PARA ITI AGASSAWA
3: Respeto
TI KAIPAPANANNA
Ti agrinrinnespeto nga agassawa maseknanda iti maysa ken maysa uray no adda dida pagkinnaawatan. Kuna ti libro a Ten Lessons to Transform Your Marriage: “Dagiti kasta nga agassawa saanda nga agpinnapilit no agduma ti opinionda. Imbes ketdi, pagsaritaanda ti aniaman a dida pagkinnaawatan. Siraraem a denggenda ti ibagbaga ti asawada ken pagsaritaanda no kasanoda nga agtunos.”
PRINSIPIO TI BIBLIA: “Ti ayat . . . saanna a sapulen dagiti bukodna a pagimbagan.”—1 Corinto 13:4, 5.
“Maipakitak a resrespetuek ni baketko no ipatpategko ken diak agaramid iti aniaman a mangpasakit kenkuana wenno mangdadael iti relasionmi.”—Micah.
NO APAY A NAPATEG
No saan nga agrinnespeto ti agassawa, ti panagsaritada ket malaokan iti panangkritikar, pananginsulto, ken pananglais pay ketdi—dagiti kababalin a pagilasinan ti panagdiborsio sigun kadagiti agsuksukimat.
“No kritikarem, pasagidam, wenno aramidem a pagkakatawaan ni baketmo, mapukaw ti kompiansana ken ti panagtalekna kenka, ken madadael ti panagasawayo.”—Brian.
TI MABALINMO NGA ARAMIDEN
SUBOKEM TI BAGIM
Obserbaram ti pannakisaritam ken tigtignaymo iti makalawas sa isaludsodmo iti bagim:
-
‘Namin-anok a krinitikar ti asawak, ken namin-anok nga inapresiar?’
-
‘Ania dagiti espesipiko a pamay-an nga impakitak ti respeto iti asawak?’
PAGSARITAANYO NGA AGASSAWA
-
Ania dagiti tignay ken sao a mangiparikna a resrespetuenyo ti maysa ken maysa?
-
Ania dagiti tignay ken sao a mangiparikna a saanyo a resrespetuen ti maysa ken maysa?
TIP
-
Mangisuratka iti tallo a pamay-an a kayatmo a maipakitaanka iti respeto. Kasta met laeng ti aramiden ti asawam. Agsinnukatkayo iti listaan, ken ikagumaanyo nga ipakita ti respeto kadagiti banag nga insuratyo.
-
Ilistam dagiti magusgustuam a kababalin ti asawam. Kalpasanna, ibagam iti asawam nga ap-apresiarem unay dagita.
“Maipakitak a resrespetuek ni lakayko no ipariknak babaen ti aramid nga ipatpategko ken kayatko nga agbalin a naragsak. Saan a kanayon a nagarbo dayta. No dadduma, maipakitak a resrespetuek ti asawak uray kadagiti babassit laeng a banag.”—Megan.
Saan a napateg no ibagam a resrespetuem ti asawam; ti napateg ket no marikna ti asawam a resrespetuem.
PRINSIPIO TI BIBLIA: “Ikawesyo ti nadungngo a panagayat ken pannakipagrikna, kinaimbag, kinapakumbaba, kinaalumamay, ken kinaanus.”—Colosas 3:12.
Baka Kayatmo Met ti
AGRIINGKAYO!
No Kasano nga Ipakita ti Respeto
Saan laeng koma a sagpaminsan nga ipakitam ti respeto iti asawam, no di ket kanayon koma. Kasanom a maipakita a resrespetuem ti asawam?
AGRIINGKAYO!
No Kasano nga Ipakita ti Apresasion
Kaaduanna a sumayaat ti relasion ti agassawa no ikagumaanda a kitaen ken apresiaren dagiti nasayaat a kababalin ti maysa ken maysa. Ania ti makatulong tapno agbalinka a manangapresiar?
AGRIINGKAYO!
No Kasano a Maliklikan ti Makapasakit a Sasao
Ania ti mabalinmo nga aramiden no nabaybay-anyo nga agassawa a ti makapasakit a sasao ti nangdadael iti relasionyo?
