Mapan iti linaonna

Mapan iti listaan dagiti linaonna

Saan Pay a Naladaw Unay ti Agbalin a Gayyem ti Dios

Saan Pay a Naladaw Unay ti Agbalin a Gayyem ti Dios

 Saan Pay a Naladaw Unay ti Agbalin a Gayyem ti Dios

Kas insalaysay ni Olavi J. Mattila

“Napanunotyo kadin a mabalinyo ti maaddaan iti umiso a pannakaammo maipapan iti Namarsua?” Insaludsod kaniak ti maysa kadagiti Saksi ni Jehova, ket pinagpanunotnak. Iti dayta a tiempo, nasuroken a 80 ti tawenko ken adun ti naam-ammok a nalatak a tattao, uray dagiti agtuturay iti gobierno. Ngem iti kastoyen a kinalakayko, talaga kadi a mabalinko pay a maam-ammo ti Dios ken agbalinak a gayyemna?

NAYANAKAK idiay Hyvinkää, Finland idi Oktubre 1918. Inkaubingakon ti nadumaduma a trabaho iti talon. Ti pamiliami ket agtartaraken kadagiti baka, kabalio, manok, ken ganso. Nasursurok ti aggaggaget ken mapnek iti trabahok.

Bayat a dumakdakkelak, kanayon nga iparparegta ti nagannakko a turposek ti panageskuelak. Isu a kalpasan ti haiskul, pimmanawak tapno agkolehio. Nakipasetak met iti isports ket nagayyemko ti tserman ti Finnish Athletic Association a ni Urho Kekkonen. Diak man la impagarup a ni Mr. Kekkonen ti agbalin a primero ministro ti Finland ken idi agangay, agbalin a presidente ti nasion​—dagiti posisionna iti las-ud ti 30 a tawen. Diak met pulos impagarup a dakkel ti agbalin nga impluensiana iti biagko.

Kinalatak ken Pannakabalin

Idi 1939, nagrinnupak ti Finland ken Soviet Union. Iti Nobiembre dayta a tawen, naayabanak nga agsoldado. Idi damo, nagserbiak a para sanay kadagiti kadete ket idi agangay kas komandante ti maysa a machine-gun platoon. Imbaondakami iti rinnupak idiay rehion ti Karelia iti beddeng ti Finland ken Soviet Union. Idi kalgaw ti 1941, bayat a makilablabankami iti asideg ti ili ti Vyborg, napuntaanak iti busak gapu iti panagbettak ti bomba ket naipanak iti ospital ti militar. Gapu kadagiti sugatko, diak kabaelanen ti makirupak.

Idi Setiembre 1944, napalubosanak a pumanaw iti armada ket intuloyko ti nagkolehio. Intuloyko met ti nagsanay kas atleta. Namitlo a nagbalinak a kampeon ti pagilian, namindua kas relay runner ken naminsan kas hurdle runner. Nakaalaak met kadagiti diploma iti technology ken economics.

Bayat dayta a tiempo, ngimmato ti saad ni Urho Kekkonen iti gobierno. Idi 1952, bayat ti kinaprimero ministrona, kiniddawna nga agserbiak kas diplomat idiay China. Bayat ti kaaddak sadiay, naam-ammok ti dadduma nga opisial ti gobierno, agraman ni Mao Tse-tung a lider idi ti China. Ngem ti kapatgan a naam-ammok sadiay ket ti napintas a balasang a ni Annikki, nga agtartrabaho iti Finnish Ministry of Foreign Affairs. Nagkasarkami idi Nobiembre 1956.

Iti simmaruno a tawen, nayakarak iti embahada ti Finland idiay Argentina. Sadiay a nayanak ti dua nga in-inauna nga annakmi a lallaki. Idi Enero 1960, nagsublikami iti Finland. Di  nagbayag, naipasngay ti maikatlo nga anakmi a maysa a babai.

