Mapan iti linaonna

Mapan iti listaan dagiti linaonna

 MAADAL NGA ARTIKULO 37

Situtulok nga Agpasakup ken Jehova—Apay ken Kasano?

Situtulok nga Agpasakup ken Jehova—Apay ken Kasano?

“Saan kadi a lallalo pay nga agpasakuptayo iti Ama?”​—HEB. 12:9.

KANTA 9 Ni Jehova ti Aritayo!

ITI DAYTOY A PANAGADAL *

1. Apay a masapul nga agpasakuptayo ken Jehova?

MASAPUL nga agpasakuptayo * ken Jehova gapu ta isu ti Namarsua kadatayo. Gapu iti dayta, adda kalinteganna a mangaramid kadagiti pagalagadan para kadagiti parsuana. (Apoc. 4:11) Ngem adda pay sabali a makakombinsir a rason nga agtulnogtayo kenkuana​—ti panagturayna ti kasayaatan. Adun a tattao ti naaddaan iti pannakabalin ken autoridad a mangituray. No ikompara kadakuada, ni Jehova ti kasisiriban nga Agturay ken awan ti makaartap iti ayat, asi, ken pannakipagriknana.​—Ex. 34:6; Roma 16:27; 1 Juan 4:8.

2. Maibatay iti Hebreo 12:9-11, ania dagiti rason nga agpasakuptayo ken Jehova?

2 Kayat ni Jehova nga agtulnogtayo kenkuana, saan laeng a gapu ta mabutengtayo, no di ket gapu ta ay-ayatentayo ken ibilbilangtayo kas naayat nga Amatayo. Iti surat ni Pablo kadagiti Hebreo, inlawlawagna a masapul a situtulok nga “agpasakuptayo iti Ama” ta sansanayennatayo para iti “pagsayaatantayo.”​—Basaen ti Hebreo 12:9-11.

3. (a) Kasanotayo a maipakita nga agpaspasakuptayo ken Jehova? (b) Ania dagiti saludsod a sungbatantayo?

3 Agpaspasakuptayo ken Jehova no ikagumaantayo ti agtulnog kenkuana iti amin a banag ken no labanantayo ti tarigagay nga agpannuray iti bukodtayo a pannakaawat. (Prov. 3:5) Nalaklakatayo  nga agpasakup ken Jehova no maammuantayo dagiti nasayaat a kualidadna. Apay? Gapu ta makita dagitoy a kualidad iti amin nga ar-aramidenna. (Sal. 145:9) No ad-adu ti ammotayo maipapan ken Jehova, ad-adda met a maayattayo. Ket no ay-ayatentayo ni Jehova, saantayo a kasapulan ti atiddog a listaan dagiti paglintegan no ania ti aramiden ken ditay aramiden. Ikagumaantayo nga itunos ti pampanunot ken rikriknatayo iti kayat ni Jehova ken liklikantayo nga aramiden ti dakes. (Sal. 97:10) Ngem no dadduma, mabalin a marigatantayo nga agtulnog ken Jehova. Apay? Ken ania ti masursuro dagiti panglakayen, amma, ken inna iti ulidan ni Gobernador Nehemias; ni Ari David; ken ni Maria, nga ina ni Jesus? Sungbatan daytoy nga artikulo dagitoy a saludsod.

NO APAY A MABALIN A NARIGAT TI AGPASAKUP KEN JEHOVA

4-5. Sigun iti Roma 7:21-23, apay a mabalin a narigat ti agpasakup ken Jehova?

4 Ti maysa a rason a mabalin a marigatantayo nga agpasakup ken Jehova ket gapu ta natawidtayo ti basol ken imperpektotayo amin. Isu nga adda tendensiatayo nga agsukir. Idi nagsukir da Adan ken Eva iti Dios ken kinnanda ti maiparit a bunga, nangaramidda iti bukodda a pagalagadan. (Gen. 3:22) Ita, kaaduan met a tattao ti di mangikabkabilangan ken Jehova ken kayatda nga isuda ti mangikeddeng no ania ti umiso ken di umiso.

