1. Ania ti makitkita ni Jehova kadagiti adipenna?

 MAKITKITA ni Jehova ti amin a mapaspasaran dagiti adipenna ditoy daga. Ammona no naragsak wenno naladingitda. (Sal. 37:18) No makitkitana nga ikagkagumaantayo ti agserbi kenkuana uray no adda dagiti nasaem nga ib-ibturantayo, ipagpannakkelnatayo unay! Ngem saan la a dayta, magagaran met a tumulong ken mangliwliwa kadatayo.

2. Ania ti aramiden ni Jehova kadagiti nasaktan ti pusoda, ken kasano a magunggonaantayo iti panangaywanna?

² Kuna ti Salmo 147:3 a ‘bedbedan ni Jehova dagiti sugat’ dagiti nasaktan ti pusoda. Nailadawan ditoy ni Jehova a sidudungngo a mangay-aywan kadagidiay nasaem ti marikriknada. Ania ti aramidentayo tapno magunggonaantayo iti panangaywan ni Jehova? Kitaentayo ti maysa nga ilustrasion. Nagdakkel ti maitulong ti maysa a nalaing a doktor tapno umimbag ti maysa a masakit. Ngem tapno umimbag ti masakit, masapul a surotenna ti amin nga instruksion ti doktor. Iti daytoy nga artikulo, ammuentayo dagiti ibagbaga ni Jehova iti Saona para kadagidiay maladladingitan gapu iti nasaem a marikriknada. Ammuentayo met no kasanotayo a mayaplikar ti nadungngo a balakadna.

IPASPASIGURADO NI JEHOVA NGA IPATPATEGNATAYO

3. Apay a marikna ti dadduma nga awan serserbida?

³ Makapaladingit ta adu ita ti saan a mangay-ayat iti padada a tattao. Gapu iti dayta, mabalin a maltratuen dagiti kasta a tattao ti dadduma ken ipariknada iti sabsabali nga awan serserbida. Imbaga ti sister a ni Helen a: “Saan a nadungngo da Tatang ken Nanang. Naranggas ni Tatang ken inaldaw nga ibagbagana nga awan serserbimi.” Kas ken Helen, baka  mamalmaltrato, makritkritikar, wenno maiparparikna kenka nga awan serserbim. No kasta ti situasionmo, baka marigatanka a mamati nga adda pudno a mangipatpateg kenka.

4. Sigun iti Salmo 34:​18, ania ti ipaspasigurado kadatayo ni Jehova?

⁴ Uray no saan a nasayaat ti panangtrato kenka ti sabsabali, masiguradom nga ay-ayaten ken ipatpategnaka ni Jehova. “Asideg ni Jehova kadagiti nasaktan ti pusoda.” (Basaen ti Salmo 34:18.) No marikriknam a ‘nadudog ti espiritum,’ laglagipem nga adda dagiti nasayaat a nakita ni Jehova iti pusom isu nga inyasidegnaka a mismo kenkuana. (Juan 6:44) Kanayon a nakasagana a tumulong kenka gapu ta ay-ayatennaka unay.

5. Ania ti masursurotayo ken Jesus iti panangtratona kadagidiay nakarikna nga awan serserbida?

⁵ Maammuantayo dagiti rikna ni Jehova no usigentayo ti ulidan ni Jesus. Idi adda ni Jesus ditoy daga, nakaim-imbag kadagiti tattao a nakarikna nga awan serserbida gapu iti saan a nasayaat a panangtrato kadakuada ti sabsabali. (Mat. 9:​9-12) Idi adda babai a nakaro ti sakitna a nangsagid iti bado ni Jesus ta mangnamnama nga umimbag, liniwliwa ni Jesus. Kinomendaranna pay ketdi dayta a babai gapu iti pammatina. (Mar. 5:​25-34) Perpekto ti panangtulad ni Jesus iti personalidad ni Amana. (Juan 14:9) Masiguradom ngarud nga ipatpategnaka ni Jehova ken makitkitana dagiti nasayaat a kualidadmo, agraman ti pammatim ken ti ayatmo kenkuana.

