Mapan iti linaonna

Mapan iti listaan dagiti linaonna

 KAPITULO 1

Asino ti Dios?

Asino ti Dios?

1, 2. Ania dagiti gagangay nga isalsaludsod dagiti tattao?

NAGADU ti saludsod dagiti ubbing. Uray no ilawlawagmo kadakuada ti maysa a banag, isaludsodda latta, ‘Apay?’ Ken uray masungbatam idan, isaludsodda, ‘Ngem apay?’

2 Ubbingtay man wenno nataengan, adda dagiti saludsodtayo. Mabalin nga agdamagtayo no ania ti kanen, pagbado, wenno gatangentayo. Wenno mabalin nga adda dagiti napateg a saludsodtayo maipapan iti biag ken iti masanguanan. Ngem no saantay a makabirok kadagiti makapnek a sungbat, mabalin a sumardengtayon nga agbirok.

3. Apay nga adu ti mangpampanunot a saandan a mabirokan ti sungbat dagiti napapateg a saludsodda?

3 Masungbatan kadi ti Biblia dagiti napateg a saludsodtayo? Mabalin a wen ti sungbat ti dadduma, ngem panagkunada, nakarigrigat a maawatan ti Biblia. Mabalin a panunotenda a dagiti laeng pastor wenno padi ti makasungbat kadagita a saludsod. Mabain met ti dadduma a mangamin a saanda nga ammo ti sungbat. Ania ti makunam?

4, 5. Ania dagiti napapateg a saludsodmo? Apay a masapul nga itultuloymo a biroken dagiti sungbat?

4 Mabalin a kayatmo a maammuan ti sungbat dagiti saludsod a kas iti: Apay a naparsuatayo? Papanantayo no mataytayo? Talaga kadi nga adda Dios? Imbaga ti nalatak a Mannursuro a ni Jesus: “Itultuloyyo ti agdawat, ket maikkankayto; itultuloyyo ti agsapul, ket makasarakkayto;  itultuloyyo ti agtuktok, ket mailukatankayto.” (Mateo 7:7) Dika agsarsardeng agingga a saanmo a mabirokan dagiti mapagtalkam a sungbat.

5 No ‘itultuloymo ti agsapul,’ mabirokam dagiti sungbat iti Biblia. (Proverbio 2:1-5) Saan a narigat a maawatan dagita. Makatulong dagiti masursurom tapno naragragsak ti biagmo ita ken maaddaanka iti nagsayaat a namnama iti masanguanan. Pagsasaritaantayo ti maysa a saludsod a manggulgulo iti panunot ti adu.

IPATPATEGNATAYO KADI TI DIOS WENNO NAULPIT?

6. Apay nga ipapan ti dadduma nga awan bibiang ti Dios iti panagrigrigatda?

6 Adu ti mangpampanunot nga awan bibiang ti Dios kadatayo. Ibagbagada a no talaga nga ipatpategnatayo ti Dios, saan koma a kastoy ti lubong. Adu ti aggugubat, aggiginnura, ken agrigrigat. Agsakit, agsagaba, ken matay dagiti tattao. Pampanunoten ti dadduma, ‘No ipatpategnatayo ti Dios, apay ngarud a saanna a pagpatinggaen dagita?’

7. (a) Kasano nga isursuro dagiti lider ti relihion a naulpit ti Dios? (b) Apay a masiguradotayo a saan a ti Dios ti makimbasol kadagiti dakes a mapaspasamak?

7 No dadduma, isursuro dagiti lider ti relihion a naulpit ti Dios. No adda dakes a mapasamak, ibagada a pagayatan ti Dios dayta. No kasta, pabpabasolenda a talaga ti Dios. Ngem isursuro ti Biblia a saan a ti Dios ti mangpatpataud iti kinadakes. Kuna ti Santiago 1:13 a saan a subsuboken ti Dios ti asinoman babaen ti dakes a banag. Kunana: “No masubok ti maysa, saanna koma nga ibaga: ‘Subsubokennak ti Dios.’ Ta saan a mabalin a masubok ti Dios iti dakes a bambanag, ken saanna met a suboken ti asinoman.” Kaipapanan dayta nga uray no  saan a paspasardengen ti Dios ti kinadakes, saan nga isu ti makin-aramid kadagita. (Basaen ti Job 34:10-12.) Mangalatayo iti pagarigan.

