“Pinanaganan ni Adan ti asawana iti Eva, agsipud ta isu ti agbalin nga ina ti isuamin a sibibiag.”—Genesis 3:20.

TI KUNA DAGITI EKSPERTO

Kuna ti United Nations Educational, Scientific and Cultural Organization (UNESCO) nga “amin a tattao ket nagtaud iti maymaysa a kita ken maymaysa a kapuonan.”—Declaration on Race and Racial Prejudice, 1978.

TI KUNA TI BIBLIA

Pinarsua ti Dios ti dua a tao a da Adan ken Eva ket kinunana kadakuada: “Agbungakayo ken agadukayo ket punnuenyo ti daga ken parukmaenyo.” (Genesis 1:28) Gapuna, nagbalin da Adan ken Eva nga ama ken ina ti amin a tattao. Ngem idi adda layus a nangdadael iti kaaduan a tattao ditoy daga, nakalasat ti uppat a pagassawaan—ni Noe ken ti asawana, ken ti tallo nga annakda a lallaki agraman dagiti assawada. Isursuro ti Biblia a kaputotannatayo amin ti annak ni Noe.—Genesis 9:18, 19.

‘Manipud iti maysa a tao, ti Dios inaramidna ti tunggal nasion dagiti tattao, tapno agnaedda iti intero a rabaw ti daga.’—Aramid 17:26.

TI KUNA TI DADDUMA

Idi maika-20 a siglo, adda sumagmamano a grupo a nangakseptar iti ideya nga adda puli a natantan-ok ngem iti dadduma. Kas pagarigan, kinuna dagiti Nazi a natantan-ok kano ti pulida gapu kadagiti genes-da. Ngem binigbig ti dokumento ti UNESCO a nadakamat itay nga agpapada ti amin a puli gapu ta maymaysa ti kapuonanda.

TI KUNA TI BIBLIA

Sigun iti Aramid 10:34, 35, “ti Dios saan a mangidumduma, no di ket iti tunggal nasion anamonganna ti tao nga agbuteng kenkuana ken agaramid iti kinalinteg.” Awan ngarud ti kalintegan ti asinoman a mangibaga a natantan-ok ti maysa a puli ngem iti sabali.

Nangipasdek ni Jesus iti pagalagadan para kadagiti Kristiano idi kinunana kadagiti adalanna: “Agkakabsatkayo amin.” (Mateo 23:8) Inkararagna nga agkaykaysa koma dagiti pasurotna ken “maan-anayda koma iti panagmaymaysa,” imbes nga agduduma wenno agsisinada.—Juan 17:20-23; 1 Corinto 1:10.

“Iti kamaudianan a paset dagiti aldaw a ti bantay ti balay ni Jehova sititibkerto ti pannakaipasdekna . . . , ket amin dagiti nasion agayusdanto nga agturong iti dayta.”—Isaias 2:2.

TI PAGARUP TI DADDUMA

Gapu iti agtultuloy a guranggura dagiti di agkakapuli, agduadua dagiti tattao iti adu a pagilian no adda met la maar-aramidan ti kagimongan tapno masolbar dayta. Para iti dadduma, didanto pulos makita nga agpapada ti kasasaad ti amin a puli.

TI KUNA TI BIBLIA

Saan nga agnanayon a palubosan ti Dios ti pananggura iti sabali a puli. Imbes ketdi, dagiti babbai ken lallaki ‘kadagiti amin a nasion, tribu, ili ken pagsasao,’ ket agkaykaysadanto nga agserbi kenkuana ken ipakitadanto ti pudpudno nga ayat kadagiti padada a tattao. (Apocalipsis 7:9) Ti Pagarian ti Dios ket saan laeng a basta kasasaad iti puso. Dayta ket maysa a gobierno a mangaramid kadagiti dadakkel a panagbalbaliw iti dagatayo—ti mismo a lugar a panggep ti Dios a pagnaedan ti amin a tattao nga awanan iti panangidumduma iti puli. *