AGGIGIAN ni Nehemias iti Susan a siudad ti Persia, ngem ti pusona ket adda iti Jerusalem. Uray no nakaad-adayo dayta a siudad, ipatpategna unay gapu ta adda idiay ti templo ni Jehova. Kalpasan ti nabayag a pannakaipanaw dagiti Judio, napalubosandan nga agsubli idiay Jerusalem. Ngem saan latta a masursurot ti nadalus a panagdaydayaw. Kasta met, dadael pay laeng dagiti pader isu a manmano ti mayat nga agyan sadiay. Ngamin, iti dayta a tiempo, nakapatpateg dagiti pader ti siudad ta dayta ti mangprotektar kadakuada.

Nangato ti posision ni Nehemias iti palasio. Pagtaltalkan isuna ti ari ti Persia a ni Artaxerxes. Ngem napatpateg ken Nehemias ti panagbalinna a matalek ken Jehova. Maysa nga aldaw, binisita ti kabsatna ket impadamagna a “nakarigrigat” ti situasion idiay Jerusalem. Imbagana pay a saan pay a natarimaan dagiti pader ti siudad isu a “mababain” dagiti Judio.

Naladingitan unay ni Nehemias. Imbagana: “Nagtugawak ket nagsangsangitak. Adu nga aldaw a nagladladingitak.” Nagkararag ken Jehova ken nagpakpakaasi a lagipenna ti ilina ken tulonganna ida. Naminsan, idi intulodanna iti arak ni Ari Artaxerxes, napansin ti ari a naliday ni Nehemias. Madandanagan ni Nehemias ngem nagsao latta. Imbagana iti ari ti nagrigat a situasion ti Jerusalem. Isu a dinamag ti ari no ania ti kayatna a mapasamak. Insurat ni Nehemias: “Nagkararagak a dagus iti Dios ti langit.” Kalpasan dayta, imbagana a kayatna pay la ti pumanaw iti Persia ta mapan iti Jerusalem tapno tumulong a mangbangon manen kadagiti pader ken ruangan ti siudad. Pinatgan ti ari ti amin nga indawatna!

Idi kuan, napanen ni Nehemias. Nagbayag ken delikado dayta a panagbiahena. Mano pay la nga aldawna idiay, iti maysa a rabii, napannan kinita dagiti masapul a matarimaan. Idi kuan, pinaayabanna dagiti tattao ken pinaregtana ida a tumulong iti panagtarimaan. Nagsayaat a pagtuladan ni Nehemias ta uray isuna ket nagtrabaho met. Nakaad-adu ti timmulong, uray dagiti babaknang ken prominente a kas kadagiti agpampanday iti balitok ken prinsipe. Timmulong pay ketdi uray ti babbalasang ti maysa kadagita a prinsipe.

Adu ti kabusor dagiti Judio ken saanda a kayat a matarimaan dagiti pader tapno awan ti proteksion ti Jerusalem. Idi damo, kinatkatawaan ken inuy-uyawda ida. Adda pay ketdi ti nangibaga nga uray sora (fox) laeng ti umuli iti ar-aramidenda a pader ket marban. Ngem saan a nagpaapekto kadagita  ni Nehemias ken intultuloyna a pinaregta dagiti agtrabtrabaho.

Ngem saan a simmardeng dagiti bumusbusor. Idi naguduadan ti kangato ti pader, implano dagiti bumusbusor ti umatake manipud iti nagduduma a lugar. Isu nga inaramid ni Nehemias ti amin tapno maprotektaran ti siudad. Idi naammuan dayta dagiti kabusor, saandan nga intuloy ti planoda. Manipud idin, nagguardia ni Nehemias ken ti kagudua kadagiti trabahador bayat a nakaiggemda iti armas. Intultuloy met ti kagudua kadagiti trabahador ti panagtarimaan kadagiti pader. Ngem adda manen napanunot dagiti kabusor.