8, 9. Apay a saan a nainkalintegan a pabasolentayo ti Dios kadagiti problematayo? Mangted iti pagarigan.

8 Panunotem ti maysa nga agtutubo a lalaki a makikabkabbalay kadagiti nagannakna. Ay-ayaten unay ni tatangna ken sinuruanna nga agaramid iti nasayaat a desision. Idi kuan, nagrebelde ken tatangna ken nagtalaw iti balayda. Nagar-aramid iti dakes ket gimmulo ti biagna. Pabasolem kadi ti ama ta saanna nga inggawid ti anakna a pumanaw? Siempre saan! (Lucas 15:11-13) Kas iti dayta nga ama, saan nga inggawid ti Dios dagiti tattao idi pinilida ti agrebelde ken agaramid iti dakes. Isu a no adda dakes a mapasamak, masapul a laglagipentayo a saan a ti Dios ti makin-aramid iti dayta. Saan nga umiso a pabasolentayo ti Dios.

9 Adda nagsayaat a rason no apay a saan pay a pinasardeng ti Dios dagiti dakes a mapaspasamak. Maammuamto iti Kapitulo 11 ti ibagbaga ti Biblia maipapan iti dayta. Ngem masiguradom nga ay-ayatennatayo ti Dios ken saan nga isu ti makagapu kadagiti problematayo. Kinapudnona, isu laeng ti makasolbar kadagita.​—Isaias 33:2.

10. Apay a masiguradotayo a tarimaanento ti Dios ti amin a dinadael dagiti dakes a tattao?

10 Nasantuan ti Dios. (Isaias 6:3) Amin nga aramidenna ket nasin-aw, nadalus, ken naimbag. Isu a makapagtalektayo kenkuana. Saan a kasta dagiti tattao ta agkamalida no dadduma. Ken uray ti kasingpetan nga agturay saanna a kabaelan a tarimaanen ti amin a dinadael dagiti dakes a tattao. Ti laeng Dios ti makaaramid iti dayta. Kabaelanna a tarimaanen ti amin a dinadael dagiti  dakes a tattao ket aramidennanto dayta. Ikkatennanto a mamimpinsan ti kinadakes.​—Basaen ti Salmo 37:9-11.

ANIA TI MARIKNA TI DIOS NO AGSAGSAGABA DAGITI TATTAO?

11. Ania ti rikna ti Dios no marigrigatanka?

11 Ania ti rikna ti Dios no makitkitana ti mapaspasamak iti lubong ken ti mapaspasaram? Isursuro ti Biblia nga ‘ay-ayaten [ti Dios] ti kinahustisia.’ (Salmo 37:28) Isu a nakapatpateg kenkuana no ania ti umiso ken di umiso. Maladingitan no marigrigatan dagiti tattao. Kuna ti Biblia a “nasaktan ti pusona” idi napno ti lubong iti kinadakes. (Genesis 6:5, 6) Saan a nagbaliw ti Dios. (Malakias 3:6) Ibaga ti Biblia a talaga nga ipatpategnaka ti Dios.​—Basaen ti 1 Pedro 5:7.

Isursuro ti Biblia a ni Jehova ti naayat a Namarsua iti uniberso

12, 13. (a) Apay nga ayaten ken maasiantayo iti sabsabali, ken ania ti mariknatayo no adda makitkitatayo a marigrigatan? (b) Apay a masiguradotayo nga ikkatento ti Dios ti amin a panagsagaba ken kinaawan hustisia?

12 Ibagbaga met ti Biblia a pinarsuanatayo ti Dios a kaladladawanna. (Genesis 1:26) Kayatna a sawen, inaramidnatayo ti Dios nga addaan iti nagsasayaat a kababalin a kas kadagiti kababalinna. Isu a no maladingitanka a makakita a marigrigatan dagiti inosente a tattao, nakarkaro pay ti marikrikna ti Dios a makakitkita iti dayta! Kasanotayo nga ammo?

