Mapan iti linaonna

Mapan iti listaan dagiti linaonna

 TI BIBLIA BALBALIWANNA TI BIAG

Naranggasak Idi ken Napno ti Pusok iti Sakit ti Nakem

Naranggasak Idi ken Napno ti Pusok iti Sakit ti Nakem
  • PANNAKAYANAKNA: 1974

  • NAKAYANAKANNA: MEXICO

  • PAKASARITAANNA: NARANGGAS A BARITO, AGRESIBO A MANNAKILABAN

TI NAPALABASKO:

Nayanakak idiay Ciudad Mante, maysa a napintas a rehion ti Tamaulipas, Mexico. Kaaduan a tattao iti dayta a siudad ket naparabur ken nasingpet. Ngem makapaliday ta delikado ti aglawlaw gapu kadagiti sindikato.

Uppatkami nga agkakabsat a lallaki. Siak ti maikadua. Pinabuniagandak dagiti nagannakko iti Katoliko. Idi dimmakkelakon, nagbalinak a maysa kadagiti parakanta ti simbaan. Kayatko a maay-ayo ti Dios ta napalalo ti butengko a maukom ken matutuok iti impierno.

Idi agtawenak iti lima, pinanawannakami ni tatangko. Isu a napalalo ti ladingitko ken nariknak nga adda kurang iti biagko. Ay-ayatenmi unay ni Tatang isu a diak maawatan no apay a pinanawannakami. Adu nga oras nga awan ni Nanang iti balaymi ta kasapulan nga agtrabaho tapno mabiagnakami nga agkakabsat.

Ginundawayak dayta a situasion isu nga aglibasak no kua iti klasemi tapno makikaduaak kadagiti in-inauna ngem siak. Sinursuruandak nga agsao iti dakes, agsigarilio, agtakaw, ken makidinnanog. Gapu ta kayatko a kontrolen ti dadduma, nagsursuroak iti boksing, wrestling, martial arts, ken panagusar kadagiti armas. Nagbalinak a naranggas a barito. Kanayon a karamanak kadagiti panagpipinnaltog, ken adda dagiti gundaway a nabaybay-anak a nadigus iti dara, ken matmatayen iti kalsada. Nagkaro la ketdi a ladingit ti maiparpariknak ken ni nanangko kada masarakannak a kasta ken itaraynak iti ospital!

Idi agtawenak iti 16, bimmisita iti balaymi ti gayyemko idi ubingak a ni Jorge. Imbagana kadakami nga isu ket maysa a Saksi ni Jehova ken adda kayatna nga ibaga a napateg a mensahe. Inusarna ti Biblia a nangilawlawag kadagiti patpatienna. Diak pay pulos nabasa idi ti Biblia, isu a naragsakanak a nakaammo iti nagan ti Dios ken kadagiti panggepna. Dinamag ni Jorge no kayatmi ti agpayadal iti Biblia, ket inawatmi dayta.

NO KASANO A BINALBALIWAN TI BIBLIA TI BIAGKO:

Permi a nabang-aranak a nakaammo iti kinapudno maipapan iti impierno—saan gayam nga isursuro dayta ti Biblia. (Salmo 146:4; Eclesiastes 9:5) Idi naadalko dayta, saanen a napalalo ti butengko iti  Dios. Imbes ketdi, imbilangkon ti Dios kas naayat nga Ama, a pagsayaatan dagiti annakna ti pampanunotenna.

Bayat nga umun-uneg ti pannakaammok iti Biblia, nakitak a masapul a balbaliwak ti personalidadko. Kasapulan a sursuruek ti agbalin a napakumbaba ken isardengkon ti kinaranggasko. Nakatulong kaniak ti balakad ti 1 Corinto 15:33: “Dagiti dakes a pannakitimpuyog dadaelenda dagiti makagunggona nga ugali.” Naawatak a tapno mabalbaliwak ti personalidadko, masapul nga isardengko ti makikadua kadagiti tattao a dakes ti impluensiana kaniak. Isu a tinallikudak dagiti dati a gagayyemko ket nakigayyemak kadagiti pudno a Kristiano iti kongregasion—tattao a mangsolsolusion kadagiti saanda a pagkikinnaawatan babaen iti panangsurotda kadagiti prinsipio ti Biblia, saan ket a babaen iti danog wenno aniaman a kita ti kinaranggas.

