Mapan iti linaonna

Mapan iti listaan dagiti linaonna

 MAADAL NGA ARTIKULO 46

Ay-aywanam Kadi ti ‘Dakkel a Kalasag ti Pammatim’?

Ay-aywanam Kadi ti ‘Dakkel a Kalasag ti Pammatim’?

“Alaenyo ti dakkel a kalasag ti pammati.”​—EFE. 6:16.

KANTA 119 Masapul nga Adda Pammatitayo

ITI DAYTOY A PANAGADAL *

1-2. (a) Sigun iti Efeso 6:16, apay a kasapulantayo ti “dakkel a kalasag ti pammati”? (b) Ania dagiti saludsod nga usigentayo?

ADDAANKA kadi iti “dakkel a kalasag ti pammati”? (Basaen ti Efeso 6:16.) Sigurado nga adda. Kas iti dakkel a kalasag a mangprotektar iti kaaduan a paset ti bagi, ti pammatim protektarannaka iti immoral, naranggas, ken di nadiosan nga impluensia daytoy dakes a sistema ti bambanag.

2 Ngem agbibiagtayon iti “maudi nga al-aldaw,” ket agtultuloy a masubok ti pammatitayo. (2 Tim. 3:1) Kasanom a sukimaten ti kalasag ti pammatim tapno masiguradom a natibker? Ken kasanom a mapetpetan a naimbag ti kalasagmo? Ammuentayo ti sungbat dagita a saludsod.

SUKIMATEM A NAIMBAG TI KALASAGMO

Kalpasan ti gubat, tartarimaanen dagiti soldado ti kalasagda (Kitaen ti parapo 3)

3. Ania ti ar-aramiden idi dagiti soldado iti kalasagda, ken apay?

3 Idi tiempo ti Biblia, masansan a naabbongan iti lalat ti kalasag dagiti soldado. Lanaanda ti kalasagda tapno mapreserba ti lalat ken tapno saan nga aglati dagiti metal a pasetna. No makita ti soldado nga adda perdi ti kalasagna, tarimaanenna tapno sigurado a nakasagana iti sumaruno a gubat. Kasano nga agaplikar dayta a pagarigan iti pammatim?

4. Apay a masapul a sukimatem ti kalasag ti pammatim, ken kasano a maaramidmo dayta?

4 Kas kadagiti soldado idi un-unana, masapul a regular a sukimatem ken aywanam ti kalasag ti pammatim tapno kanayonka a nakasagana a makigubat. Kas Kristiano, makigubgubattayo iti naespirituan ket karaman dagiti dakes nga espiritu  kadagiti kalabantayo. (Efe. 6:10-12) Awan ti sabali a mangaywan iti kalasag ti pammatim no di laeng sika. Kasanom a masigurado a nakasaganaka a mangsango kadagiti pannubok? Umuna, masapul nga ikararagmo ti tulong ti Dios. Sa usarem ti Sao ti Dios tapno makitam ti bagim sigun iti panangmatmatna kenka. (Heb. 4:12) Kuna ti Biblia: “Agtalekka ken Jehova iti amin a pusom, ket dika agtalek iti bukodmo a pannakaawat.” (Prov. 3:5, 6) Bayat a pampanunotem dayta, apay a dimo sublian dagiti desision nga inaramidmo iti nabiit pay? Kas pagarigan, nagproblemaka kadi iti nakaro gapu iti kuarta? Nalagipmo kadi ti kari ni Jehova iti Hebreo 13:5: “Saankanto a pulos panawan ken saankanto a pulos baybay-an”? Napabilegna kadi ti panagtalekmo a tulongannaka ni Jehova? No wen, kaipapananna a pagtaltalinaedem a nasayaat ti kondision ti kalasag ti pammatim.

5. Ania ti posible a maammuam no sukimatem ti pammatim?

5 Mabalin a makigtotka iti maammuam no sukimatem a naimbag ti pammatim. Mabalin a makitam dagiti pagkapuyam a saanmo idi nga ammo. Kas pagarigan, baka mabigbigmo a kimmapuy ti pammatim gapu iti sobra a panagdandanag, kinaulbod, ken pannakaupay. No mapasamak daytoy kenka, kasanom a maprotektaran ti pammatim tapno saan a naan-anay a madadael?

