TULONG PARA ITI PAMILIA | AGTUTUBO
No Kasano nga Awaten ti Panangkorehir
TI PROBLEMA
“No adda mangkorkorehir kenka, kasla ibagbagana laeng a kamali ti ar-aramidem. Awan pay ti am-ammok a nangikuna iti, ‘Magustuak no bagaandak a kamali ti ar-aramidek!’”—Amy, 17. *
Marigatanka kadi a mangawat iti panangkorehir dagiti nagannakmo, titsermo, ken dadduma pay nga adulto? No wen, matulongannaka daytoy nga artikulo.
TI MASAPUL A MAAMMUAM
Kasapulantay amin ti makorehir.
“Maitibkoltayo amin iti adu a daras.”—Santiago 3:2.
“Saan a nakababain ti makorehir no adda di umiso nga ar-aramidem.”—Jessica.
No makorehirka, dina kayat a sawen a dakeska.
“Daydiay ayaten ni Jehova * tubngarenna [korehirenna], kas met laeng iti panangtubngar ti maysa nga ama iti anak a pakasarakanna iti ragsak.”—Proverbio 3:12.
“No adda mangkorehir kaniak, ikagumaak a panunoten a nagrigat la ketdi para kadakuada nga aramiden dayta, ken ay-ayatendak isu a bagbagaandak.”—Tamara.
Makatulong ti panangkorehir tapno agbalinka a nasaysayaat a tao.
“Umimdengkayo iti disiplina ket agbalinkayo a masirib.”—Proverbio 8:33.
“Ti panangkorehir ket napateg iti irarang-ay. Tulongannaka a mangkita no kasano ti panangmatmat kenka ti dadduma ken mangkontrol iti naalas a kababalin a dimo pay ketdi ammo nga adda kenka.”—Deanne.
TI MABALINMO NGA ARAMIDEN
Palawaem ti panagpampanunotmo. Mabalin a masaktanka no makorehirka. Ngem ikagumaam a kontrolen ti riknam. Tapno maaramidmo dayta, lipatem pay laeng a sika ti mabalbalakadan ket panunotem a sika ti mangkorkorehir—nalabit ken adingmo. Makitam kadin ti pagimbagan dayta? Ita, panunotem ti situasionmo ket ikagumaam a kitaen iti kasta a pamay-an.—Prinsipio ti Biblia: Eclesiastes 7:9.
“No dadduma, gapu ta masuronka unay a madillaw, malipatam a tultulongandaka laeng nga agbalin a nasaysayaat a tao, saan ket a tapno saktandaka.”—Theresa.
Agtalinaedka a napakumbaba. Dimo ipalubos a ti pride-mo ti manglapped kenka a mangawat iti panangkorehir. Ngem dimo met koma itulok a maupayka unay gapu laeng ta adda masapul a pasayaatem. Makatulong ti kinapakumbaba tapno maliklikam dagita. Laglagipem: Ti panangkorehir a makapasakit unay ket mabalin nga isu ti kasapulam unay. No dimo awaten, aniaman ti rasonmo, maikapiska iti nagpateg nga oportunidad a rumang-ay.—Prinsipio ti Biblia: Proverbio 16:18.
Ti panangkorehir a makapasakit unay ket mabalin nga isu ti kasapulam unay
“Ti panangawat iti panangkorehir ket napateg a paset ti panagbalin a responsable nga adulto. No ditay sursuruen nga awaten ken makasursuro iti dayta, datayto met laeng ti kakaasi.”—Lena.
Agyamanka. Uray no marigatanka a mangawat iti panangkorehir, agyamanka latta koma iti nangaramid iti dayta. Sigurado a ti pagimbagam ti pampanunotenna ken talaga a kayatna nga agballigika.—Prinsipio ti Biblia: Salmo 141:5.
“Kanayon nga umiso ti agyaman, nangruna no kasapulam ti balakad. Uray no dimo kasapulan, nasayaat no agyamanka iti panagreggetna a nakisarita kenka.”—Carla.