Mapan iti linaonna

Mapan iti listaan dagiti linaonna

Binisita ken pinaimbag ni Jesus ti babai a katugangan ni Pedro.—Mateo 8:14, 15; Marcos 1:29-31

Obligado Kadi Dagiti Kristiano a Ministro a Di Agasawa?

Obligado Kadi Dagiti Kristiano a Ministro a Di Agasawa?

DAGITI relihion iti intero a lubong, kas iti Iglesia Katolika Romana, dagiti nadumaduma a relihion nga Orthodox, Budismo, ken dadduma pay, obligarenda dagiti liderda a saanda nga agasawa. Iti sabali a bangir, adu ti mamati a dayta ti ramut ti bigla nga iyaadu ti seksual nga eskandalo a nakairamanan dagiti lider ti nadumaduma a relihion.

Gapuna, normal laeng nga isaludsodtayo, Ibilbilin kadi ti Biblia kadagiti Kristiano a ministro nga annurotenda ti celibacy wenno ti di pannakiasawa ken pannakidenna? Tapno masungbatan dayta, ammuentayo no kasano a nabukel dayta a kaugalian, kasta met no ania ti kuna ti Dios maipapan iti dayta.

NANGRUGIAN TI INKAPILITAN A DI PANNAKIASAWA DAGITI MINISTRO

Iti diskurso ti papa idi a ni Benedict XVI iti Roman Curia idi 2006, imbagana nga adda koneksion ti inkapilitan a di pannakiasawa iti “maysa a tradision a nangrugi di nagbayag kalpasan ti panawen dagiti Apostol.”

Nupay kasta, ti di pannakiasawa dagiti lider ti relihion ket saan a kaugalian dagiti Kristiano idi umuna a siglo. Kinapudnona, ni apostol Pablo a nagbiag idi umuna a siglo imbagana kadagiti Kristiano nga agannadda kadagiti lallaki nga agar-aramid kadagiti “makayaw-awan a naipaltiing a sasao” ken ‘mangiparparit iti pannakiasawa.’—1 Timoteo 4:1-3.

Idi laeng maikadua a siglo a nakastrek ti kaugalian a celibacy kadagiti agkunkuna a Kristiano a relihion a nagbalin idi agangay nga Iglesia Katolika Romana. Sigun iti libro a Celibacy and Religious Traditions, dayta ket “maitunos iti baro a kaugalian a di pannakidenna a timmaud idi iti Imperio ti Roma.”

Kadagiti simmaruno a siglo, dagiti konsilio ti  simbaan ken dagiti maaw-awagan Amma ti Simbaan sinuportaranda ti di pannakiasawa dagiti papadi. Impapanda a ti seksual a pannakidenna ket mangrugit ken saan a maitutop kadagiti responsabilidad dagiti papadi. Uray no kasta, kuna ti Encyclopædia Britannica nga “agingga idi 900’s, adu a papadi ken dadduma pay ketdi kadagiti obispo ti addaan asawa.”

Naipatungpal ti di pannakiasawa dagiti papadi bayat ti Lateran Council idi 1123 ken 1139 a naangay idiay Roma. Ket agingga ita, ipatpatungpal pay laeng dayta ti Iglesia Katolika Romana. Gapu iti dayta, saan a maksayan ti bileg ken kinabaknang ti simbaan a mabalin a mapasamak no ipatawid dagiti naasawaan a papadi iti annakda dagiti sanikua ti simbaan.

TI KAPANUNOTAN TI DIOS ITI INKAPILITAN A DI PANAGASAWA

Nalawag a makita ti kapanunotan ti Dios maipapan iti celibacy iti Saona, ti Biblia. Mabasatayo ditoy ti sasao ni Jesus kadagidiay saan a nagasawa a kas kenkuana “maigapu iti pagarian ti langlangit.” (Mateo 19:12) Kasta met, dinakamat ni apostol Pablo ti maipapan kadagiti Kristiano a nangpili nga agtalinaed nga awanan asawa a kas kenkuana “maipagapu iti naimbag a damag.”—1 Corinto 7:37, 38; 9:23.

Ngem saan nga imbilin ni Jesus wenno ni Pablo a saan nga agasawa dagiti ministro. Sigun ken Jesus, maysa a “sagut,” wenno regalo, ti kinaawan asawa ngem saan nga amin a pasurotna ket addaan iti kasta a sagut. Uray imbaga ni Pablo a nasayaat ti kinaawan asawa, sipaprangka nga inaminna: “Awananak iti bilin manipud iti Apo, ngem itedko ti kapanunotak.”—Mateo 19:11; 1 Corinto 7:25.

Ipakita pay ti Biblia nga adu a Kristiano a ministro idi umuna a siglo ti naasawaan, kas ken apostol Pedro. (Mateo 8:14; Marcos 1:29-31; 1 Corinto 9:5) Kinapudnona, gapu ta nasaknap idi ti immoral nga ar-aramid kadagiti Romano, insurat ni Pablo a no naasawaan ti maysa a Kristiano a manangaywan, masapul nga isu ket “asawa ti maymaysa a babai” ken “addaan iti annak nga agpaspasakup” kenkuana.—1 Timoteo 3:2, 4.

Dagita ket saan a panagasawa nga awan seksual a relasion ta sipaprangka nga ibagbaga ti Biblia a masapul nga ‘ipaay ti lalaki iti asawana ti karbenganna,’ ken masapul a dagiti agassawa ‘dida ipaidam iti maysa ken maysa’ ti seksual a panagdennada. (1 Corinto 7:3-5) Nalawag a saan nga ibilbilin ti Dios ti celibacy, ken saan nga inkapilitan dayta kadagiti Kristiano a ministro.

MAIGAPU ITI NAIMBAG A DAMAG

No saan nga inkapilitan ti celibacy, apay a pinaboran ni Jesus ken ni Pablo ti kinaawan asawa? Ngamin, mabalin a mangted dayta iti ad-adu a gundaway a mangipakaammo iti naimbag a damag iti dadduma. Ad-adu ti maaramidan dagiti awanan asawa ta nawayada kadagiti problema a sangsanguen dagiti addaan asawa.—1 Corinto 7:32-35.

Alaentay a pagarigan ni David nga agtrabtrabaho idi idiay Mexico City. Uray nangato ti sueldona, nagikkat tapno umakar ken mangisuro iti Biblia iti nasulinek a lugar iti Costa Rica. Narikna ngata ni David a nakatulong kenkuana ti kinaawan asawana? “Wen, siempre,” kunana. “Narigat a pakibagayan ti baro a kultura ken ti naiduma a kasasaad ti panagbiag, ngem gapu ta bagik laeng ti masapul nga asikasuek, nalaklaka ti makibagay.”

Kinuna ni Claudia, a maysa a Kristiano a balasang nga immakar iti lugar nga agkasapulan kadagiti mangisuro iti Biblia: “Maragragsakanak iti panagserbik iti Dios. Mapatpatibker ti pammatik ken ti relasionko iti Dios no makitkitak no kasano nga ay-aywanannak.”

“Saan a napateg no naasawaanka wenno saan. Naragsakka latta basta itedmo ken Jehova a Dios ti kasayaatan.”—Claudia

Saan koma nga agbalin a padagsen ti kinaawan asawa. Innayon ni Claudia: “Saan a napateg no naasawaanka wenno saan. Naragsakka latta basta itedmo ken Jehova a Dios ti kasayaatan.”—Salmo 119:1, 2.