Kadagiti Kangatuan a Saad iti Gobierno

Diak pulos nagbalin a miembro ti maysa a napolitikaan a partido. Ngem idi Nobiembre 1963, inawisnak ni Presidente Kekkonen nga agbalin a minister iti foreign trade. Iti simmaruno a 12 a tawen, nagserbiak iti innem a posision iti gabinete, namindua kas minister ti foreign affairs. Kadagidi a tiempo, mamatiak unay a kabaelan ti tao a solbaren dagiti problema ti lubong. Ngem idi agangay, nalawag a nakitak ti pannakawaw ti tao iti pannakabalin. Nasaksiak a mismo dagiti makadangran nga epekto ti kinaawan panagtalek ken apal.​—Eclesiastes 8:9.

Siempre, nakitak met nga adu ti sipapasnek a mangikagkagumaan a mangpasayaat kadagiti kasasaad. Ngem iti kamaudiananna, uray no kasano kasayaat ti intension dagiti panguluen, dida latta maragpat dagiti kalatda.

Iti kalgaw ti 1975, dagiti panguluen ti 35 nga estado ket immay iti Helsinki tapno tumabuno iti Conference on Security and Cooperation in Europe. Siak idi ti minister ti foreign affairs ken nasinged a mamalbalakad ken Presidente Kekkonen. Nadutokanak a mangorganisar iti komperensia isu a naam-ammok ti amin a timmabuno a lider dagiti nasion.

Sumagmamano idi nga aldaw a nasubok unay ti abilidadko a makibagay. Narigatanak uray ti panangurnos laeng iti pagtugawan nga anamongan dagita nga opisial! Nupay kasta, napaliiwko a dayta a komperensia, agraman ti nagsasaruno a miting, ket nakatulong iti pannakapasayaat dagiti kalintegan ti tao ken relasion dagiti nabibileg a pagilian.

Nagbalinak a Sipapanunot iti Naespirituan a Kasapulak

Idi 1983, nagretiroak ken immakarak iti France a pagnanaedan ti anakko a babai. Ngem nakalkaldaang ta idi Nobiembre 1994, nadayagnos nga adda kanser iti suso ni Annikki. Iti dayta met la a tawen, naallukoyak nga agpuonan iti negosio a naduktalan idi agangay kas sinisuitik. Iti intero a biagko, inan-annadak ti nadalus a reputasionko. Ngem namansaan dayta gapu iti naminsan a kamalik iti panagdesision.

Nabayagen nga am-ammok dagiti Saksi ni Jehova. Nupay apresiarek dagiti isasarungkarda ken mangal-alaak kadagiti magasinda, okupadoak unay ken awan tiempok kadagiti naespirituan a banag. Ngem idi 2000, ay-aywanak ni Annikki a makilablaban pay laeng iti kanser. Maysa nga aldaw idi Setiembre 2002, adda Saksi ni Jehova a simmarungkar kaniak. Insaludsodna ti nadakamat iti rugi daytoy nga artikulo. Napanunotko: ‘Talaga kadi a posible a maammuak ti kinapudno maipapan iti Dios? Posible  kadi nga agbalinak a gayyemna? Inruarko ti nakataptapoken a Bibliak ket rinugiak ti regular a pannakiinnadal kadagiti Saksi.

Idi Hunio 2004, pimmusay ti ing-ingungotek nga asawa. Siempre, dagiti annakko ti gubuayan ti liwliwak. Ngem kanayon latta a mapampanunotko no ania ti mapasamak kadatayo no mataytayo. Nagdamagak iti dua a padi ti Lutheran. Ti simple la a sungbatda ket, “Ala, narigat dagita a saludsod.” Saanak a nakontento iti sungbatda. Ad-adda a nagbalinak a sipapanunot iti naespirituan a kasapulak.