PROTEKTARAM TI BAGIM ITI SOBRA A PANAGDANDANAG, KINAULBOD, KEN PANNAKAUPAY

6. Ania dagiti pagarigan ti nasayaat a pakadanagan?

6 Adda dagiti nasayaat a pakadanagan. Kas pagarigan, pakaseknantayo ti panangparagsak ken Jehova ken ni Jesus. (1 Cor. 7:32) No makaaramidtayo iti nadagsen a basol, pakaseknantayo unay ti pannakaisubli ti relasiontayo iti Dios. (Sal. 38:18) Pakaseknantayo met ti panangparagsak iti asawatayo ken panangipaay iti kasapulan dagiti kapamiliatayo ken kapammatiantayo.​—1 Cor. 7:33; 2 Cor. 11:28.

7. Sigun iti Proverbio 29:25, apay a ditay koma agbuteng iti tao?

7 Iti sabali a bangir, ti sobra a panagdandanag posible a dadaelenna ti pammatitayo. Kas pagarigan, mabalin a kanayon a pagdandanagantayo no addanto met laeng umdas a taraon ken badotayo. (Mat. 6:31, 32) Gapu iti dayta, baka agpokustayo nga agbirok iti material a bambanag. Baka mapatanortayo pay ketdi ti ayat iti kuarta. No ipalubostayo a mapasamak dayta, kumapuy ti pammatitayo ken Jehova ken madadael ti espiritualidadtayo. (Mar. 4:19; 1 Tim. 6:10) Wenno mabalin a mabiktimatayo iti sabali pay a kita ti sobra a panagdandanag​—ti nalabes a pannakaseknan no ania ti makuna ti dadduma maipapan kadatayo. Gapu iti dayta, mabalin a mas kabutengtayon ti mauyaw wenno maidadanes ngem iti mapagpungtottayo ni Jehova. Tapno maliklikantay dayta, masapul nga ipakaasitayo ken Jehova nga ikkannatayo iti pammati ken tured tapno ditay agbuteng iti tao.​—Basaen ti Proverbio 29:25; Luc. 17:5.

(Kitaen ti parapo 8) *

8. Ania ti masapul nga aramidentayo maipapan kadagiti kinaulbod?

8 Ni Satanas, ti “ama ti kinaulbod,” us-usarenna dagiti tattao a naimpluensiaanna tapno agiwarasda iti kinaulbod maipapan ken Jehova ken kadagiti kakabsattayo. (Juan 8:44) Kas pagarigan, iwarwaras dagiti apostata dagiti kinaulbod ken tiritir nga impormasion maipapan iti organisasion ni Jehova babaen ti internet, telebision, ken dadduma pay a pamay-an. Dagitoy a kinaulbod ket karaman iti “umap-apuy a pana” ni Satanas. (Efe. 6:16) Ania ti aramidentayo no adda mangibaga kadatayo  kadagiti kasta a kinaulbod? Ditay denggen dagita! Apay? Gapu ta mamatitayo ken Jehova ken agtalektayo kadagiti kakabsattayo. Kinapudnona, ditay pulos kayat ti makisarita kadagiti apostata. Ditay pulos makidiskusion kadakuada maipapan iti aniaman a banag wenno rason, uray panagusioso laeng.

9. Ania ti epekto kadatayo ti pannakaupay?

9 Ti pannakaupay pakapuyenna ti pammatitayo. Maupaytayo no dadduma gapu kadagiti problematayo. Siempre, saan a mabalin a baybay-antayo dagita. Ngem ditay koma sangkapanunot dagiti problematayo. Ta no kasta, baka malipatantayo ti nakaskasdaaw a namnamatayo nga impaay ni Jehova. (Apoc. 21:3, 4) Ti pannakaupay mabalin nga ibusenna ti pigsatayo ken pasardengennatayo nga agserbi ken Jehova. (Prov. 24:10) Ngem posible a maliklikantay dayta.