Dakkel pay ti epekto kaniak ti kuna ti Roma 12:17-19: ‘Dikay subadan ti dakes iti dakes iti asinoman. No mabalin, agingga a makapagpannuray kadakayo, makikappiakayo iti amin a tattao. Dikay ibalesan ti bagbagiyo, ta adda a naisurat: “Kukuak ti pammales; supapakakto, kuna ni Jehova.”’ Naakseptarkon a ni Jehova ti mangikkatto iti kinaawan hustisia iti bukodna a pamay-an ken tiempo. In-inut a nabalbaliwak ti naranggas a kabibiagko.

Diak pulos malipatan ti napasamak iti maysa a rabii bayat nga agaw-awidak. Maysa a grupo dagiti agtutubo iti dati a kalabanmi a gang ti dimmarup kaniak. Kinabilnak ti liderda, sa imbugkawna, “Lumabanka!” Iti dayta a kanito, nagkararagak iti apagbiit ken Apo Jehova a tulongannak a mangandur iti dayta. Nupay permi a kayatko ti agibales, tinarayak ketdi ida. Kabigatanna, nasabatko manen ti lider ti gang. Nagburek ti darak ket kayatko ti agibales. Ngem siuulimek a nagpakaasiak manen ken Jehova a tulongannak a mangkontrol iti bagik. Nasdaawak ta inasitgannak sa kinunana: “Pakawanennak iti napasamak idi rabii. Ti agpayso, kayatko ti agbalin a kas kenka. Kayatko ti agadal iti Biblia.” Imbag laengen ta nakontrolko ti pungtotko! Gapu iti dayta, nagadal met iti Biblia.

Makapaladingit ta iti daydi a tiempo, insardeng ti pamiliak ti agadal iti Biblia. Ngem natibker ti desisionko nga agtultuloy nga agadal ken diak ipalubos nga adda mangpasardeng kaniak. Ammok a babaen ti regular a pannakikaduak kadagiti agdaydayaw iti Dios, maagasan dagiti sugat ti pusok ken maaddaanak iti pamilia a kasapulak. Nagtultuloy nga immuneg ti pammatik, ket idi 1991, nabautisaranak kas maysa a Saksi ni Jehova.

NO KASANOAK A NAGUNGGONAAN:

Naturay ken naranggasak idi, ken napno ti pusok iti sakit ti nakem. Ngem naan-anay a binalbaliwan ti Biblia ti biagko. Ipakpakaammok itan ti mensahe ti Biblia maipapan iti talna iti amin a mayat a dumngeg. Ita, 23 a tawenen nga agserserbiak kas full-time a manangaskasaba.

Adda met idi gundaway a nagserbiak kas volunteer iti branch office dagiti Saksi ni Jehova idiay Mexico. Naam-ammok sadiay ti maysa a naragsak a balasang a Kristiano nga agnagan Claudia. Nagkasarkami idi 1999. Agyamyamanak unay ken Jehova iti panangipaayna kaniak iti napudno nga asawa!

Nagserbikami iti kongregasion a Mexican Sign Language tapno matulonganmi dagiti umel a mangam-ammo ken Jehova. Kalpasanna, naimbitarankami nga umakar idiay Belize tapno isuromi kadagiti tattao sadiay ti maipapan iti Biblia. Adayo a nasimsimple ti biagmi ditoy, ngem adda ti amin a kasapulanmi tapno agbalinkami a naragsak. Saanmi nga isukat dayta iti aniaman.

Idi agangay, intuloy ni Nanang ti agadal iti Biblia ket nabautisaran. Nagbalin met a Saksi ni Jehova ni manongko, ti asawana, ken dagiti annakda. Agserserbi metten ken Jehova ti dadduma kadagiti dati a gagayyemko a nangibagaak maipapan iti mensahe ti Pagarian.

Makapaladingit ta natay ti dadduma a kapamiliak ta dida binalbaliwan ti naranggas nga ugalida. No saanak a nagbalbaliw, kasta met koma ti napasamak kaniak. Agyamyamanak ken Ama Jehova ta inyasidegnak kenkuana ken kadagiti agdaydayaw kenkuana a nakaan-anus ken nakasingsingpet a nangisuro kaniak a mangyaplikar kadagiti prinsipio ti Biblia.