Bayat a makiad-adalak iti Biblia kadagiti Saksi, rimmang-ay ti tartarigagayak nga umiso a pannakaammo. Kas pagarigan, ilawlawag ti Biblia nga awan puot dagiti natay a kas iti nakaturog. Adda namnamada nga agbiag manen kas tattao ditoy daga. (Juan 11:25) Daytoy ti nangliwliwa ken nangted kaniak iti namnama.

Di nagbayag, binasak ti intero a Biblia. Ti maysa a teksto a nakatignayak unay ket Mikias 6:8, a kunana: “Ania ti kidkiddawen kenka ni Jehova no di ti panangwatwat iti kinahustisia ken panangayat iti kinamanangngaasi ken panagbalin a naemma iti pannakipagna iti Diosmo?” Naallukoyak iti sirib ken kinasimple dayta a kapanunotan. Impakaammo met dayta a ni Jehova ket Dios a naayat ken nainkalintegan.

Namnama iti Masanguanan

Bayat a nasursurok ti kinapudno maipapan iti Dios, bimmileg ti pammatik ken panagtalekko kenkuana. Sumingsingeden ti relasionko iti Namarsua kaniak! Nagustuak ti sasaona a nailanad iti Isaias 55:11: “Ti saok a rummuar manipud iti ngiwatko. Saanto nga agsubli kaniak nga awanan kadagiti nagbanagan, no di ket sigurado nga aramidennanto daydiay pagragsakak, ket sigurado nga agballiginto iti banag a nangibaonak iti dayta.” Wen, kanayon a tungpalen ni Jehova dagiti karina, ket kastanto ti aramidenna iti masanguanan. Isu ti naan-anay a mangitungpal iti kalat a di maragpat dagiti gobierno ti tao ken ti adu a napolitikaan a komperensiada. Kas pagarigan, kuna ti Salmo 46:9: “Pagsardengenna dagiti gubat agingga iti ungto ti daga.”

Nagadu ti nasursurok iti itatabunok kadagiti gimong dagiti Saksi ni Jehova. Nakitak a mismo sadiay ti pudno a Nakristianuan nga ayat a pakailasinan dagiti pudno a pasurot ni Jesus. (Juan 13:35) Daytoy nga ayat lab-awanna ti nasionalismo ken awan dayta iti lubong ti politika ken komersio.

Ti Kapatgan a Pribilehio

Nasurok a 90 itan ti tawenko. Para kaniak, ti panagbalinko kas maysa kadagiti Saksi ni Jehova ti kapatgan a pribilehio a nagun-odko. Napennek ti wawko iti naespirituan. Naaddaanak iti gundaway a mangammo iti panggep ti biag ken ti kinapudno maipapan iti Dios.

Maragsakanak met ta uray no lakayakon, kabaelak pay laeng ti regular a makigimong ken mangasaba. Nupay adu ti naam-amok a nangato nga agtuturay ken nangibaklayak kadagiti nadagsen a responsabilidad, awan makaartap iti pribilehio a makaam-ammo iti Namarsua a ni Jehova a Dios, ken agbalin a gayyemna. Agyamanak unay kenkuana, ket kayatko nga idaydayaw gapu iti gundawayko nga agbalin a maysa kadagiti ‘katrabahuanna.’ (1 Corinto 3:9) Saan pay a naladaw unay ti agbalin a gayyem ti Namarsua a ni Jehova a Dios!

[Ladawan iti panid 25]

Kaduak ni Presidente Kekkonen ken ni Presidente Ford ti U.S. iti komperensia idiay Helsinki idi 1975

[Ladawan iti panid 25]

Kaduak ni Presidente Kekkonen ken ni Brezhnev a lider ti Soviet

[Ladawan iti panid 26]

Aktiboak kadagiti Nakristianuan nga aktibidad

[Picture Credit Lines iti panid 25]

Makimbaba a kannigid: Ensio Ilmonen/Lehtikuva; makimbaba a kannawan: Esa Pyysalo/Lehtikuva