5 Mabalin nga uray dagidiay makaam-ammo ken mangay-ayat ken Jehova ket marigatan a naan-anay nga agpasakup kenkuana. Napadasan daytoy ni apostol Pablo. (Basaen ti Roma 7:21-23.) Kas ken Pablo, kayattayo met nga aramiden ti umiso iti imatang ni Jehova. Ngem masapul a kanayon a labanantayo ti tendensiatayo nga agaramid iti dakes.

6-7. Ania ti sabali pay a rason a mabalin a narigat ti agpasakup ken Jehova? Mangted iti pagarigan.

6 Ti sabali pay a rason a mabalin a narigat ti agpasakup ken Jehova ket gapu iti impluensia ti kultura a dimmakkelantayo. Adu nga ideya ti tao ti maikontra iti pagayatan ni Jehova, ken mabalin a kasapulan ti panagregget tapno saantayo a maimpluensiaan iti panagpampanunotda. Kitaentayo ti maysa a pagarigan.

7 Gagangay iti dadduma a lugar ti panangpilit kadagiti agtutubo nga agpokus iti panagbirok iti adu a kuarta. Naipasango iti kasta ti sister nga agnagan Mary. * Sakbay a naam-ammona ni Jehova, nageskuela iti maysa kadagiti kasayaatan nga eskuelaan iti pagilianda. Pinilit ti pamiliana nga agbirok iti trabaho a nangato ti sueldona iti mararaem a propesion. Kayatna met idi dayta. Ngem idi naam-ammonan ni Jehova ken nasursurona nga ayaten, binalbaliwanna dagiti kalatna. Nupay kasta, imbagana: “No dadduma, adda dagiti makaengganio nga oportunidad a makabirokak iti adu a kuarta ngem ammok a makalapped dayta iti panagserbik ken Jehova. Gapu iti pannakapadakkelko, marigatanak latta nga agsaan. Masapul nga agpakaasiak ken Jehova a tulongannak a manglaban iti tarigagayko a mangawat iti trabaho a makalapped iti panagserbik kenkuana.”​—Mat. 6:24.

8. Ania ti pagsasaritaantayo?

8 Pagsayaatantayo ti panagpasakup ken Jehova. Ngem dagiti naikkan iti autoridad, a kas kadagiti panglakayen, amma, ken inna, ket addaan iti kanayonan a rason nga agtulnog iti bilin ti Dios; adda gundawayda a tumulong iti dadduma. Pagsasaritaantayo ti dadduma a pagarigan iti Biblia a mangipakita no kasanotayo nga usaren ti autoridadtayo iti pamay-an a mangparagsak ken Jehova.

 TI MASURSURO DAGITI PANGLAKAYEN KEN NEHEMIAS

Tumultulong dagiti panglakayen iti trabaho iti Kingdom Hall, a kas ken Nehemias a personal a nakiraman iti pannakaibangon manen ti Jerusalem (Kitaen ti parapo 9-11) *

9. Ania dagiti problema a nakaipasanguan ni Nehemias?

9 Intalek ni Jehova kadagiti panglakayen ti napateg a responsabilidad a mangipastor iti ilina. (1 Ped. 5:2) Adu ti masursuro dagiti panglakayen iti pannakilangen ni Nehemias iti ili ni Jehova. Kas gobernador ti Juda, adda dakkel nga autoridad ni Nehemias. (Neh. 1:11; 2:7, 8; 5:14) Panunotem dagiti problema a nakaipasanguanna. Naammuanna a saan a raraemen dagiti Judio ti templo ken saanda a supsuportaran ti pinansial a kasapulan dagiti Levita kas imbilin ti Linteg. Saanda a sursuroten ti linteg ti Sabbath, ken nangasawa ti dadduma a lallaki iti ganggannaet a babbai. Masapul nga asikasuen ni Gobernador Nehemias daytoy a narigat a situasion.​—Neh. 13:4-30.

10. Ania ti inaramid ni Nehemias kadagiti problema a nakaipasanguanna?

10 Saan nga inabuso ni Nehemias ti autoridadna babaen ti panangipilitna iti bukodna a kapanunotan iti ili ti Dios. Imbes ketdi, sipapasnek nga inkararagna ti tulong ni Jehova ken insurona kadagiti tattao ti Linteg ti Dios. (Neh. 1:4-10; 13:1-3) Sipapakumbaba met a nakipagtrabaho kadagiti kakabsatna, ken tinulonganna pay ida a mangibangon manen kadagiti pader ti Jerusalem.​—Neh. 4:15.