6. Ania ti aramidem no mariknam nga awan serserbim?

⁶ Ania ti mabalinmo nga aramiden no sagpaminsan wenno masansan a mariknam nga awan serserbim? Basaem dagiti bersikulo ti Biblia a mangipasigurado kenka nga ipatpategnaka ni Jehova ken utobem dagita. b (Sal.  94:19) No saanmo a naragpat ti maysa a kalatmo wenno maup-upayka gapu ta saanmo a maaramidan ti ar-aramiden ti dadduma, saanmo a pabasolen ti bagim. Saan nga ekspektaren ni Jehova nga aramidem dagiti saanmo a kaya. (Sal. 103:​13, 14) No maysaka idi a biktima ti panangabuso, saanmo a pabasolen ti bagim. Laglagipem a dagiti agar-aramid iti dakes wenno dagiti nangbiktima ti singiren ni Jehova, saan ketdi a dagiti biktima. (1 Ped. 3:12) Ni Sandra ket namaltrato idi ubing pay. Imbagana, “Kanayon a kidkiddawek ken Jehova a tulongannak koma a mangkita kadagiti nasayaat a kualidadko a makitkitana kaniak.”

7. Kasano a dagiti nasaem a kapadasantayo iti biag ket makatulong iti panagserbitayo ken Jehova?

⁷ Dimo pulos pagduaduaan a mabalinnaka nga usaren ni Jehova a tumulong iti sabsabali. Inikkannaka iti pribilehio nga agbalin a katrabahuanna iti ministerio. (1 Cor. 3:9) Gapu kadagiti kapadasam iti biag, posible a nasursurom ti agbalin a mannakipagrikna ken mannakaawat iti dadduma. Nagdakkel ti maitulongmo kadakuada. Ti nadakamaten a ni Helen ket natulongan idi, isu a kabaelanna met itan ti tumulong iti sabsabali. Imbagana: “Panagriknak idi ket ‘awan serserbik.’ Ngem imparikna kaniak ni Jehova nga ay-ayatennak ken us-usarennak a tumulong iti sabsabali.” Naragsak itan ni Helen kas regular pioneer.

KAYAT NI JEHOVA NGA AWATENTAYO TI PAMMAKAWANNA

8. Ania ti ipasigurado kadatayo ti Isaias 1:18?

⁸ Dadduma nga adipen ni Jehova ket sidsidiren latta ti konsiensiada gapu kadagiti naaramidanda a basol sakbay man wenno kalpasan ti panagbautisarda. Ngem nasayaat a laglagipentayo nga impaay ni Jehova ti subbot gapu ta ay-ayatennatayo unay. Sigurado a kayatna nga awatentayo ti sagutna. Ipasigurado ni Jehova a kalpasan a ‘nakilinnawagtayon’ c kenkuana, saannan nga isingir kadatayo dagiti basoltayo. (Basaen ti Isaias 1:18.) Anian a yamantayo ta saanen a lagipen ti nadungngo nga Amatayo a ni Jehova dagiti naaramidantayo a basol! Kasta met a dina pulos lipaten dagiti nasayaat a naaramidantayo.—Sal. 103:​9, 12; Heb. 6:10.

9. Apay a masapul nga ikagumaantayo ti agpokus iti agdama ken iti masanguanan imbes nga iti napalabas?

⁹ No sidsidirennaka latta ti konsiensiam uray no nagbabawyamon dagiti naaramidam a basol, ikagumaam ti agpokus iti agdama ken iti masanguanan imbes nga iti napalabas. Kitaentayo ti ulidan ni apostol Pablo. Nagbabawyanna ti dati a naranggas a panangidadanesna kadagiti Kristiano. Ngem ammona a napakawan isunan ni Jehova. (1 Tim. 1:​12-15) Sangkapanunotna latta kadi idi dagiti naaramidanna a basol iti napalabas? Sigurado a saan, no kasano a saanna idin a sangkapanunot dagiti nagapuananna kas pasurot ti Judaismo. (Fil. 3:​4-8, 13-15) Imbes ketdi, sireregta nga impamaysana ti ministeriona ken pinanunotna ti masakbayanna. Kas ken Pablo, saanmon a maisubli ti napalabas. Ngem mabalinmo nga idaydayaw ken maparagsak ni Jehova iti agdama a kasasaadmo. Kanayon met a panunotem ti nagsayaat a masakbayan nga inkarina kenka.

10. Ania ti aramidentayo no nasaktantayo ti dadduma gapu iti naaramidtayo iti napalabas?

¹⁰ Mabalin a sidsidirennaka pay laeng ti konsiensiam gapu iti naaramidmo iti napalabas a nangpasakit iti dadduma. Ania ti makatulong? Mangaramidka iti pamay-an tapno sumayaat ti riknada. Dumawatka iti pammakawan  ken ipakitam kadakuada a talaga nga agbabbabawika. (2 Cor. 7:11) Kiddawem ken Jehova a tulonganna dagiti napasaktam. Matulongannaka ken dagiti nasaktam tapno maitultuloyyo ti agserbi kenkuana ken tapno maisubli ti nasayaat a relasionyo.

