Ti Panangmatmat ti Biblia

Talaga Aya a Dakes ti Nalabes a Panaginum?

TI MANAGPAKATAWA ken mannakigayyem a bartek ti kangrunaan a mabuya kadagiti entablado ken sine iti adun a tawen. Nupay mabalin nga agar-arte laeng dagiti mananglinglingay, ti panagpakatawada ti mangiladawan iti naiduma a panangmatmat ti adu maipapan iti nalabes a panaginum, ta ibilangda dayta a pagkapuyan, ngem saan a makadangran.

Ngem ti kinaagpaysona, saan a nakakatkatawa dayta. Sigun iti World Health Organization, ti nalabes a panaginum ti maysa kadagiti kangrunaan a makadangran iti salun-at iti intero a lubong. Malaksid iti panagsigarilio, ad-adu ti matay ken agsakit gapu iti nalabes a panaginum ngem iti panangabuso iti dadduma pay a makaadikto a substansia, sa lugienna ti ekonomia ti Estados Unidos laeng iti nasurok a $184 a bilion iti kada tawen.

Agpapan pay kadagitoy a kinapudno, adu ti di mangikankano iti nalabes a panaginum. Nupay mabalin a bigbigenda dagiti makadangran nga epekto ti nabayagen a nalabes a panaginum, awan kano ti pagdaksan ti pasaray nalabes nga uminum. Kadagiti agtutubo iti dadduma a paset ti lubong, ti panagbartek ket maibilang a paset ti naan-anay a panagbaro wenno panagbalasang. Ket agpapan pay kadagiti serioso a pakdaar dagiti organisasion a mangas-asikaso iti salun-at, iti aniaman nga edad ti grupo, kasta unay ti iyaadu dagiti uminum iti nalabes, wenno mamimpinsan nga iyiinum iti lima wenno ad-adu pay a tagay. Nalawag ngarud nga adu a tattao ti mangpampanunot no talaga a dakes ti nalabes a panaginum. Ania ti kuna ti Biblia?

Ti Arak ken Naingel nga Inumen​—Sagut ti Dios

Adu ti nadakamat iti Biblia maipapan iti arak ken dadduma pay a naingel nga inumen. Insurat  ni Ari Solomon: “Mapanka, kanem ti taraonmo buyogen ti panagrag-o ket inumem ti arakmo buyogen ti naimbag a puso, agsipud ta ti pudno a Dios nakasaraken iti ragsak kadagiti aramidmo.” (Eclesiastes 9:7) Binigbig ti salmista a ni Jehova a Dios ti Manangipaay iti “arak a mamagrag-o iti puso ti mortal a tao.” (Salmo 104:14, 15) Nabatad a ti arak ket maysa kadagiti sagut a nairaman kadagiti bendision ni Jehova iti sangatauan.

Nalawag a saan a dakes ken Jesus ti uminum iti arak. Kinapudnona, ti kaunaan a milagro nga inaramidna ket pinagbalinna a de kalidad nga arak ti danum iti maysa a kasaran. (Juan 2:3-10) Inusarna met ti arak a maitutop a simbolo ti darana idi inyussuatna ti Pangrabii ti Apo. (Mateo 26:27-29) Dakamaten pay ti Biblia a makaagas ti arak, ta pinaregta ni Pablo ni Timoteo nga ‘agusar iti bassit nga arak maigapu iti rusokna.’​—1 Timoteo 5:23; Lucas 10:34.

Ti Iyiinum iti Kalkalainganna ti Solusion

Paliiwenyo ta insingasing ni Pablo ti iyiinum laeng iti “bassit nga arak.” Nalawag a kondenaren ti Biblia ti amin a nalabes a panagusar iti arak. Dagiti padi a Judio mabalin nga uminumda iti kalkalainganna no saanda idi a madama nga agtartrabaho. Nupay kasta, maiparit nga uminumda iti aniaman a naingel bayat nga ar-aramidenda dagiti rebbengenda kas papadi. (Levitico 10:8-11) Adu a tawen kalpasanna, napakdaaran dagiti immuna a siglo a Kristiano a dagiti managbarbartek “dida tawiden ti pagarian ti Dios.”​—1 Corinto 6:9, 10.

Kanayonanna, kadagiti pammilin ni Pablo ken ni Timoteo, imbagana a dagidiay mangidadaulo iti kongregasion saanda koma a ‘mammartek a mannakiapa’ wenno “saanda nga igamer ti bagbagida iti adu nga arak.” * (1 Timoteo 3:3, 8) Kinapudnona, ibilin ti Biblia a mailaksid iti kongregasion Kristiano dagiti di agbabbabawi a managbarbartek. (1 Corinto 5:11-13) Kas iti maitutop a sagudayen dagiti Kasuratan, “ti arak ket managuy-uyaw.” (Proverbio 20:1) Ti nalabes a panaginum ti mangpakapuy iti kinatimbeng ti mangnginum ken mangdadael iti kinalimbong ti panunotna.

No Apay a Kondenaren ti Sao ti Dios ti Nalabes a Panaginum

Ni Jehova, ‘Daydiay mangisursuro kadatayo tapno magunggonaan ti bagitayo,’ ammona a no masobraantayo ti aniaman, dangdangrantayo ti bagitayo ken ti sabsabali. (Isaias 48:17, 18) Agpayso daytoy no maipapan iti panaginum kadagiti naingel. Kastoy ti iyimtuod ti Sao ti Dios: “Siasino ti addaan iti kinaay-ay? Siasino ti addaan iti panagdukot? Siasino ti addaan kadagiti rinnupir? Siasino ti addaan iti pannakaseknan? Siasino ti addaan sugsugat nga awan gapgapuna? Siasino ti addaan iti kinalidem kadagiti mata?” Kastoy ti sungbatna: “Dagidiay agtalinaed iti atiddog a tiempo iti arak, dagidiay sumrek nga agbirok iti naggampor nga arak.”​—Proverbio 23:29, 30.

Gapu iti nalabes a panaginum, adu dagiti minamaag ken napeggad a maaramidan ti tattao: agmanehoda bayat a nakainumda isu a pagpeggadenda ti bagida ken ti sabsabali, nadungngoda unay iti dida asawa isu a madadaelda dagiti relasion, agsao ken agtignayda iti minamaag wenno binaballikug pay ketdi. (Proverbio 23:33) Ti nalabes a panaginum ket siuumiso a naawagan a maysa kadagiti makadangran unay iti amin a parikut iti kagimongan a mangap-apektar ita iti sangatauan. Di pakasdaawan nga idagadag ti Dios: “Dika makikadua kadagiti nakaro ti panagin-inumna iti arak”!​—Proverbio 23:20.

Iti Galacia 5:19-21, inlista ni Pablo ti panagbarbartek ken naariwawa a panagragragsak kas “dagiti aramid ti lasag” a maikontra iti bunga ti espiritu ti Dios. Ti nalabes a panaginum ti mangdadael iti relasion ti maysa a tao iti Dios. Nalawag ngarud a rumbeng a liklikan dagiti Kristiano ti aniaman a nalabes a panaginum.

[Footnote]