11. Sigun iti 1 Tesalonica 2:7, 8, kasano koma ti panangtrato dagiti panglakayen kadagiti kakabsat iti kongregasion?

11 Mabalin a saan a maipasango dagiti panglakayen kadagiti problema a nakaipasanguan ni Nehemias, ngem matuladda iti adu a pamay-an. Kas pagarigan, ikagkagumaanda a tulongan dagiti kakabsat. Ken saanda a panunoten a nangatngatoda gapu iti autoridadda. Imbes ketdi, nadungngo ti panangtratoda kadagiti kakabsat iti kongregasion. (Basaen ti 1 Tesalonica 2:7, 8.) Ipakita ti pamay-an ti pannakisaritada a nauneg ti ayatda iti sabsabali ken napakumbabada. Kuna ni Andrew nga eksperiensiadon a panglakayen: “Nadlawko a no naasi ken mannakigayyem dagiti  panglakayen, nalaklaka a mangipangag dagiti kakabsat. Dagitoy a kualidad ti pakatignayan dagiti kakabsat a makikooperar kadagiti panglakayen.” Imbaga met ni Tony a nabayagen a panglakayen: “Ikagkagumaak nga iyaplikar ti balakad ti Filipos 2:3 ken ibilang a nangatngato ti sabsabali. Daytoy ti makatulong tapno maliklikak ti agbalin a kasla diktador.”

12. Apay a napateg a napakumbaba dagiti panglakayen?

12 Masapul a napakumbaba dagiti panglakayen, ta napakumbaba ni Jehova. Uray no ni Jehova ti Kangatuan iti uniberso, “agdumog” tapno “bangonenna ti nanumo manipud iti tapok.” (Sal. 18:35; 113:6, 7) Kinapudnona, kagura ni Jehova dagiti napannakkel ken natangsit.​—Prov. 16:5.

13. Apay a masapul a medmedan dagiti panglakayen ti dilada?

13 Ti panglakayen nga agpaspasakup ken Jehova masapul a “medmedan[na] ti dilana.” Ta no saan, baka makaibaga iti makapasakit a sasao iti maysa a di mangresrespeto kenkuana. (Sant. 1:26; Gal. 5:14, 15) Imbaga ni Andrew a nadakamat itay: “No dadduma, kayatko ti agsao iti makapasakit iti maysa a kabsat a panagriknak ket di mangresrespeto kaniak kas panglakayen. Ngem pampanunotek ti ulidan dagiti matalek a lallaki iti Biblia, ket nakatulong dayta tapno makitak ti kinapateg ti kinapakumbaba ken kinaemma.” Ipakpakita dagiti panglakayen ti panagpasakupda ken Jehova no nasingpet ti pannakisaritada kadagiti kakabsat iti kongregasion, a pakairamanan dagiti padada a panglakayen.​—Col. 4:6.

TI MASURSURO DAGITI AMMA KEN ARI DAVID

14. Ania ti papel nga impaay ni Jehova kadagiti amma, ken ania ti namnamaenna kadakuada?

14 Dinutokan ni Jehova ti ama kas ulo ti pamilia, ket namnamaen ti Dios a sanayen ken disiplinaenna dagiti annakna. (1 Cor. 11:3; Efe. 6:4) Ngem limitado ti autoridad ti ama​—manungsungbat isuna ken Jehova, ti nakautangan ti amin a pamilia iti naganda. (Efe. 3:14, 15) Ipakpakita dagiti amma nga agpaspasakupda ken Jehova no usarenda ti autoridadda iti pamay-an a maragsakan ni Jehova. Adu ti masursuroda no adalenda ti biag ni Ari David.