11. Ania ti masursurotayo iti ulidan ni propeta Jonas? (Kitaen met ti ladawan .)

¹¹ Agsursuroka kadagiti kamalim iti napalabas, ken situtulokka nga agpausar ken Jehova iti aniaman a pangusaranna kenka. Kitaem ti ulidan ni propeta Jonas. Imbes a mapan iti Nineve nga adda iti daya a kas iti imbilin ti Dios, nagpalaud ketdin iti Tarsis. Ni Jehova dinisiplinana ni Jonas ket nakasursuro iti kamalina. (Jon. 1:​1-4, 15-17; 2:​7-10) Saan a nauma ni Jehova a nangusar ken propeta Jonas. Inikkanna pay ketdi iti sabali a gundaway a mapan idiay Nineve, ket dagus a nagtulnog ni Jonas. Saanna nga impalubos a ti kamalina iti napalabas ti nanglapped kenkuana a mangaramid iti ipatpatrabaho ni Jehova.—Jon. 3:​1-3.

LIWLIWAENNATAYO NI JEHOVA BABAEN TI NASANTUAN NGA ESPIRITU

12. Kasano nga ipaayannatayo ni Jehova iti talna no adda nasaem a napasarantayo? (Filipos 4:​6, 7)

¹² Usaren ni Jehova ti nasantuan nga espirituna a mangliwliwa kadatayo no adda nasaem a mapasarantayo. Kitaentayo ti kapadasan da Ron ken Carol. Makapaladingit ta nagpakamatay ti anakda. Imbagada: “Nagadu metten dagiti saan a nasayaat a napasaranmi, ngem dayta pay laeng ti karirigatan. Adu a rabii a saankami a nakaturturog, isu a nagkarkararagkami ken Jehova ket talaga a nariknami ti talna a dinakamat ti Filipos 4:​6, 7.” (Basaen.) No marirriribukanka gapu iti saan a nasayaat a napasamak kenka, ibagam ken Jehova ti amin a marikriknam. Agkararagka kenkuana kasanoman kasansan ken kapaut a kayatmo. (Sal. 86:3; 88:1) Maulit-ulit a dawatem ken Jehova ti nasantuan nga espirituna. Kanayonto a denggenna dagiti panagpakaasim.—Luc. 11:​9-13.

13. Kasano a matulongannatayo ti nasantuan nga espiritu tapno maitultuloytayo ti simamatalek nga agdaydayaw ken Jehova? (Efeso 3:16)

¹³ Adda kadi narigat a pakasuotan a napasaram nga uray la nariknam a kasla naibusen ti pigsam? Mapabilegnaka ti nasantuan nga espiritu tapno maitultuloymo ti simamatalek nga agdaydayaw ken Jehova. (Basaen ti Efeso 3:16.) Kitaem ti kapadasan ti sister a ni Flora. Agserserbida idi ken lakayna kas misionero idi nakikamalala ni lakayna, isu a nagdiborsioda. Imbagana: “Diak mailadawan ti saem a nariknak gapu iti panangliputna kaniak. Dayta laengen idi ti sangkapanunotko. Inkararagko ken Jehova ti nasantuan nga espirituna tapno makapagibturak. Tinulongannak ni Jehova tapno aglunit ti nasugatan a pusok. Liniwliwanak, ken uray no kasla imposible idi damo, pinapigsa ken tinulongannak nga agibtur.” Narikna ni Flora a tinulongan ti Dios tapno mapabilegna ti panagtalekna kenkuana. Ket aniaman ti dumteng a suot, sigurado isuna a tulonganto ni Jehova. Innayonna: “Nagaplikar kaniak ti Salmo 119:32: ‘Tungpalekto dagiti bilinmo ta naynayonam ti pannakaawatko.’”

14. Ania ti aramidentayo tapno agtignay kadatayo ti espiritu ti Dios?

¹⁴ Kalpasan a dinawatmo ken Jehova ti nasantuan nga espirituna, ania ti masapul nga aramidem? Makiramanka kadagiti aktibidad a makatulong tapno ad-adda a maawatmo ti espiritu ti Dios. Karaman kadagita ti pannakigimong ken panangasaba. Inaldaw a basaem ti Biblia tapno mapno ti isipmo iti panagpampanunot ni Jehova. (Fil. 4:​8, 9) Bayat nga agbasbasaka, siputam dagiti karakter ti Biblia a nakapasar kadagiti pakasuotan  ken utobem no kasano a tinulongan ida ni Jehova a makapagibtur. Ni Sandra, a nadakamat itay, ket nakapasar iti agsasaruno a narigat a problema. Imbagana: “Naparegtaak iti salaysay maipapan ken Jose. Saanna nga impalubos a dagiti napasaranna a pakasuotan ken kinaawan hustisia ti nangpakapuy iti relasionna ken Jehova.”—Gen. 39:​21-23.

