IDI Disiembre 26, 2004, nagginggined idiay isla ti Simeulue, nga asideg iti makin-amianan a laud nga igid ti baybay ti Sumatra, Indonesia, iti kapigsa a magnitude 9.1. Kumitkita iti baybay ti amin a tao. Saan a kas iti normal ti panagatras ti danum. Dagus a nagtataray dagiti tattao a napan kadagiti turod, ket ipukpukkawda, “Smong! Smong!” ti saoda para iti tsunami. Awan pay 30 a minuto, immablaten dagiti nagpipigsa ken dadakkel a dalluyon, ket pinerdina ti dandani amin a balay ken purpurok.

Ti isla ti Simeulue ti immuna a dinalapus dayta a napigsa ken nakadakdakkel a tsunami. Ngem kadagiti 78,000 a residente, 7 laeng ti natay. Apay a nagbassit? a Kastoy ti pagsasao dagiti aggigian iti dayta nga isla: ‘No adda apagbiit ngem napigsa a ginggined ket ti danum ti baybay umatrasen, agtarayka a mapan kadagiti turod, ta ti dakkel a dalluyon umayen.’ Gapu iti napalabas a kapadasanda, nasursuro dagiti taga-Simeulue nga ilasin no adda umay a tsunami babaen kadagiti makitada a panagbalbaliw iti baybay. Ti panagtignayda maitunos kadagiti nakitada a pagilasinan ti nangsalbar iti biagda.

Ibaga ti Biblia nga adda um-umay a didigra, maysa a “dakkel a rigat a dayta ket saan pay a napasamak nanipud idi pangrugian ti lubong agingga ita, saan, saanto met a mapasamak manen.” (Mateo 24:21) Ngem dayta a didigra ket saan a panungpalan, wenno panagpatingga, ti planeta a Daga babaen kadagiti aramid dagiti iresponsable a tattao wenno nakaro a natural a didigra—gapu ta panggep ti Dios nga agtalinaed ti daga iti agnanayon. (Eclesiastes 1:4) Imbes ketdi, ditanto nga agtignay ti Dios tapno ‘dadaelenna dagidiay mangdaddadael iti daga’ ket agpatingganton ti amin a kinadakes ken panagrigrigat. (Apocalipsis 11:18; Proverbio 2:22) Nagsayaatto a bendision dayta!

Maysa pay, saan a kas kadagiti tsunami, ginggined, wenno panagbettak ti bulkan, saan a pakatayan dagiti inosente a tao ti um-umay a didigra. “Ti Dios ket ayat,” kuna ti Biblia. Ken ikarkari ti Dios nga agnagan Jehova, a “dagiti nalinteg tagikuaendanto ti daga, ket agtaengdanto nga agnanayon iti dayta.” (1 Juan 4:8; Salmo 37:29) Kasano ngarud a maisalakankanto ken mananammo dagiti naikari a bendision? Ti tulbek ket: Agtignayka maitunos kadagiti makitkitam a pagilasinan!

Ditay maibaga no kaano ti eksakto a panagpatingga ti amin a kinadakes ken panagrigrigat, ta imbaga ni Jesus: “Maipapan iti dayta nga aldaw ken oras awan ti asinoman a makaammo, uray dagiti anghel ti langlangit wenno uray ti Anak, no di laeng ti Ama.” Ngem inyunay-unayna nga ‘agtultuloytayo nga agbantay.’ (Mateo 24:36; 25:13) Para iti ania? Deskribiren ti Biblia dagiti pasamak iti lubong sakbay a pagpatinggaen ti Dios ti amin a kinadakes ken panagrigrigat. No kasano a ti bigla a panagatras ti danum ti baybay ti nangpakdaar kadagiti taga-Simeulue nga adda  um-umay a tsunami, dagiti met dadakkel a panagbalbaliw iti lubong ti pakailasinantayo nga asidegen ti panungpalan. Ipakita ti kahon iti ngato dagiti dadakkel a panagbalbaliw nga ibagbaga ti Biblia.

