Mapan iti linaonna

Mapan iti listaan dagiti linaonna

Mabalinmo ti Agbiag nga Agnanayon iti Daga

Mabalinmo ti Agbiag nga Agnanayon iti Daga

NAGSAYAAT DAYTA A NAMNAMA! Inkari ti Namarsua nga ikkannatayo iti biag nga agnanayon ditoy daga. Ngem adu ti saan a mamati iti dayta. ‘Matay amin a tao,’ kunada. ‘Paset dayta ti biag ti tao.’ Patien met ti dadduma a posible ti biag nga agnanayon, ngem saan a ditoy daga. Kunada a mapasamak dayta no mataykan ken mapankan idiay langit. Ania ti makunam?

Sakbay a sumungbatka, panunotem ti sungbat ti Biblia kadagitoy a tallo a saludsod: Ania ti ipakita ti pannakaparsua ti tao maipapan iti kapaut ti biagna? Ania ti orihinal a panggep ti Dios iti daga ken kadagiti tattao? Apay a matay ti tao?

DAGITI NAKAIDUMAAN TI TAO

Naidumduma ti tao iti amin a parsua ti Dios ditoy daga. Apay? Kuna ti Biblia a tao laeng ti naparsua iti ‘ladawan’ ken ‘langa’ ti Dios. (Genesis 1:26, 27) Ania ti kayat a sawen dayta? Addaan ti tao kadagiti kababalin ken kualidad ti Dios, kas iti ayat ken kinahustisia.

Naikkan met ti tao iti abilidad nga agpanunot ken agrason, mangilasin iti naimbag ken dakes, ken addaan iti tarigagay a mangam-ammo ken makigayyem iti Dios. Isu a maapresiartayo ti kinapintas ti uniberso ken dagiti nakaskasdaaw a parsua, kasta met ti art, musika, ken daniw. Kangrunaanna, tao laeng ti makapagdaydayaw iti Namarsua. Dagita ti nakaidumaan ti tao kadagiti dadduma a sibibiag a parsua ditoy daga.

Gapuna, panunotem: Inikkan ngata ti Dios dagiti tattao kadagiti kasta a kualidad, agraman ti abilidad a mangpatanor ken mangpasayaat kadagita, no agbiagda laeng iti sumagmamano a tawen? Ti agpayso, inted ti Dios dagitoy a kababalin ken abilidad tapno naragsaktayo nga agbiag ditoy daga iti agnanayon.

TI ORIHINAL A PANGGEP TI DIOS

Kuna ti dadduma a saan a pinarsua ti Dios ti tao tapno agbiag nga agnanayon ditoy daga. Ibagada a ti daga ket temporario laeng a pagyanan ti tao, a pakasubokan no asino ti maikari a mapan idiay langit ken agbiag nga agnanayon a kadua ti Dios. Ngem no agpayso dayta, saan ngata a ti Dios ti agparang a makimbasol iti amin a kinadakes ditoy daga? Maikontra unay dayta iti personalidad ti Dios. Kuna ti Biblia maipapan kenkuana: “Ta amin a daldalanna kinahustisia. Maysa a Dios ti kinamatalek, a kenkuana awan ti di kinahustisia; isu nalinteg ken napalungdo.”​—Deuteronomio 32:4.

 Kastoy ti ibaga ti Biblia maipapan iti panggep ti Dios iti daga: “No maipapan iti langlangit, kukua ni Jehova ti langlangit, ngem ti daga intedna iti annak ti tattao.” (Salmo 115:16) Wen, pinarsua ti Dios ti daga nga agbalin a napintas ken permanente a pagyanan ti tao ken pinunnona dayta kadagiti kasapulantayo tapno naragsaktayo nga agbiag nga agnanayon.​—Genesis 2:8, 9.