Adda ulbod a propeta a binayadanda a mangibaga ken Nehemias nga adda mayat a mangpatay kenkuana isu a masapul nga aglemmeng iti uneg ti templo. Ngem saan a kayat ni Nehemias nga aramiden dayta ta ammona ti ibagbaga ti Linteg a dagiti laeng papadi ti mabalin a sumrek iti uneg ti templo. Imbagana: “Rumbeng aya nga agtalaw ti maysa a lalaki a kas kaniak?” Isu nga intultuloyna latta ti nagtrabaho ta ammona a pagayatan ni Jehova ti ar-aramidenda ken sigurado a tulonganna ida. Ket husto ni Nehemias! Iti uneg laeng ti 52 nga aldaw, nalpasdan dagiti pader ket talaga a naibabain dagiti kabusor.

Kasapulan met ni Nehemias ti tured tapno matulonganna dagiti kailianna nga agserbi ken Jehova iti umiso a pamay-an. Kas pagarigan, idi naammuanna nga adda dagiti Judio a babaknang nga agpapautang a nangato ti singsingirenda nga interes kadagiti marigrigat, saan a nagbuteng a nangibaga a kamali ti ar-aramidenda. Kalpasanna, idi naammuanna nga adda dagiti Judio a nangasawa kadagiti saan nga agdaydayaw ken Jehova, situtured nga imbagana a suksukirenda ti Linteg ti Dios.

Ngem kasapulan met ni Nehemias a liwliwaen dagiti maup-upay a kailianna gapu kadagiti kamali ken basolda. Insurona kadakuada daytoy a nagsayaat a kinapudno. Imbagana: “Ti rag-o nga ipaay ni Jehova ti natalged a pagkamanganyo.” Ammo ni Nehemias a natalged ti riknada gapu iti natibker a pader. Ngem kayat nga isuro ni Nehemias no ania a talaga ti mangpatibker kadakuada—ti rag-o nga ipapaay ni Jehova gapu ta agserserbida kenkuana. Ket dayta met la a rag-o ti ipapaay ita ni Jehova tapno maliwliwa ken agbalin a natured dagiti adipenna.

Basaem ti salaysay ti Biblia:

• Nehemias 1:1–6:19; 8:​1-18; 13:​23-31

Pagsasaritaan:

Kasano nga impakita ni Nehemias ti kinatured?

 Agkalika Pay

1. 1. Ania ti karaman iti trabaho ni Nehemias kas parayawat iti arak iti ari? (w10 7/1 9 ¶5-7) A

   Ti sungbatmo

   National Museum of Iran, Tehran, Iran/Bridgeman Images

2. 2. Ania ti nakaidumaan dagiti babbalasang ni Salum kadagiti lallaki a Tekoita? (Neh. 3:​5, 12; w19.10 23 ¶11)

   Ti sungbatmo

3. 3. Kasano a naaramid dagiti parabunag daytoy: ‘Ti maysa nga imada ket agtrabtrabaho bayat a nakaiggem iti armas ti maysa nga imada’? (Neh. 4:​17, 18; w06 2/1 9 ¶1) B

   Ti sungbatmo

4. 4. Apay a madanagan ni Nehemias a saanen a makapagsao iti Hebreo ti dadduma nga ubbing a Judio? (Neh. 13:​23-27; w16.10 14 ¶4)

   Ti sungbatmo

 Panunotem Dagiti Leksion

• Kasano a matulad dagiti panglakayen ni Nehemias no maipapan iti . . .

  • panagtalek ken Jehova? (Neh. 1:​4-11; 4:14; 13:​1-3)

    Ti sungbatmo

  • pannakipagtrabaho kadagiti kakabsat? (Neh. 4:​15, 21-23)

    Ti sungbatmo

  • kinaanus a dumngeg kadagiti kakabsat? (Neh. 5:​1-7) C

    Ti sungbatmo

• Nangato ti posision ni Nehemias iti palasio. Ngem pinanawanna dayta tapno matulonganna dagiti kailianna isu a binendisionan ni Jehova. Ania ti masursurotayo iti dayta?

  Ti sungbatmo

• Ania ti dadduma pay a pamay-an a matuladmo ti kinatured ni Nehemias?

  Ti sungbatmo

Utobem ti Napatpateg a Banag

• Ania ti isuro kaniak daytoy a salaysay maipapan ken Jehova?

  Ti sungbatmo

• Kasano a konektado daytoy a salaysay kadagiti panggep ni Jehova?

  Ti sungbatmo

• Ania ti isaludsodko ken Nehemias inton mapagungar?

  Ti sungbatmo