10. Ania ti masursurom iti insurat ti maysa a kabsat?

10 Kitaentayo no kasano a pinagtalinaed ti maysa a kabsat iti United States ti pammatina bayat nga ay-aywananna ti lakayna a nakaro ti sakitna. Imbagana iti suratna iti hedkuarter: “Makapa-stress ti situasionmi ken makapaupay no dadduma, ngem nabileg ti namnamami. Agyamyamanak unay kadagiti impormasion a maaw-awatmi a mangpatpatibker iti pammatimi ken mangparparegta kadakami. Talaga a kasapulanmi dagita a balakad ken pammaregta. Gapu kadagita, nakapagtultuloykami nga agserbi ken mangibtur kadagiti pakasuotan nga ipapaay ni Satanas.” Masursurotayo iti komentona a kabaelantayo a pagballigian ti pannakaupay! Kasano? Ibilangtayo a naggapu ken Satanas dagiti pakasuotan. Bigbigentayo a ni Jehova ti pagtataudan ti liwliwa. Ken apresiarentayo dagiti naespirituan a taraon nga ipapaayna.

Ay-aywanam kadi ti ‘dakkel a kalasag ti pammatim’? (Kitaen ti parapo 11) *

11. Tapno maammuantayo ti kondision ti pammatitayo, ania dagiti isaludsodtayo iti bagitayo?

11 Adda kadi makitam a kasapulan a matarimaan iti kalasag ti pammatim? Iti naglabas a bulbulan, naliklikam kadi ti sobra a panagdandanag? Saanka kadi a dimngeg wenno nakidiskusion kadagiti apostata maipapan iti kinaulbod nga iwarwarasda? Ken napagballigiam kadi ti pannakaupay? No kasta, nasayaat  ti kondision ti pammatim. Ngem masapul nga agtalinaedtayo nga alerto ta adda pay sabali nga armas nga us-usaren ni Satanas. Usigentayo ti maysa kadagita.

AGANNADKA ITI MATERIALISMO

12. Ania ti mabalin nga epekto ti materialismo kadatayo?

12 Ti materialismo dadaelenna ti pokustayo ket mabaybay-antayon ti kalasag ti pammatitayo. Imbaga ni apostol Pablo: “Awan ti soldado a makiraman iti negosio bayat nga adda iti serbisio, tapno maay-ayona daydiay nangiserrek kenkuana.” (2 Tim. 2:4) Kinapudnona, saan a napalubosan dagiti Romano a soldado a maaddaan iti sabali a trabaho. Ania ti mapasamak no saan a suroten ti maysa a soldado dayta a restriksion?

13. Apay a saan koma nga agnegosio dagiti soldado?

13 Panunotem daytoy nga eksena. Binigat nga agsansanay a makigubat ti maysa a grupo dagiti soldado, ngem awan ti maysa a kagrupoda. Adda isuna iti palengke nga aglaklako iti taraon. Iti rabii, suksukimaten dagiti soldado ti kabal ken armasda ken as-asaenda dagiti espadada. Ngem ti soldado nga adda paglakuanna ket agisagsagana iti taraon nga ilakona iti sumaruno nga aldaw. Kabigatanna, bigla a dimmarup dagiti kalabanda. Asino kadagiti soldado ti nakasagana a makigubat ken pakaragsakan ti komanderna? Ken asino ti kayatmo nga adda iti abaymo​—ti soldado a nakasagana a makigubat wenno daydiay nabingay ti atensionna?

14. Kas soldado ni Kristo, ania ti napateg kadatayo?

14 Kas kadagiti alerto a soldado, nakapokustayo iti kangrunaan a kalattayo​—ti panangparagsak kadagiti Komandertayo, ni Jehova ken ni Kristo. Napatpateg dayta kadatayo ngem iti aniaman a banag a magun-odtayo iti lubong ni Satanas. Sigsiguraduentayo nga adda tiempo ken pigsatayo nga agserbi ken Jehova ken mangaywan iti kalasag ti pammatitayo ken iti dadduma pay a naespirituan a kabaltayo tapno agtalinaed a nasayaat ti kondisionda.

15. Ania ti impakdaar kadatayo ni Pablo, ken apay?

15 Masapul a kanayontayo nga alerto! Apay? Impakdaar ni apostol Pablo a “dagidiay determinado a bumaknang” ket ‘tumallikudto  iti pammati.’ (1 Tim. 6:9, 10) Ti sasao a ‘tumallikud’ ipakitana a posible a mapukaw ti naespirituan a pokustayo no gun-odentayo dagiti di kasapulan a bambanag. No kasta, mabalin a tumubo iti pusotayo ti “adu a minamaag ken makadangran a tartarigagay.” Imbes nga ipalubostayo a sumrek iti pusotayo dagita a tarigagay, masapul a bigbigentayo a dagita ket armas a makadangran kadatayo.