13 Isursuro ti Biblia a “ti Dios ket ayat.” (1 Juan 4:8) Amin nga ar-aramiden ti Dios ket gapu iti ayat. Agayattayo ta ti Dios ket managayat. Panunotem daytoy: No adda pannakabalinmo, ikkatem kadi ti amin a panagrigrigat ken kinaawan hustisia iti lubong? Siempre, ta ay-ayatem dagiti tattao. Ti ngay Dios? Adda pannakabalinna a mangaramid iti dayta, ket gapu ta ay-ayatennatayo, ikkatennanto amin a panagsagaba ken kinaawan hustisia.  Masiguradom a matungpalto ti amin a kari ti Dios a mabasa iti rugi daytoy a libro! Ngem tapno makapagtalekka kadagita a kari, masapul nga am-ammuem a naimbag ti Dios.

KAYAT TI DIOS A MAAM-AMMOM ISUNA

No kayatmo ti makigayyem iti maysa a tao, ibagam kenkuana ti naganmo. Impakaammo kadatayo ti Dios ti naganna iti Biblia

14. Ania ti nagan ti Dios, ken apay a masapul nga usarentayo dayta?

14 No kayatmo ti makigayyem iti maysa a tao, ania ti umuna nga ibagam kenkuana? Ti naganmo. Adda kadi nagan ti Dios? Ania ti naganna? Ibagbaga ti adu a relihion a Dios wenno Apo ti naganna, ngem saan a nagan dagitoy. Titulo wenno pangawag laeng dagita, kas iti “gobernador” wenno “presidente.” Imbaga ti Dios a Jehova ti naganna. Kuna ti Salmo 83:18: “Maammuan koma dagiti tattao a sika, nga agnagan Jehova, sika laeng ti Kangatuan iti intero a daga.” Nasurok a 7,000 a daras nga inusar dagiti mannurat iti Biblia ti nagan ti Dios. Kayat ni Jehova a maammuam ken usarem ti naganna. Impakaammona kenka ti naganna tapno agbalinka a gayyemna.

15. Ania ti kaipapanan ti nagan a Jehova?

15 Nakapatpateg ti kaipapanan ti nagan ti Dios a Jehova. Kaipapanan dayta a kabaelan ti Dios a tungpalen ti aniaman  a kari ken panggepna ket awan ti makapasardeng kenkuana. Ni laeng Jehova ti addaan iti kasta a nagan. *

16, 17. Ania ti kaipapanan ti (a) “Mannakabalin-amin”? (b) “Ari iti agnanayon”? (c) “Namarsua”?

16 Kas nabasatayo, kuna ti Salmo 83:18 maipapan ken Jehova: “Sika laeng ti Kangatuan.” Kuna met ti Apocalipsis 15:3: “Naindaklan ken nakaskasdaaw dagiti  aramidmo, O Jehova a Dios, ti Mannakabalin-amin. Nalinteg ken napudno dagiti dalanmo, Ari iti agnanayon.” Ania ti kayat a sawen ti titulo a “ti Mannakabalin-amin”? Kaipapananna a ni Jehova ti kabibilgan iti uniberso. Ti met titulo nga “Ari iti agnanayon” kaipapananna nga awan nangrugianna ken awan pagpatinggaanna. Ilawlawag ti Salmo 90:2 nga isu ket manipud iti agnanayon agingga iti agnanayon. Nakaskasdaaw dayta, di ngamin?

17 Ni laeng Jehova ti Namarsua. Kuna ti Apocalipsis 4:11: “Maikarika, Jehova a Diosmi, nga umawat iti dayag ken dayaw ken pannakabalin, gapu ta pinarsuam ti amin a banag, ken gapu iti pagayatam, napaadda ken naparsuada.” Inaramid ni Jehova dagiti anghel idiay langit, dagiti bituen iti tangatang, dagiti bunga ti kayo, dagiti ikan iti baybay, ken ti amin a mapanunotmo!

 MABALINMO KADI TI MAKIGAYYEM KEN JEHOVA?

18. Apay nga ipapan ti dadduma a saanda a mabalin ti makigayyem iti Dios? Ania ti ibagbaga ti Biblia maipapan iti dayta?

18 No mabasa ti dadduma dagiti nakaskasdaaw a kualidad ni Jehova, mabutengda ken maibagada, ‘Mannakabalin ti Dios, nakangatngato, ken nakaad-adayo, isu nga apay koma nga interesado kaniak?’ Ngem kasta kadi ti kayat ti Dios a mariknatayo? Saan a pulos. Kayat ni Jehova nga agbalin a nadekket kadatayo. Kuna ti Biblia a ti Dios ket “saan nga adayo iti tunggal maysa kadatayo.” (Aramid 17:27) Kayat ti Dios nga umasidegka kenkuana, ket ikarkarina nga ‘umasidegto kenka.’​—Santiago 4:8.

