Mapan iti linaonna

Mapan iti listaan dagiti linaonna

 LEKSION 3

Masapul a Maam-ammom ti Dios

Masapul a Maam-ammom ti Dios

Tapno agbalinka a gayyem ti Dios, masapul nga am-ammuem. Ammo kadi dagiti gagayyemmo ti naganmo ken awagandaka iti naganmo? Wen awaganda ti naganmo. Kayat met ti Dios a maammuam ken awagam iti naganna. Jehova ti nagan ti Dios. (Salmo 83:18; Mateo 6:9) Ammuem met no ania ti kayatna ken dina kayat. Ammuem no siasino dagiti gagayyemna ken no siasino dagiti kabusorna. Masapul ti adu a tiempo a mangam-ammo iti maysa a tao. Kuna ti Biblia a nainsiriban ti mangilatang iti tiempo a mangam-ammo ken Jehova.​—Efeso 5:15, 16.

Aramiden dagiti gagayyem ti Dios ti makaay-ayo kenkuana. Panunotem dagiti gagayyemmo. No dakes ti panangtratom kadakuada ken aramidem dagiti bambanag a kagurada, agtalinaedda kadi a gagayyemmo? Saan la ketdi! Kasta met, no kayatmo ti makigayyem iti Dios, masapul nga aramidem ti makaay-ayo kenkuana.​—Juan 4:24.

Saan nga amin a relihion agturong iti pannakipagayam iti Dios. Ti kasingedan a gayyem ti Dios a ni Jesus, sinaritana ti dua a dalan. Nalawa ti maysa a dalan ken aduan iti tattao. Dayta a dalan agturong iti pannakadadael. Nailet ti sabali a dalan ket manmano dagiti tattao a magmagna iti dayta. Dayta a dalan agturong iti biag nga agnanayon. Daytoy kaipapananna a no kayatmo ti makipagayam iti Dios, masapul nga ammuem ti umiso a wagas ti panangdayaw kenkuana.​—Mateo 7:13, 14.