16. Ania dagiti saludsod a masapul a panunotentayo kalpasan nga inusigtayo ti salaysay iti Marcos 10:17-22?

16 Ipapantayon nga adda umdas a kuartatayo a gumatang iti adu a material a bambanag. Dakes kadi no gatangentayo dagiti banag a kayattayo a saantayo met a talaga a kasapulan? Saan met. Ngem panunotem a naimbag dagitoy a saludsod: Uray no kabaelantayo a gatangen ti maysa a banag, adda kadi tiempo ken pigsatayo a mangusar ken mangmantener iti dayta? Kasta met, saan ngata nga agbalbalinen a sobra ti panangipategtayo kadagiti sanikuatayo? Ti kadi panagayattayo iti material a bambanag pagbalbalinennatayo a kas iti agtutubo a lalaki a nangpaay iti awis ni Jesus a mangpalawa iti panagserbina iti Dios? (Basaen ti Marcos 10:17-22.) Adayo a nasaysayaat ti simple a biag ken ti panangusar iti napateg a tiempo ken pigsatayo a mangaramid iti pagayatan ti Dios!

 PETPETAM TI KALASAG TI PAMMATIM

17. Ania koma ti ditay liplipatan?

17 Ditay koma liplipatan a makigubgubattayo isu a masapul nga inaldaw a nakasaganatayo. (Apoc. 12:17) Saan a mabalin a dagiti kakabsattayo ti mangawit iti kalasag ti pammatitayo. Masapul a datayo ti mangpetpet a naimbag iti dayta.

18. Apay a masapul idi a petpetan a naimbag dagiti soldado ti kalasagda?

18 Idi un-unana, mapadayawan ti soldado gapu iti kinaturedna iti gubat. Ngem maibabain no agawid nga awan ti kalasagna. Insurat ti Romano a historiador a ni Tacitus: “Nakababain unay no mabati ti maysa [a soldado] ti kalasagna.” Dayta ti maysa a rason a masapul a petpetan a naimbag dagiti soldado ti kalasagda bayat ti gubat.

Petpetpetan ti Kristiano a kabsat ti dakkel a kalasag ti pammatina babaen ti panagadal iti Sao ti Dios, regular a pannakigimong, ken naan-anay a pannakiraman iti ministerio (Kitaen ti parapo 19)

19. Kasanotayo a mapetpetan a naimbag ti kalasag ti pammatitayo?

19 Agtultuloy a mapetpetantayo ti kalasag ti pammatitayo no regular a makigimongtayo ken ipakaammotayo iti sabsabali ti nagan ni Jehova ken ti Pagarianna. (Heb. 10:23-25) Kasta met, inaldaw a basaentayo ti Sao ti Dios ken ikararagtayo a mayaplikartayo dagiti balakad ken bilinna iti amin nga aramidentayo. (2 Tim. 3:16, 17) Iti kasta, awanto ti armas ni Satanas a naan-anay nga agballigi maibusor kadatayo. (Isa. 54:17) Protektarannatayto ti ‘dakkel a kalasag ti pammatitayo.’ Situturedtayto nga agtrabaho a kadua dagiti kakabsattayo. Ken saantayto laeng nga inaldaw a mangabak iti pannakigubattayo no di pay ket pribilehiotayto ti adda iti dasig ni Jesus inton mangabak iti pannakigubatna ken ni Satanas ken kadagiti pasurotna.​—Apoc. 17:14; 20:10.

KANTA 118 “Patibkerem ti Pammatimi”

^ par. 5 Kasapulan dagiti soldado ti kalasagda tapno maprotektaranda iti peggad. Ti pammatitayo ket kasla maysa a kalasag. Ken kas iti literal a kalasag, masapul nga aywanantayo ti pammatitayo. Ilawlawag daytoy nga artikulo ti aramidentayo tapno masiguradotayo a nasayaat ti kondision ti ‘dakkel a kalasag ti pammatitayo.’

^ par. 58 LADAWAN: Idi nagparang iti TV ti report nga agiwarwaras dagiti apostata iti kinaulbod maipapan kadagiti Saksi ni Jehova, dagus nga iniddep ti Saksi a pamilia ti TV.

^ par. 60 LADAWAN: Kalpasanna, bayat ti panagdaydayaw ti pamiliada, us-usaren ti ama ti maysa a teksto ti Biblia a mangpabileg iti pammati ti pamiliana.