Mapan iti linaonna

Mapan iti listaan dagiti linaonna

 TOPIKO ITI AKKUB | ANIA TI AGPAYSO MAIPAPAN KADAGITI ANGHEL?

Ti Agpayso Maipapan Kadagiti Anghel

Ti Agpayso Maipapan Kadagiti Anghel

Kayatmo kadi a maammuan ti agpayso maipapan kadagiti anghel—no siasinoda, no kasanoda a napaadda, ken no ania ti ar-aramidenda? Awanen ti kasayaatan a pakasarakam kadagiti sungbat no di iti Sao ti Dios, ti Biblia. (2 Timoteo 3:16) Ania ti ibaga ti Biblia kadatayo?

  • Kas iti Dios, dagiti anghel ket Espiritu nga “awanan lasag ken tultulang.” Aggigian dagiti matalek nga anghel idiay langit ken direkta a makaasidegda iti presensia ti Dios.—Lucas 24:39; Mateo 18:10; Juan 4:24.

  • Adda dagiti gundaway a nagparang dagiti anghel kas tao tapno itungpalda dagiti inted-Dios a trabahoda ditoy daga sa nagsublida iti dati a kasasaadda idi nalpasdan dagita.—Uk-ukom 6:11-23; 13:15-20.

  • Nupay naitampokda iti Biblia kas lallaki ken kanayon a nagparangda kas lallaki, awan ti lalaki wenno babai kadakuada. Saanda nga agasawa ken maaddaan iti anak. Maysa pay, saanda a naparsua nga immuna ditoy daga kas tao sada nagpalangit kas anghel kalpasan a natayda. Pinarsua ni Jehova dagiti anghel isu nga aw-awagan ida ti Biblia kas “annak ti pudno a Dios.”—Job 1:6; Salmo 148:2, 5.

  • Dinakamat ti Biblia ti “pagsasao ti tattao ken dagiti anghel” a mangipakita nga adda lengguahe dagiti espiritu a parsua. Inusar ti Dios dagiti anghel a makisao kadagiti tattao ngem dinatayo palpalubosan nga agdayaw wenno agkararag kadakuada.—1 Corinto 13:1; Apocalipsis 22:8, 9.

  • Adda linaklaksa a laksa nga anghel, a mabalin nga agdagup iti binilion. *Daniel 7:10; Apocalipsis 5:11.

  • Dagiti anghel ket “nabileg iti pannakabalin”—adayo a nabilbileg ngem tao—ken nalalaingda nga amang ngem kadatayo. Nakaparpartakda a makapagdaliasat ket ditayo pulos mailadawan dayta.—Salmo 103:20; Daniel 9:20-23.

  • Nupay nalalaing ken mas mannakabalin dagiti anghel, adda limitasionda ken adda dagiti banag a saanda nga ammo.—Mateo 24:36; 1 Pedro 1:12.

  • Naparsua dagiti anghel nga addaan iti personalidad, nadiosan a kababalin, ken wayawaya nga agpili. Isu a kas kadagiti tattao, mabalinda a pilien nga aramiden ti naimbag wenno dakes. Makapaladingit ta pinili ti dadduma nga anghel ti agrebelde iti Dios.—Judas 6.

^ par. 8 Ti maysa a laksa ket 10,000. Ti ngarud mamin-10,000 a 10,000 ket 100 a milion. Ngem kuna ti Apocalipsis a “linaklaksa a laksa” dagiti anghel. Kaipapanan dayta nga adda ginasut a milion, wenno binilion pay ketdi nga espiritu a parsua.