NAKAPATPATEG ti musika iti kultura ti nagkauna nga Israel. Masansan a dinakamat ti Biblia dagiti tattao nga agtoktokar ken agkankanta. Kinapudnona, agarup sangapulo a porsiento a linaon ti Biblia ket kanta. Makita dagita iti libro a Salmo, Kanta ni Solomon, ken Un-unnoy. Ibaga ti libro a Music in Biblical Life a nalawag nga ipakita ti Biblia a “ti musika ket paset ti adu nga aktibidad iti biag dagiti Israelita.”

Musika iti inaldaw a biagda. Agtoktokar idi ken agkankanta dagiti Israelita tapno iyebkasda ti rikriknada. (Isa. 30:29) Agtoktokar met dagiti babbai iti pandereta, agkankantada kadagiti naragsak a kankanta, ken agsasalada bayat ti koronasion, piesta, ken panangabak dagiti soldadoda. (Uk. 11:34; 1 Sam. 18:​6, 7; 1 Ar. 1:​39, 40) No adda matay, ikanta met dagiti Israelita dagiti dung-awda a mangipakita iti panagladingitda. (2 Cron. 35:25) Nalawag a “dagiti Hebreo ket agdindinamag a nalaing iti musika,” kuna ti McClintock and Strong’s Cyclopedia.

Musika iti biag dagiti ari. Pagaayat dagiti ari ti Israel ti musika. Ni Ari Saul inayabanna ni David iti palasiona kas paratokar. (1 Sam. 16:​18, 23) Idi nagbalin met nga ari ni David, nangaramid kadagiti instrumento a pagtokar, nangputar kadagiti napipintas a kanta, ken nangbukel iti orkestra nga agkanta ken agtokar iti templo ni Jehova. (2 Cron. 7:6; Amos 6:5) Nangorganisar met ni Ari Solomon kadagiti lallaki ken babbai a kumakanta iti palasiona.—Ecl. 2:8.

Musika iti panagdaydayaw. Kapatgan iti amin, us-usaren idi dagiti Israelita ti musika a mangidaydayaw ken Jehova. Kinapudnona, adda 4,000 a nagtokar iti templo iti Jerusalem. (1 Cron. 23:5) Nagtokarda iti piangpiang, dekuerdas nga instrumento, arpa, ken trumpeta. (2 Cron. 5:12) Ngem saan laeng a dagitoy nga eksperto ti nangidaydayaw ken Jehova babaen ti musika. Adu nga Israelita ti nangkanta iti Kanta Dagiti Sumangsang-at bayat a mapmapanda idiay Jerusalem para iti tinawen a piesta. (Sal. 120-134) Ken sigun kadagiti sursurat dagiti Judio, kankantaen idi dagiti Israelita ti Salmo ti Hallel a bayat a selselebraranda ti Paskua.

Nagpateg latta ti musika para kadagiti agserserbi iti Dios. (Sant. 5:13) Paset dayta ti panagdaydayawtayo ken Jehova. (Efe. 5:19) Ti musika pagkaykaysaennatayo kas agkakapammatian. (Col. 3:16) No agkanta, agtokar, wenno dumngegtayo iti musika maipapan ken Jehova, mapabileg ken maibturantayo dagiti problematayo. (Ara. 16:25) Ti musika ket nagsayaat a pamay-an tapno maipakitatayo ti pammatitayo ken Jehova ken ti ayattayo kenkuana.