19. (a) Kasanoka nga agbalin a gayyem ti Dios? (b) Ania a kababalin ni Jehova ti magustuam unay?

19 Kasanoka nga agbalin a gayyem ti Dios? Kuna ni Jesus: “Maaddaanto iti biag nga agnanayon dagidiay mangam-ammo kenka, ti maymaysa a pudno a Dios, ken ti imbaonmo, ni Jesu-Kristo.” (Juan 17:3) Itultuloymo ti agadal tapno maam-ammom ni Jehova ken ni Jesus, ket maaddaanka iti biag nga agnanayon. Kas pagarigan, naadaltayo a “ti Dios ket ayat.” (1 Juan 4:16) Ngem adu pay ti nagsasayaat a kababalinna. Kuna ti Biblia a ni Jehova ket “naasi ken mannakipagrikna, nabannayat nga agpungtot ken dakkel ti napudno nga ayatna ken kanayon a tungpalenna ti saona.” (Exodo 34:6) Ni Jehova ket ‘naimbag ken sisasagana a mangpakawan.’ (Salmo 86:5) Naanus ken napudno ti Dios. (2 Pedro 3:9; Apocalipsis 15:4) Adu pay ti maammuam maipapan iti nagsasayaat a kababalinna bayat a basbasaem ti maipapan kenkuana iti Biblia.

20-22. (a) Kasanotayo nga agbalin a nadekket iti Dios ket saantayo met a makita? (b) Ania ti aramidem no adda mangpasardeng kenka nga agadal iti Biblia?

20 Kasanoka nga agbalin a nadekket iti Dios ket saanmo  met a makita? (Juan 1:18; 4:24; 1 Timoteo 1:17) Bayat a basbasaem ti maipapan ken Jehova iti Biblia, mas maammuam dagiti pampanunoten ken rikriknana. (Salmo 27:4; Roma 1:20) No ad-adu ti ammom maipapan ken Jehova, ad-adda met nga ayatem ken mariknam a nadekdekketka kenkuana.

Ay-ayaten ti ama dagiti annakna, ngem mas ay-ayatennatayo ti nailangitan nga Amatayo

21 Kanayonanna, mabigbigmonto a ni Jehova ti Amatayo. (Mateo 6:9) Intedna ti biagtayo, ken kayatna a maaddaantayo iti kasayaatan a biag, a kas iti kayat ti naayat nga ama para kadagiti annakna. (Salmo 36:9) Wen, isursuro ti Biblia a mabalinmo ti makigayyem ken Jehova. (Santiago 2:23) Agasem, kayat ni Jehova a Namarsua iti uniberso ti makigayyem kenka!

22 Mabalin nga adda dagiti mangpasardeng kenka nga agadal iti Biblia. Baka mabutengda a baliwam ti relihionmo. Ngem dimo ipalubos nga adda mangpasardeng kenka a makigayyem ken Jehova. Isu ti kasayaatan nga agbalin a Gayyemmo.

23, 24. (a) Apay a masapul nga itultuloymo ti agsaludsod? (b) Ania ti adalentayo iti sumaruno a kapitulo?

23 Bayat nga agad-adalka iti Biblia, addanto dagiti saanmo a maawatan. Dika mababain nga agdamag wenno agpatulong. Kinuna ni Jesus a masapul a napakumbabatayo a kas kadagiti ubbing. (Mateo 18:2-4) Managsaludsod dagiti ubbing. Kayat ti Dios a mabirokam dagiti sungbat. Isu nga adalem a naimbag ti Biblia tapno masiguradom a ti ad-adalem ket kinapudno.​—Basaen ti Aramid 17:11.

24 Ti panagadal iti Biblia ti kasayaatan a pamay-an tapno maam-ammom ni Jehova. Iti sumaruno a kapitulo, maammuantayto a naiduma ti Biblia iti dadduma a libro.

^ par. 15 No awan iti Bibliam ti nagan a Jehova wenno no kayatmo ti ad-adu pay nga impormasion maipapan iti kaipapanan ken pannakaibalikas ti nagan ti Dios, pangngaasim ta kitaem ti Endnote 1.