saan pay a naluto nga itlog.” No ig-iggaman ti maysa a tao dagiti saan pay a naluto nga itlog, an-annadanna tapno awan ti mabtak. Kasla kasta met laeng ti ar-aramiden ni Jehova kadakami iti tunggal asaynmentmi. Talaga nga ipapaayna ti amin a kasapulanmi. No dadduma, sobsobra pay ngarud. Ti maysa a pamay-an nga iparparikna ni Jehova ti ayat ken suportana ket ti pannakipagrikna kadakami ti Bagi a Manarawidwid.

Ann-Catrin: Adda pay diak malipatan a nangiparikna iti ayat ken suporta kadakami ni Jehova. Maysa nga aldaw, adda timmawag kaniak a mangibagbaga nga adda ni tatangko iti ICU (intensive care unit) idiay Sweden. Nabiit pay idi a naka-recover ni Mats iti malaria. Awan ti igatangmi iti tiket nga agawid iti Sweden isu a napanunotmi nga ilako ti luganmi. Ngem bigla nga adda pay dua a timmawag kadakami. Agassawa ti immuna a timmawag. Naammuanda ti problemami ket kayatda a bayadan ti maysa a tiket. Maysa met a baket a sister ti simmaruno a timmawag. Adda naurnongna a kuarta iti alkansiana a sinuratanna iti “Para iti agkasapulan.” Dagus a tinulongannakami ni Jehova iti sumagmamano la a minuto!—Heb. 13:6.

No lagipenyo ti nasuroken a 50 a tawenyo iti amin-tiempo a panagserbi, ania dagiti nasursuroyo?

Ann-Catrin: Nasursurok a napigsakami ‘no agtalinaedkami a kalmado ken no agtalekkami.’ No agtalektayo ken Jehova, isu ti lumaban para kadatayo. (Isa. 30:15; 2 Cron. 20:​15, 17) Ar-aramidenmi ti amin a kabaelanmi nga agserbi ken Jehova iti tunggal asaynmentmi. Gapu iti dayta, nakaad-adu a bendision ti maaw-awatmi a saanmi koma a natagiragsak no saankami nga agserserbi iti kastoy a pamay-an.

Mats: Ti kangrunaan a nasursurok ket masapul nga agpannurayak ken Jehova iti tunggal situasion ken siputak no kasano nga agtignay para kaniak. (Sal. 37:5) Kanayon a tungtungpalenna dagiti karina. Makitkitami nga ar-aramidenna dayta agingga ita iti asaynmentmi iti Bethel iti Myanmar.

Sapay koma ta adu pay nga agtutubo ti mangpalawa iti ministerioda tapno mapadasanda met ti imparikna kadakami ni Jehova a napudno nga ayatna. Ket adda maysa a banag a masiguradomi: No ipalubosda a ni Jehova ti mangimula kadakuada iti sadinoman a kayatna, sigurado la ketdi a dumakkel ken rumangpayada.