Makita koma kadagiti kararag ti Kristiano nga ama ti kinapakumbabana (Kitaen ti parapo 15-16) *

15. Apay a nasayaat nga ulidan ni Ari David kadagiti amma?

15 Inapointaran ni Jehova ni David saan laeng a kas ulo ti pamiliana no di pay ket ti intero a nasion ti Israel. Kas ari, dakkel ti pannakabalin ni David. Adda gundaway a di umiso ti panangusarna iti autoridadna ket nakaaramid iti nadagsen a basol. (2 Sam. 11:14, 15) Ngem impakitana ti panagpasakupna ken Jehova idi inawatna ti disiplina. Inyebkasna  ti linaon ti pusona ken Jehova iti kararag. Ken inkagumaanna ti agtulnog iti balakad ni Jehova. (Sal. 51:1-4) Kanayonanna, sipapakumbaba nga immawat iti nasayaat a balakad manipud kadagiti lallaki ken uray kadagiti babbai. (1 Sam. 19:11, 12; 25:32, 33) Nakasursuro ni David kadagiti kamalina ket pinagbalinna a kapatgan iti biagna ti panagserbi ken Jehova.

16. Ania dagiti masursuro dagiti amma ken David?

16 Ania dagiti masursuro dagiti amma ken Ari David? Dimo abusuen ti autoridad nga inted kenka ni Jehova. Aminem dagiti kamalim, ken akseptarem dagiti naibatay-Biblia a balakad ti sabsabali. No kasta ti aramidem, respetuendaka ti pamiliam gapu ta napakumbabaka. No agkararagka a kadua ti pamiliam, iyebkasmo ken Jehova ti linaon ti pusom​—ipangngegmo kadakuada a talaga nga agpampannurayka kenkuana. Ken kangrunaanna, pagbalinem a kapatgan iti biagmo ti panagserbi ken Jehova. (Deut. 6:6-9) Ti nasayaat nga ulidanmo ti maysa kadagiti kapatgan a regalo a maitedmo iti pamiliam.

TI MASURSURO DAGITI INNA KEN MARIA

17. Ania a responsabilidad ti inted ni Jehova kadagiti inna?

17 Inikkan ni Jehova dagiti inna iti nadayaw a responsabilidad iti uneg ti pamilia, ken impaayanna met ida iti autoridad kadagiti annakda. (Prov. 6:20) Kinapudnona, mabalin a dakkel ken agpaut ti impluensia ti ina kadagiti annakna. (Prov. 22:6) Kitaentayo ti masursuro dagiti inna ken Maria, nga ina ni Jesus.

18-19. Ania ti masursuro dagiti inna iti ulidan ni Maria?

18 Adu ti ammo ni Maria iti Kasuratan. Nauneg ti panagraemna ken Jehova ken natibker ti relasionna kenkuana. Situtulok nga inaramidna ti pagayatan ni Jehova, uray no kaipapananna nga agbaliw ti intero a biagna.​—Luc. 1:35-38, 46-55.

No nabannog wenno masursuron ti ina, baka kasapulan nga ad-adda nga ikagumaanna nga ipakita ti ayat kadagiti kapamiliana (Kitaen ti parapo 19) *

19 Dakayo nga inna, matuladyo ni Maria iti adu a pamay-an. Kasano? Umuna, pagtalinaedem a natibker ti relasionmo ken Jehova babaen ti personal a panagadalmo iti Biblia ken regular a panagkararag. Maikadua, situtulokka koma a mangaramid iti panagbalbaliw iti biagmo tapno maparagsakmo ni Jehova. Kas pagarigan, mabalin a dimmakkelka iti pamilia a nalaka nga agpungtot dagiti nagannakyo ken nasakit ti panagsasaoda kadakayo. Isu a mabalin nga ipagarupmo a normal ti kasta a panangpadakkel iti annak. Uray idi naammuamon dagiti pagalagadan ni Jehova, mabalin a marigatanka latta nga agtalinaed a kalmado ken naanus kadagiti annakmo, nangnangruna no nabambannogkan ket didaka dengdenggen. (Efe. 4:31) Kadagita a gundaway nga ad-adda a kasapulam ti agpannuray ken Jehova iti kararag. Kuna ti ina nga  agnagan Lydia: “No dadduma, kasapulak ti agkararag a sipapasnek tapno saanak nga agpungtot no dinak tungtungpalen ti anakko. Diak payen no kua ituloy ti ibagbagak ta siuulimek nga ikararagko ti tulong ni Jehova. Tultulongannak ti panagkararag nga agkalma.”​—Sal. 37:5.