Agpayso, dadduma kadagita a pasamak wenno kasasaad a makita iti kahon ket napasamak idin. Ngem imbaga ni Jesus a no makitatayon “dagitoy amin a banag,” ammotayo nga asidegen ti panungpalan. (Mateo 24:33) Isaludsodmo iti bagim, ‘Kaano a ti amin a pagilasinan a naibaga ket (1) napasamak iti intero a lubong, (2) naggigiddan a natungpal, ken (3) kimmaro iti kasta unay?’ Nalawag nga agbibiagtayon iti dayta a panawen.

“Dagiti warning system ket . . . makasalbar iti biag,” kinuna ti dati a presidente ti U.S. Kalpasan ti tsunami idi 2004, adda naikabil a warning system kadagiti naapektaran a rehion tapno saanen a maulit ti ipapatay ti adu a tattao. Kas iti dayta, nangted met ti Dios kadagiti pakdaar sakbay nga umay ti panungpalan. Kuna ti Biblia: “Daytoy naimbag a damag ti pagarian maikaskasabanto iti intero a mapagnaedan a daga maipaay a pangsaksi kadagiti amin a nasion; ket iti kasta umayton ti panungpalan.”—Mateo 24:14.

Idi laeng napan a tawen, nasurok a 1.9 a bilion nga oras ti inusar dagiti Saksi ni Jehova a mangikasaba iti naimbag a damag iti 240 a dagdaga ken iti nasurok a 700 a lengguahe. Daytoy ket natibker nga ebidensia nga asidegen ti panungpalan. Gapu iti ayatda iti padada a tao, ar-aramiden dagiti Saksi ni Jehova ti amin a kabaelanda a mangpakdaar kadagiti dadduma nga umas-asidegen ti aldaw ti panangukom ti Dios. (Mateo 22:39) Ti panangipakaammo kenka ni Jehova a Dios iti daytoy nga impormasion ket pammaneknek nga ay-ayatennaka. Laglagipem, ‘saan a tarigagayan [ti Dios] a madadael ti asinoman no di ket tarigagayanna a makagteng ti isuamin iti panagbabawi.’  (2 Pedro 3:9) Subadam kadi ti ayat ti Dios ket ipangagmo ti nasaksakbay a pakdaarna?

Idi nakita dagiti aggigian iti igid ti baybay ti Simeulue a nagatras ti danum, dagus a nagkamangda kadagiti nangatngato a lugar; didan inuray nga agsubli pay ti dalluyon. Ti dagus a panagtignayda ti nangsalbar iti biagda. Tapno makalasatka inton panungpalan, masapul met nga arigna mapanka iti nangatngato a lugar sakbay a maladaw ti amin. Kasano? Indalan ti Dios ni propeta Isaias a mangisurat iti makapagagar nga imbitasion a mayaw-awis agingga “iti kamaudianan a paset dagiti aldaw,” ti tiempo a pagbibiagantayon. Insuratna: “Umaykayo, ket sumang-attayo iti bantay ni Jehova . . . Isuronatayto maipapan kadagiti dalanna, ket magnatayto kadagiti danana.”—Isaias 2:2, 3.

No mapanka iti tuktok ti maysa a bantay, makitam a nalaing dagiti mapaspasamak ken nataltalgedka. Kasta met, ad-adalen itan ti minilion a tattao dagiti linteg ken prinsipio ti Dios babaen iti Biblia, ket matultulonganda a mangbalbaliw iti biagda. (2 Timoteo 3:16, 17) Iti panangaramidda iti dayta, ‘magmagnada kadagiti dana [wenno, dalan]’ ti Dios ken mabenepisiaranda iti pabor ken proteksionna.

Patgam kadi dayta nga awis ket awatem ti naayat a proteksion ti Dios iti daytoy a nagpateg a tiempo? Irekomendami nga adalem a naimbag dagiti ebidensia iti Biblia nga addatayon “kadagiti maudi nga aldaw” kas naipakita iti kahon iti daytoy nga artikulo. Maragsakan dagiti Saksi ni Jehova iti lugaryo a tumulong kenka tapno mas maawatam dagiti naipakita a teksto ken no kasanom a mayaplikar dagita. Wenno mabalin a birokem ti sungbat dagiti saludsodmo babaen ti pananglukatmo iti website-mi a www.jw.org/ilo. Kitaem ti PANNURSURO TI BIBLIA > SUNGBAT DAGITI SALUDSOD MAIPAPAN ITI BIBLIA.