LIWLIWAENNATAYO NI JEHOVA BABAEN KADAGITI KAPAMMATIANTAYO

15. Siasino pay dagiti mabalin a mangliwliwa kadatayo, ken kasanodatayo a matulongan? (Kitaen met ti ladawan.)

¹⁵ No agrigrigattayo, ‘mangted iti kasta unay a liwliwa’ dagiti kapammatiantayo. (Col. 4:11) Us-usaren ni Jehova dagiti kakabsat tapno ipariknana nga ay-ayatennatayo. Maliwliwadatayo dagiti kapammatiantayo bayat a dengdenggenda dagiti problematayo, wenno uray babaen ti kaaddada iti sibaytayo. Mabalin nga adda dagiti mairanudda a teksto ti Biblia wenno ikararagandatayo. d (Roma 15:4) No dadduma, mabalin nga ipalagip ti maysa a kabsat ti panagpampanunot ni Jehova a makatulong tapno agkalma ti riknatayo. Matulongandatayo met dagiti kakabsat iti dadduma pay a pamay-an kas iti panangtedda iti makan tapno lumag-an ti riknatayo.

16. Ania ti mabalin nga aramidentayo tapno tulongandatayo ti dadduma?

¹⁶ Tapno matulongandatayo ti dadduma, baka masapul nga agpatulongtayo. Ay-ayaten ken kayatdatayo a tulongan dagiti kakabsat.  (Prov. 17:17) Ngem kasanoda a maammuan ti marikriknam wenno ti kasapulam no dimo met ibaga? (Prov. 14:10) No nasaem ti riknam, saanka koma a bumdeng a mangibaga iti dayta kadagiti gagayyemmo a nataengan iti naespirituan. Ibagam kadakuada ti kasapulam. Baka kayatmo met ti makisarita iti maysa wenno dua a panglakayen a nalag-an ti riknam kadakuada. Napaneknekan ti dadduma a sister a maliwliwada no makisaritada iti padada a sister a nataengan iti naespirituan.

17. Ania ti dadduma a rason a saantayo a maawat ti pammaregta, ken ania ti aramidentayo tapno mapagballigiantayo dagita?

¹⁷ Saanmo nga isinsina ti bagim. Mabalin nga adda dagiti tiempo a saanmo a kayat ti makisarita iti dadduma gapu iti nasaem a marikriknam. Baka adda dagiti tiempo a saandaka a maawatan dagiti kakabsat wenno makaibagada iti pakasairan ti riknam. (Sant. 3:2) Saanmo koma nga ipalubos a dagita ti rason a saanmo a maawat ti pammaregta a kasapulam. Adda depresion ti maysa a panglakayen a ni Gavin. Imbagana: “Kaaduanna a diak kayat ti makisarita wenno makikadua kadagiti gagayyemko.” Ngem saan a nagpaabak ni Gavin iti kasta a riknana, ket masansan a sumayaat ti riknana no makikadua kadagiti gagayyemna. Imbaga met ti sister a ni Amy: “Gapu kadagiti napasarak, marigatanak nga agtalek kadagiti tattao. Ngem sursuruek nga ayaten dagiti kakabsat ken agtalek kadakuada a kas iti ar-aramiden ni Jehova. Gapu iti dayta, ammok a maparparagsakko ni Jehova ken naragsakak met.”

LIWLIWAENNATAYO NI JEHOVA BABAEN KADAGITI KARINA

18. Ania ti padpadaanantayo, ken ania dagiti mabalin nga aramidentayo itan?

¹⁸ Makapagtalektayo iti masanguanan ta asidegen nga ikkaten ni Jehova ti amin a pakaigapuan ti rigat, ut-ot, ken saem a marikriknatayo. (Apoc. 21:​3, 4) Iti dayta a tiempo, ‘saanton nga agtalinaed dagita iti pusotayo.’ (Isa. 65:17) Ngem uray pay itan, ‘bedbedbedanen ni Jehova dagiti sugattayo.’ Adu ti ipapaay ni Jehova a mangliwliwa ken makatulong kadatayo. Awatem koma ti tulongna ken dimo pulos pagduaduan nga ‘ipatpategnaka.’—1 Ped. 5:7.