Mapan iti linaonna

Mapan iti listaan dagiti linaonna

 LEKSION 9

Kasano nga Agbalin a Naragsak ti Pamiliam?

Kasano nga Agbalin a Naragsak ti Pamiliam?

1. Apay a napateg ti kasar iti kinaragsak ti pamilia?

Ni Jehova, a naragsak a Dios, ti naggapuan ti naimbag a damag. Kayatna nga agbalin a naragsak dagiti pamilia. (1 Timoteo 1:11) Isu ti nangyurnos iti panagasawa. Ti legal a panagasawa ket napateg iti kinaragsak ti pamilia ta mangipaay dayta iti natalged a kasasaad a pangpadakkelan kadagiti ubbing. Masapul a raemen dagiti Kristiano dagiti lokal a paglintegan mainaig iti panangirehistro iti kasar.​—Basaen ti Lucas 2:1, 4, 5.

Ania ti panangmatmat ti Dios iti panagasawa? Kayatna a dayta ket permanente a panagtipon ti lalaki ken babai. Kayat ni Jehova a matalek dagiti agassawa iti maysa ken maysa. (Hebreo 13:4) Kagurana ti diborsio. (Malakias 2:16) Ngem ipalubosna a makidiborsio ken makiasawa manen ti maysa a Kristiano no nakikamalala ti asawana.​—Basaen ti Mateo 19:3-6, 9.

2. Kasano ti rumbeng a panangtrato ti agassawa iti maysa ken maysa?

Pinarsua ni Jehova ti lalaki ken babai tapno agtinnulongda kadagiti akemda kas agassawa. (Genesis 2:18) Kas ulo ti pamilia, ti asawa a lalaki ti rumbeng a mangidaulo iti panangipaay iti material a kasapulan ti pamiliana ken iti panangisuro kadakuada maipapan iti Dios. Masapul a managsakripisio ti ayatna ken baketna. Rumbeng nga aginnayat ken agrinnaem dagiti agassawa. Gapu ta imperpekto ti amin a pagassawaan, nakapatpateg a sursuruenda ti agpinnakawan ta dayta ti tulbek ti naragsak a panagassawa.​—Basaen ti Efeso 4:31, 32; 5:22-25, 33; 1 Pedro 3:7.

3. Rumbeng kadi a makisinaka iti asawam no saankayo a naragsak?

No adda saanyo a pagkinnaawatan nga agassawa, ikagumaanyo a tratuen ti maysa ken maysa buyogen ti ayat.  (1 Corinto 13:4, 5) Saan nga irekomenda ti Sao ti Dios ti panagsina kas solusion kadagiti gagangay a parikut ti agassawa.​—Basaen ti 1 Corinto 7:10-13.

4. Annak, ania ti kayat ti Dios para kadakayo?

Kayat ni Jehova nga agbalinkayo a naragsak. Ipapaayna kadakayo dagiti kasayaatan a balakad tapno matagiragsakyo ti kinaagtutuboyo. Kayatna a magunggonaankayo iti sirib ken kapadasan dagiti nagannakyo. (Colosas 3:20) Kayat met ni Jehova a mariknayo ti rag-o iti panangaramid kadagiti banag para iti Namarsua kadakayo ken iti Anakna.​—Basaen ti Eclesiastes 11:9–12:1; Mateo 19:13-15; 21:15, 16.

5. Nagannak, kasanoyo a maparagsak dagiti annakyo?

Masapul nga ikagumaanyo ti agtrabaho tapno maipaayanyo dagiti annakyo iti taraon, pagtaengan, ken bado. (1 Timoteo 5:8) Ngem tapno agbalin a naragsak dagiti annakyo, masapul met nga isuroyo ida nga ayatenda ti Dios ken agsursuroda kenkuana. (Efeso 6:4) Ti mapagulidanan a panagayatyo iti Dios ket adda dakkel nga epektona iti puso ti anakyo. No naibatay iti Sao ti Dios ti isursuroyo iti anakyo, mabalin a dayta ti mangsukog iti panagpampanunotna maipaay iti pagimbaganna.​—Basaen ti Deuteronomio 6:4-7; Proverbio 22:6.

Napateg a paregtaen ken komendaranyo dagiti annakyo. Kasapulan met nga ilinteg ken disiplinaenyo ida. Dagita a panangsanay ti mangsalaknib kadakuada kadagiti kababalin a mangpukaw iti kinaragsakda. (Proverbio 22:15) Ngem pulos a saan koma a naranggas wenno naulpit ti panangdisiplinayo.​—Basaen ti Colosas 3:21.

Mangipabpablaak dagiti Saksi ni Jehova kadagiti libro a nairanta a tumulong kadagiti nagannak ken annak. Dagitoy a libro ket naibasar iti Biblia.​—Basaen ti Salmo 19:7, 11.