Kaano nga agpatingga ti trabaho a panangasaba?

Imbaga ni Jesus: “Ti naimbag a damag maipapan iti Pagarian maikaskasabanto iti intero a daga tapno maammuan ti amin a nasion; kalpasanna, umayton ti panungpalan.” (Mat. 24:14) Ti Griego a sao a naipatarus kas “panungpalan” iti daytoy a bersikulo, kasta met iti bersikulo 6 ken 13, ket teʹlos. Tumukoy dayta iti panagpatingga ti lubong ni Satanas inton Armagedon. (Apoc. 16:​14, 16) Ania ngarud ti kayatna a sawen? Itultuloytayo nga ikasaba ti naimbag a damag agingga a saan pay a dumteng ti panungpalan wenno Armagedon. Pananglawlawag dayta iti dati a pannakaawattayo.

Ti pannakaawattayo idi ket isardengtayon nga ikasaba ti naimbag a damag apaman a mangrugi ti dakkel a rigat, inton maraut ti Babilonia a Dakkel. (Apoc. 17:​3, 5, 15, 16) Patientayo ngamin idi a dayta ti panagpatingga ti simboliko a “tawen ti kinaimbag ni Jehova.” (Isa. 61:2) Ibagbagatayo met idi a dagiti laeng a maisalakan ket dagiti agtalinaed a matalek ken Jehova sakbay ti dakkel a rigat. Inyarigtayo ida kadagiti Judio a nakalasat iti pannakadadael ti Jerusalem idi 607 B.C.E. Nasaksakbay a namarkaandan a maisalakan gapu ta nagdaydayawda ken Jehova ken ginurada ti dakes. (Ezek. 5:11; 9:4) Ngem dayta a pannakaawat ket saan a maitunos iti imbaga ni Jesus iti Mateo 24:14. Ipakita dayta a teksto a mabalin nga adda pay gundaway dagiti tattao a mangawat iti naimbag a damag agingga a saan pay a nangrugi ti panungpalan wenno Armagedon.

Ti nalawlawagan a pannakaawattayo iti Mateo 24:14 lawlawaganna met ti pannakaawattayo iti Apocalipsis 16:21 maipapan iti arig uraro a mensahe. No adalentayo a naimbag dagitoy dua a teksto, ipakitana nga agtunosda. Kasano? Ti sungbat ket depende iti reaksion dagiti tattao iti mensahe ti Pagarian. Insurat ni apostol Pablo a para kadagiti “maisalakan,” ibilangda ti mensahe kas naimbag a damag a kas iti “banglo ti biag.” Ngem para kadagiti kabusor ti Dios, dakes a damag dayta a kas man la “angot dayta ni patay.” (2 Cor. 2:​15, 16) Kagurgurada ti mensahe ti Pagarian. Ngamin, ibutaktakna a ti lubongda ket nakadakdakes, iturturayan ni Satanas, ken dandanin madadael.—Juan 7:7; 1 Juan 2:17; 5:19.

Siputam met a ti simboliko nga uraro a nadakamat iti Apocalipsis 16:21 ket saan a gagangay ti kadakkelna wenno “nakaro unay.” Ipakita dayta a bayat ti dakkel a rigat, mabalin a ti mensahe nga ikasabatayo ket mas nabilbilegto pay ken mas direkta. Kasta met nga ad-adunto pay a tattao ti mapakaammuan maipapan iti nagan ni Jehova. (Ezek. 39:7) Iti dayta a tiempo, kalpasan a madadael ti Babilonia a Dakkel, addanto kadi dagiti mangawat iti mensahe nga ibilangda a kasla nabanglo nga angot? Posible dayta. Mabalin a malagip wenno maamirisda a ti nakitada a pannakadadael ti ulbod a relihion ket nakabaybayagen nga ikaskasaba dagiti Saksi ni Jehova.

Umasping iti dayta ti napasamak iti nagkauna nga Egipto kalpasan ti 10 a Didigra. Kalpasan a ‘dinusa ni Jehova ti amin a didiosen dagiti Egipcio,’ simmurot iti ilina ti “adu pay a sabali a tattao” a saan nga Israelita. (Ex. 12:​12, 37, 38) Mabalin a pinilida metten ti agdaydayaw ken Jehova idi nakitada a pimmayso ti 10 a Didigra nga impakdaar ni Moises.

Asinoman ti agdesision nga agserbin ken Jehova kalpasan a madadael ti Babilonia a Dakkel ket addaanto iti pribilehio a mangsuporta kadagiti kakabsat ni Kristo nga addanto pay laeng ditoy daga. (Mat. 25:​34-36, 40) Isu a sakbay ti Armagedon, masapul nga agbalbaliwdan no kayatda ti maibilang kas karnero inton mangukom ni Jesus. Ngamin, sakbay la unay a mangrugi ti Armagedon, mapanton idiay langit ti nabatbati a dinutokan ti espiritu.

Daytoy a nalawlawagan a pannakaawattayo talaga nga ipakitana a nakadakdakkel ti ayat ken asi ni Jehova. Wen, “saanna a kayat a madadael ti asinoman no di ket kayatna nga agbabawi ti amin.”—2 Ped. 3:9.