20. Ania dagiti problema a pakaipaspasanguan ti dadduma nga inna, ken kasanoda a mapagballigian dayta?

20 Marigatan met ti dadduma nga inna a mangipakita iti ayatda kadagiti annakda. (Tito 2:3, 4) Mabalin a dimmakkelda iti pamilia a saan a nadungngo dagiti nagannakda. No kasta ti pannakapadakkelmo, dimo koma uliten ti kamali dagiti nagannakmo. Ti ina nga agpaspasakup iti pagayatan ni Jehova masapul a sursuruenna nga iyebkas ti ayatna kadagiti annakna. Baka marigatan a mangbalbaliw iti panagpampanunot, rikrikna, ken panagtigtignayna. Ngem posible dayta, ket pagsayaatanna ken ti pamiliana ti aramidenna a panagbalbaliw.

ITULTULOYYO TI AGPASAKUP KEN JEHOVA

21-22. Sigun iti Isaias 65:13, 14, ania dagiti gunggona no agpasakuptayo ken Jehova?

21 Ammo ni Ari David dagiti gunggona iti panagpasakup ken Jehova. Insuratna: “Nalinteg dagiti pammilin ni Jehova, paragsakenda ti puso; nadalus ti bilin ni Jehova, pagsilnagenna dagiti mata. Dagiti lintegmo ti mamakdaar kaniak nga adipenmo; no tungpalek ida, dakkel a gunggona ti masagrapko.” (Sal. 19:8, 11) Makitkitatayo ita ti nagdumaan dagidiay agpaspasakup ken Jehova ken dagidiay mangilaklaksid iti naayat a balakadna. Dagiti agpaspasakup ken Jehova “agpukkaw[danto] a siraragsak . . . gapu ta nasayaat ti pusoda.”​—Basaen ti Isaias 65:13, 14.

22 No situtulok nga agpasakup ken Jehova dagiti panglakayen, amma, ken inna, sumayaat ti biagda, naragragsak ti pamiliada, ken ad-adda nga agkaykaysa ti kongregasion. Kapatgan iti amin, maparagsakda ti puso ni Jehova. (Prov. 27:11) Adda pay kadi nasaysayaat a gunggona ngem iti dayta?

KANTA 123 Agpasakup iti Urnos ti Dios

^ par. 5 Ilawlawag daytoy nga artikulo no apay a masapul nga agpasakuptayo ken Jehova. Ilawlawagna met no kasano nga usaren dagiti panglakayen, amma, ken inna ti autoridad nga inted ni Jehova kadakuada. Adu ti masursuroda iti ulidan ni Gobernador Nehemias; ni Ari David; ken ni Maria, nga ina ni Jesus.

^ par. 1 KAIPAPANAN TI TERMINO: Ti sasao nga agpasakup ken panagpasakup ket negatibo ti kaipapananna kadagidiay napilit nga agtulnog iti maysa a tao. Ngem pinili dagiti adipen ti Dios ti agtulnog kenkuana, isu a saanda nga ibilang a negatibo ti panagpasakup iti Dios.

^ par. 7 Nabaliwan ti dadduma a nagan iti daytoy nga artikulo.

^ par. 62 DAGITI LADAWAN: Tumultulong ti panglakayen iti pannakamantener ti Kingdom Hall a kadua ti anakna, a kas ken Nehemias a personal a timmulong iti pannakaibangon manen dagiti pader ti Jerusalem.

^ par. 64 LADAWAN: Idadauluan ti ama ti pamiliana iti panagkararag ken Jehova.

^ par. 66 LADAWAN: Adun nga oras nga agay-ayam ti ubing iti video games ngem saanna pay a nalpas dagiti trabahona iti balay wenno ti asaynmentna iti eskuelaan. Uray nabannog ni nanangna iti trabaho, kalmado latta a mangdisdisiplina kenkuana ken saan nga agus-usar iti nasakit a sasao.