“No maipapan iti langlangit, kukua ni Jehova ti langlangit, ngem ti daga intedna iti annak ti tattao.”​—Salmo 115:16

Nalawag met ti kuna ti Biblia maipapan iti panggep ti Dios para iti tao. Imbilin ti Dios iti umuna nga agassawa: “Punnuenyo ti daga ken parukmaenyo, ket pagpasakupenyo dagiti . . . sibibiag a parsua nga aggargaraw iti rabaw ti daga.” (Genesis 1:28) Pribilehioda nga aywanan ken palawaen ti Paraiso iti intero a daga! Ipakita dayta a ditoy daga ti nairanta a pagbiagan iti agnanayon da Adan ken Eva ken dagiti annakda, saan nga idiay langit.

APAY A MATAYTAYO?

Apay ngarud a mataytayo? Ipakita ti Biblia a maysa kadagiti espiritu nga annak ti Dios, a naawagan idi agangay kas ti rebelde a ni Satanas a Diablo, ti nangdadael iti urnos ti Dios idiay Eden. Kasano?

Sinulisog ni Satanas ti immuna a nagannaktayo a da Adan ken Eva nga agrebelde met iti Dios. Idi pinagparang ni Satanas nga adda nasayaat a banag nga ipapaidam ti Dios kadakuada​—ti kalintegan a mangikeddeng no ania ti naimbag ken dakes—​dimmasigda ken Satanas ket nagrebeldeda iti Dios. Ania ti resultana? Natayda kas imbaga idi ti Dios. Napukawda ti namnamada a biag nga agnanayon iti Paraiso a daga.​—Genesis 2:17; 3:1-6; 5:5.

Naapektaran ti amin a tao iti panagrebelde da Adan ken Eva. Kuna ti Sao ti Dios: “Babaen iti maysa a tao [ni Adan] simrek ti basol iti lubong ken ti ipapatay babaen iti basol, ket iti kasta ti ipapatay nagsaknap iti amin a tattao agsipud ta nagbasolda amin.” (Roma 5:12) Mataytayo ta natawidtayo ti basol ken ipapatay iti immuna a nagannaktayo, saan a gapu ta nasaksakbay nga inkeddeng wenno ‘implano’ ti Dios dayta.

MABALINMO TI AGBIAG NGA AGNANAYON ITI DAGA

Saan a nalapdan ti panagrebelde idiay Eden ti orihinal a panggep ti Dios para kadagiti tattao ken iti daga. Gapu iti ayat ken kinahustisia ti Dios, nangaramid iti pamay-an tapno mawayawayaantayo iti natawidtayo a basol ken ipapatay. Inlawlawag ni apostol Pablo: “Dagiti isupapak ti basol isu ti ipapatay, ngem ti sagut nga ipaay ti Dios isu ti agnanayon a biag babaen ken Kristo Jesus nga Apotayo.” (Roma 6:23) Gapu iti ayat ti Dios, “intedna ti bugbugtong nga Anakna [ni Jesu-Kristo], tapno tunggal maysa a mangwatwat iti pammati kenkuana saan koma a madadael no di ket maaddaan iti agnanayon a biag.” (Juan 3:16) Babaen ti situtulok a panangidaton ni Jesus iti bagina kas subbot, insublina ti amin a napukaw gapu ken Adan. *

Asidegen a matungpal ti inkari ti Dios a paraiso a daga. Masagrapmo dayta a nagsayaat a namnama no tungpalem ti balakad ni Jesus: “Sumrekkayo iti akikid a ruangan; agsipud ta akaba ken nalawa ti dalan nga agturong iti pannakadadael, ket adu dagidiay sumrek iti dayta; idinto ta akikid ti ruangan ken nailet ti dalan nga agturong iti biag, ket bassit dagidiay makasarak iti dayta.” (Mateo 7:13, 14) Wen, nakadepende kenka ti masakbayam. Ania ti aramidem?

^ par. 17 Para iti ad-adu pay nga impormasion maipapan iti maaramidan ti subbot kenka, kitaem ti kapitulo 5 ti libro nga Ania a Talaga ti Isursuro ti Biblia? nga impablaak dagiti Saksi ni Jehova ken mabasa online iti www.jw.org/ilo.